- ઈન્ડિયા ગઠબંધનની બેઠક વિપક્ષી એકતામાં ડખો થયો છે
- ઉદ્ધવ ઠાકરેની શિવસેનાએ કોંગ્રેસને અંહકારી ગણાવી
- તો JDUએ નીતિશ કુમારને PM કેન્ડીડેટ જાહેરની વાત કરી
લોકસભા ચૂંટણીને ધ્યાનમાં રાખીને આજે ઈન્ડિયા ગઠબંધનની બેઠક યોજવવાની છે પરંતુ આ પહેલા વિપક્ષી એકતામાં ડખો થયો હોય એવું લાગી રહ્યું છે. એક તરફ ઉદ્ધવ ઠાકરેની શિવસેનાએ બેઠક પહેલા કોંગ્રેસ પર પ્રહારો કરતાં તેને અંહકારી ગણાવી હતી તો બીજી તરફ બેઠક પહેલા બિહારમાં સત્તા પર રહેલ JDUએ નવી માંગ કરતાં કહ્યું કે નીતિશ કુમારને PM કેન્ડીડેટ જાહેર કરી દેવા જોઇએ.
નીતિશ કુમારને PM કેન્ડીડેટ જાહેર કરો
વાત એમ છે કે જનતા દળ યુનાઈટેડ એટલે કે JDUના ધારાસભ્ય ધીરેન્દ્ર પ્રતાપ સિંહે કહ્યું છે કે બિહારના મુખ્યમંત્રી નીતિશ કુમારને પ્રધાનમંત્રી પદના ઉમેદવાર જાહેર કરવા જોઈએ. જો આમ કરવામાં આવશે તો જ ફાયદો થશે. આ માંગણી પાછળનું કારણ જણાવતાં ધીરેન્દ્ર પ્રતાપ સિંહે કહ્યું કે નીતીશ કુમાર ભારત ગઠબંધનમાં સ્વચ્છ છબી ધરાવતા એકમાત્ર નેતા છે. તેમની છબી પ્રામાણિકતાની છે.
ઉદ્ધવ જૂથે કોંગ્રેસને અહંકારી ગણાવી
બીજી તરફ ઉદ્ધવ જૂથે તેના મુખપત્ર સામનાના તંત્રીલેખ દ્વારા કોંગ્રેસ પર પ્રહારો કરતાં કોંગ્રેસને અહંકારી ગણાવી છે. સાથે જ એમ પણ કહ્યું છે કે, 'હવે ઈન્ડિયા એલાયન્સને સારથિની જરૂર છે. અત્યારે ઈન્ડિયા એલાયન્સનો રથ કોઈ સારથિ વગરનો છે. કોંગ્રેસને સલાહ આપતા લખ્યું હતું કે કોંગ્રેસ પ્રાદેશિક પાર્ટીને સમર્થન આપે. ઈન્ડિયા એલાયન્સમાં 28 પક્ષોનું જોડાણ છે, પરંતુ 100 રસોઈયા ખરાબ ભોજન પીરસે છે. આજની બેઠકમાં ઈન્ડિયા એલાયન્સનો ચહેરો સ્પષ્ટ થવો જોઈએ.
જણાવી દઈએ કે શિવસેના (UBT) પ્રમુખ ઉદ્ધવ ઠાકરે અને પાર્ટીના નેતાઓ આદિત્ય ઠાકરે, સંજય રાઉત અને અન્ય નેતાઓ દિલ્હીમાં છે અને તેઓ આમ આદમી પાર્ટીના અરવિંદ કેજરીવાલના નિવાસસ્થાને તેમની સાથે મુલાકાત કરી છે.
