- રાજકોટ પોલીસના ગળે હવે રામાણીની રામાયણ
- બિલ્ડર કમલેશ રામાણીએ જમીન પચાવ્યાની ફરિયાદ
- નામચીન પીએસઆઈ સાખરાએ પણ પડાવ્યા 50 લાખ
રાજકોટ પોલીસ કમિશનર કચેરી છેલ્લા કેટલાક સમયથી સમાચારોમાં છે. પરંતુ આ વખતે જે ઘટના બની છે, તેના કારણે આખા પોલીસ બેડામાં ખળભળાટ મચી ગયો રાજકોટ પોલીસ કમિશનર પર લાગેલા આરોપ મામલે હજુ તો તપાસ સમિતિનો રિપોર્ટ સામે આવ્યો નથી, ત્યારે વધુ એક વ્યક્તિએ ક્રાઈમ બ્રાન્ચ પર વસૂલીના આરોપ લગાવીને કમિશનરની ઓફિસ પર જ ફિનાઈલ પીવાનો પ્રયાસ કર્યો.
રાજકોટ પોલીસ કમિશનરની કચેરી લોકો ન્યાયની અપેક્ષા સાથે આવતાં પણ હવે આ ઓફિસ આક્રોશ ઠાવવવાનું કેન્દ્ર બની ગઈ છે. અને આક્રોશ પણ કોની સામે?. જેમના પર નાગરિકોની સુરક્ષાની જવાબદારી છે તેમની જ સામે. પોલીસની ગરિમાને લજવે તેવા આરોપનું એપી સેન્ટર બનેલી રાજકોટ પોલીસ કમિશનરની કચેરીએ આ હોબાળા સાથે જ વધુ એક વસૂલીકાંડનો પણ ખુલાસો થયો. વિજય સોલંકી નામના આ શખ્સનો આરોપ છે કે રાજકોટના બિલ્ડર કમલેશ રામાણી સહિત પાંચ લોકો જમીન ખાલી કરાવવા દબાણ કરી રહ્યા છે. આ જમીન તેને વારસા રૂપે મળી છે. જેના પર કમલેશ રામાણીએ 26 માર્ચ 2021ના રોજ બળજબરીપૂર્વક સહી કરાવી લીધી.
વિજય સોલંકીના આરોપ મુજબ આ વાત માત્ર આટલેથી ન અટકી. અને ક્રાઈમબ્રાંચના પીએસઆઈ સાખરા સહિતના પોલીસ અધિકારીઓએ 50 લાખ રૂપિયા જેટલી રકમ પડાવી લીધી અને તેને ખોટા કેસમાં ફસાવી દેવાની પણ ધમકી આપી.
રાજકોટના બિલ્ડર કમલેશ રામાણીએ આ આરોપોને તો નકાર્યા છે, પરંતુ એક બાદ એક સણસણતા આરોપોની વણઝારના કારણે રાજકોટ પોલીસના ઉચ્ચ અધિકારીઓ સ્તબ્ધ છે, આરોપોની ગંભીરતાને જોતા તમામ દિશાઓમાં નિષ્પક્ષ તપાસની તૈયારી દર્શાવી છે.
રાજકોટના સખિયા બંધુઓએ સૌપ્રથમ વસૂલીના આરોપ લગાવ્યા બાદ રાજકોટ ક્રાઈમબ્રાંચના તમામ અધિકારીઓની બદલી તો કરી દેવામાં આવી છે, બીજી તરફ રાજકોટ પોલીસ કમિશનરની કમિશનમાં ભૂમિકા મામલે અત્યાર સુધીમાં 10 લોકોના નિવેદન લેવામાં આવ્યા છે. અને તપાસ અધિકારી વિકાસ સહાય ગમે તે સમયે રિપોર્ટ રજૂ કરી શકે છે.
