આગાહી / 400 વર્ષ જૂની પરંપરા: ભમરીયા કુવામાં રોટલો નાખી વરસાદના વરતારા, જામનગર આમરા ગામની પરંપરા

• જામનગર આમરા ગામ ખાતે વરસાદની આગાહી
• 400 વર્ષ જૂની પરંપરાથી કરાઇ છે વરસાદની આગાહી
• અષાઢ મહિનાના પહેલાં સોમવારે કરાઇ છે આગાહી

જૂના રિવાજો અને પરંપરા આપડા દેશની અનોખી ઓળખ છે. પરંપરાના પાયા પર આપડા દેશની સંસ્કૃતિ ટકી રહી છે. ત્યારે જામનગર જિલ્લામાં આવી જ એક સદીઓ જુની પરંપરા આજે પણ અકબંધ રહેવા પામી હતી. જેમાં શહેરની ભાગોળે આવેલ આમરા ગામે કુવામાં રોટલો પધરાવી ચોમાસુ કેવું રહેશે તેનો વરતારો વ્યક્ત કરવામાં આવ્યો હતો. લગભગ ગામમાં છેલ્લા 400 થી વધુ વર્ષ જૂની આ પરંપરા ચાલી આવે છે જેને આજે પણ લોકોએ જાળવી રાખી છે.

ભમરીયા કુવામાં રોટલો નાખી કરવામાં આવે છે આગાહી 

આમરા ગામેં આવેલો કુવો પૌરાણિક મહત્વ ધરાવે છે, વર્ષોથી આ કૂવામાં અષાઢ મહિનાના પ્રથમ સોમવારે ગામના વડીઓ અને મોટા ભાગના લોકો એકત્ર થાય છે. બાદમાં વડવાઓએ શરૂ કરેલી આ  પરંપરા મુજબ ગામમાં રહેતા સતવારા સમાજની મહિલા રોટલો બનાવે છે અને આ રોટલો વાજતે ગાજતે ગામના વાણંદ લઇને કુવા પાસે પહોંચે છે. ત્યારબાદ આ રોટલો જાડેજા પરિવારના યુવાન હાથે  રોટલાને કુવામાં પધરાવવામાં આવે છે. ત્યારબાદ જો આ રોટલો ઉત્તર દિશા તરફ જાય તો ચોમાસુ સારુ રહેશે તેવો અંદાજ લગાવવામાં આવે છે. આજે આ પરંપરા પ્રમાણે રોટલો ઉત્તર દિશા તરફ ગયો હોવાથી સારા ચોમાસાની આશા જાગી છે.

આ વર્ષ સારું જશે તેવી કરવામાં આવી આગાહી
આ પ્રસંગને લઈને ગામમાં ઉત્સવ જેવો માહોલ જામે છે. માન્યતા એવી પણ છે કે આ કુવા પાસે માતાજીનો વાસ છે, જ્યારે એક મહિલા રોટલા બનાવીને વાડીએ ભાત લઇને જતી હતી, આ દરમિયાન કુવા પાસે કોઇએ રોટલા છીનવી લીધા અને ખાઇ ગયા. ત્યારબાદથી અહીં માતાજી બેઠા છે અને રોટલા માગે છે. જેને લઈને ગામના લોકો આ પ્રકારની પરંપરા કરે છે.