હવે ભીક્ષા નહીં શિક્ષા / સિગ્નલ પર જ Wifi-LEDથી અપાશે શિક્ષણ, CM ભૂપેન્દ્ર પટેલે શરૂ કરાવ્યો ખાસ પ્રોજેક્ટ

• સિગ્નલ પર શિક્ષણથી વંચિત બાળકો માટે 'સિગ્નલ સ્કૂલ યોજના' ની શરૂઆત
• પ્રોજેક્ટની શુભ શરૂઆત CM ભૂપેન્દ્ર પટેલના હસ્તે કરાઇ
• 10 સિગ્નલ સ્કૂલમાં 139 બાળકોને ભણાવાશે

પ્રોજેક્ટની શુભ શરૂઆત CM ભૂપેન્દ્ર પટેલના હસ્તે કરાઇ

રાજ્ય સરકારે સિગ્નલ પર રહેતા કે સ્કૂલે ન જતા બાળકોના અભ્યાસ માટે મહત્વનો નિર્ણય કર્યો છે. આવાં નિરાધાર બાળકો માટે સરકારે 'સિગ્નલ સ્કૂલ યોજના' ની શરૂઆત કરી છે. આ યોજના અંતર્ગત સરકાર દ્વારા બસની વ્યવસ્થા પણ શરૂ કરવામાં આવશે. આ યોજના અંતર્ગત રસ્તા પર ભીક્ષા માંગતા તેમજ સ્કૂલે નહીં જનારા બાળકોને ભણાવવામાં આવશે. જો કે, આ પ્રોજેક્ટની શુભ શરૂઆત CM ભૂપેન્દ્ર પટેલના હસ્તે કરી દેવાઇ છે.

બસની અંદર જ LED ટીવીથી માંડીને વાઇફાઇ સુધીની સુવિધા

સિગ્નલ શાળા શરૂ કરવા માટે રૂ 2.35 કરોડ ફાળવવામાં આવ્યાં છે. જે હેઠળ 10 સિગ્નલ સ્કૂલમાં 139 બાળકોને ભણાવવામાં આવશે. સિગ્નલ સ્કૂલમાં વાઇ-ફાઇ, LED ટીવી અને CCTV કેમેરા સહિતની સુવિધાઓ પણ ઉપલ્બધ હશે. શહેરના અલગ-અલગ સિગ્નલ પર સવાર-સાંજના સમયે સિગ્નલ સ્કૂલ મારફતે શિક્ષણ આપવામાં આવશે. સિગ્નલ સ્કૂલમાં તમામ પ્રકારની સુવિધાઓ ઊભી કરવામાં આવી છે. જેમાં બસની અંદર જ બ્લેકબોર્ડ, શિક્ષક માટે ટેબલ-ખુરશી, LED ટીવી, સીસીટીવી, પીવાનું પાણી, મીની પંખા તેમજ વાઇફાઇ સહિતની સુવિધા ઉપલબ્ધ રહેશે.

તમને જણાવી દઇએ કે, સિગ્નલ સ્કૂલો માટે એએમટીએસ પાસેથી બસો મેળવીને તેમાં સુધારા વધારા કરીને હરતી ફરતી સ્કૂલો બનાવવામાં આવી છે. આ સિગ્નલ સ્કૂલો જે-તે સિગ્નલ અથવા તો નક્કી કરેલા જંકશન ખાતે ઉભી રાખીને  બાળકોને ભણાવવામાં આવશે.