- ઇન્સ્ટાગ્રામ પર રિલ્સ બનાવવાનો યુવાનોમાં ક્રેઝ
- જેતપુરના ભાજપ નેતાના પુત્રનો વીડિયો વાયરલ
- ચાલુ કારની ઉપર બેસીને વીડિયો બનાવાયો
Jetpur Viral Video News: આજના યુવાનોમાં શોર્ટ વીડિયો બનાવાનો ક્રેઝ હવે દિવસેને દિવસે વધી રહ્યો છે. તેમા પણ હવે ઈન્સ્ટાગ્રામ પર રિલ્સ મોટા ભાગના લોકો બનાવતા થઈ ગયા છે. ખાસ કરીને કોલેજમાં અભ્યાસ કરતા યવુક અને યુવતીઓ રિલ્સ વધારે બનાવતા હોય છે. ફેમસ થવાના ચક્કરમાં યુવકો જોખમી વીડિયો બનાવી પોતાના અને અન્યોના જીવ જોખમમાં મુકતા હોય છે. આજકાલના યુવાનો સોશિયલ મીડિયાના ચક્કરમાં જિંદગીને રમત સમજી રહ્યા છે. સોશિયલ મીડિયા પર સસ્તી પ્રસિદ્ધિ મેળવવાના મોહમાં જોખમી સ્ટંટ કરીને પોતાના જીવની સાથે અન્ય લોકોના જીવ પણ જોખમમાં મૂકી રહ્યાં છે. ત્યારે ફરી એકવાર ટ્રાફિકના તમામ નિયમોનું ઉલ્લઘંન કરતો વીડિયો સોશિયલ મીડિયામાં વાયરલ થયો છે.
ભાજપના નેતાના પુત્રનો વીડિયો વાયરલ
જેતપુરમાં કાર સ્ટંટનો વીડિયો વાયરલ થયો છે. જેતપુરના ભાજપના નેતાના દિનેશ ભુવાના પુત્ર જયવીર ભુવાએ કાર સ્ટંટનો વીડિયો ઈન્સ્ટાગ્રામ પર મુક્યો છે. જે વીડિયો સોશિયલ મીડિયા પર વાયરલ થયો છે. આ વીડિયોમાં ભાજપ નેતાનો દિકરો મિત્રોની સાથે ચાલુ કારે સ્ટંટ કરતો જોવા મળી રહ્યો છે.
ટ્રાફિકના તમામ નિયમોનું ઉલ્લઘંન
આ વીડિયોમાં યુવકોને ટ્રાફિકના તમામ નિયમોનું ઉલ્લઘંન કરતા જોવા મળી રહ્યા છે. યુવકોએ ચાલુ કારની ઉપર બેસીને વીડિયો બનાવ્યો છે. ભાજપ નેતા દિનેશ ભુવાના પુત્રનો વીડિયો વાયરલ થતાં લોકોમાં સવાલ ઊભો થયો છે કે શું ટ્રાફિકના તમામ નિયમો નેવે મુકાતા ભાજપ નેતાના પુત્ર સામે કાર્યવાહી થશે?
બેફામ સ્ટંટબાજો પર લગામ ક્યારે લાગશે?
અત્રે ઉલ્લેખનીય છે કે, અમદાવાદમાં ઇસ્કોન બ્રિજ પર અકસ્માત બાદ પણ રાજ્યમાં અનેક નબીરાઓ બેફામ વાહન ચલાવી રહ્યાં છે. ફૂલ સ્પીડમાં ગાડીઓ ચાલવવાના શોખીનો અકસ્માતના બનાવો પરથી જરા પણ શીખ લેવા તૈયાર ન હોય તે રીતે બેફામ વાહન હંકારી રહ્યાં હોય તેવા અવાર નવાર વીડિયો સામે આવી રહ્યા છે. પોલીસ આવા સ્ટંટબાજો સામે કડક કાર્યવાહી કરી રહી છે, છતાં એક બાદ એક આવા જોખમી સ્ટંટના વીડિયો સામે આવી રહ્યાં છે. જે સાબિત કરી રહ્યાં છે કે સ્ટંટબાજોને પોલીસ કે કાયદાનો કોઈ જ ડર નથી, ત્યારે આવા બેફામ સ્ટંટબાજો પર લગામ ક્યારે લાગશે તે મોટો સવાલ છે.
