તંત્રનો ખુલાસો / શું અમદાવાદમાં સોસાયટી બહાર વાહન પાર્ક કરવાનો ચાર્જ આપવો પડશે, જાણો AMCએ શું કર્યો ખુલાસો

• પાર્કિંગ ચાર્જ વસૂલવા માટે નીતિ અંગે ચર્ચા
• ટાઉન પ્લાનિંગ & એસ્ટેટ કમિટીના ચેરમેનએ જાણકારી આપી
• "પાર્કિંગ નીતિ બનાવવાનો કોઈ પ્લાન નથી"

અમદાવાદ શહેરમાં લોકો સોસાયટી કે ફ્લેટની બહાર પાર્કિંગ કરતા હોય છે. ત્યારે અમદાવાદ મહાનગરપાલિકા દ્વારા સોસાયટી અને ફ્લેટની બહાર પાર્કિંગ કરનાર વાહન ચાલકો પાસેથી પાર્કિંગ વસૂલવા માટે નીતિ બનાવવામાં આવી રહી હોવાની ચર્ચા હતી. જોકે ટાઉન પ્લાનિંગ એન્ડ એસ્ટેટ કમિટીના ચેરમેન દેવાંગ દાણીએ સમગ્ર વાતનો છેદ ઉડાવતા કહ્યું કે, હાલ મહાનગરપાલિકા દ્વારા નવી પાર્કિંગ નીતિ બનાવવાનો કોઈ પ્લાન નથી. સોસાયટી અને ફ્લેટની બહાર વાહન મુક્ત વાહનચાલકો પાસેથી કોઈ ચાર્જ વસૂલવાની યોજના નથી.

અગાઉ શું સમાચાર થયા હતા જાહેર

થોડા દિવસ અગાઉ અમદાવાદમાં સોસાયટીઓ દ્વારા રોડ પર પાર્કિંગ મુદ્દે સમાચાર સામે આવ્યા હતા. જેમાં રાત્રે રોડ પર વાહન પાર્ક કરવા મુદ્દે નાગરિકોએ ચાર્જ ભરવો પડશે. માસિક રૂપિયા 300થી 1500 સુધીનો ચાર્જ ભરવો પડશે. મનપાની પાર્કિંગ પોલિસી વિચારણાધિન છે. શહેરના મોટા ભાગના વિસ્તારમાં સોસાયટી બહાર વાહનો પાર્ક થાય છે. જે તે વિસ્તારની જંત્રી પ્રમાણે પાર્કિંગ ચાર્જ નક્કી કરવાની યોજના છે. ટૂંક સમયમાં આ યોજના અમલમાં આવશે.આ પ્રકારના સમાચાર બાદ મનપાના ટાઉન પ્લાનિંગ વિભાગ દ્વારા ખુલાસો કરાયો છે.