એક્શન / સરકારી કોન્ટ્રાક્ટમાં કાંડ, ખનીજ ચોરીને બનાવ્યો હાઇવે, દિલીપ બિલ્ડકોનને રૂ.1 કરોડનો દંડ

• મોરબી પંથક ખનીજ ચોરીનો મામલો
• દિલીપ બિલ્ડકોનને રૂ.1 કરોડનો દંડ
• નેશનલ હાઇવેમાં વપરાતું હતું ખનનનું મટીરીયલ

મોરબી પંથકમાં ખનીજ ચોરી મામલે દિલીપ બિલ્ડકોનને રૂ.1 કરોડનો દંડ ફટકારવામાં આવ્યો છે. ભુસ્તરશાસ્ત્રી જે.એસ.વાઢેરે દિલીપ બિલ્ડકોનને નોટિસ ફટકારી છે. મહત્વનું છે કે, થોડા દિવસ અગાઉ મોરબીના કાંતિપુરમાં ખાણ ખનીજ વિભાગે મસમોટી ખનીજચોરી પકડી પાડી હતી. આ ખનીજચોરી દિલીપ બિલ્ડકોન નામની કંપની જ કરી રહી હતી. 

ખાણ ખનીજ વિભાગની ટીમે પાડ્યો હતો દરોડો
ગત 19મીએ ખાણ ખનીજ વિભાગની ટીમે મોરબીના કાંતિપુરમાં દરોડો પાડ્યો હતો. આ દરમિયાન ખાણ ખનીજ વિભાગની ટીમે મસમોટી ખનીજચોરી પકડી પાડી હતી. ગામનની એક વાડીમાંથી ખનીજચોરી કરતા 10 વાહનો ટીમે કબજે કર્યા હતા. જે બાદ તપાસ કરતા આ વાહનો દિલીપ બિલ્ડકોન કંપનીના હોવાનું સામે આવ્યું હતું. સાથે જ 37,220 ટન ખનીજચોરી તપાસમાં બહાર આવી હતી. ખોદકામની માપણી કરતા કુલ 37,220 મેટ્રિક ટન સાદી માટીનું ગેરકાયદે ખનન થયાનું સાબિત થયું હતું. આ માટી હાઇવે બનાવવા માટે વપરાતી હતી. 

37,220 ટન ખનીજચોરી તપાસમાં બહાર આવી
જે બાદ ભૂસ્તરશાસ્ત્રી જે.એસ.વાઢેરે આ ખનીજચોરી બદલ 1 કરોડનો દંડ ફટકારતી નોટિસ દિલીપ બિલ્ડકોનની ભોપાલ ઓફિસે મોકલી છે. આ સમાધાન રકમ ભર્યા બાદ જ ગુનાની માંડવાળ થશે. આ સિવાયની રજૂઆત માટે કંપનીને 7 દિવસની મુદત અપાઈ છે.

મોટા સરકારી કામ દિલીપ બિલ્ડકોન પાસે
અત્રે ઉલ્લેખનીય છે કે, મોરબીમાં નેશનલ હાઇવેનું કામ અને રાજકોટ ઇન્ટરનેશનલ એરપોર્ટનું કામ દિલીપ બિલ્ડકોન પાસે જ છે. કાંતિપુર ગામેથી ખનીજચોરી કરીને આ જ હાઇવેમાં માટી વપરાતી હતી.