- Cyclone Mochaની અસરથી વરસાદ
- બંગાળ-ઓડિશા સહિત આ રાજ્યોમાં એલર્ટ
- દિલ્હીમાં ભારે પવન ફૂંકાશે
ચક્રવાત મોચાની અસર દેશના ઘણા રાજ્યોમાં જોવા મળી રહી છે. હવામાન વિભાગે બંગાળ, ઓડિશા અને છત્તીસગઢના દરિયાકાંઠાના વિસ્તારો ઉપરાંત દેશના ઘણા મેદાની વિસ્તારોમાં ભારે વરસાદની આગાહી કરી છે. હવામાન વિભાગ પાસેથી મળેલી તાજી માહિતી અનુસાર, ચક્રવાત મોચા દેશના ક્યાં ભાગોને ક્યાં સુધી પ્રભાવિત કરશે, તેના વિશે હાલ કંઈ કહી શકાય તેમ નથી.
આ વિસ્તારોમાં ભારે વરસાદની સંભાવના
IMDના ડીજી મૃત્યુંજય મહાપાત્રાના જણાવ્યા અનુસાર, ચક્રવાતી તોફાન ધીમે-ધીમે બંગાળની ખાડીના મધ્ય ભાગની તરફ આગળ વધશે અને 10 મે સુધીમાં તે વધુ તીવ્ર બનશે. તેની અસરથી આંધ્ર પ્રદેશ, બિહાર, પંજાબ, પશ્ચિમ બંગાળ, ઓડિશા, કેરળ, કર્ણાટકના દક્ષિણ ભાગો, તમિલનાડુ, પુડુચેરી, કરાઈકલ, આસામ, અરુણાચલ પ્રદેશ અને મેઘાલયના ઘણા વિસ્તારોમાં ભારે વરસાદની સંભાવના છે.
બંગાળ અને ઓડિશામાં વાવાઝોડાને લઈને એલર્ટ જાહેર
હવામાન વિભાગના જણાવ્યા અનુસાર, 9 મેના રોજ વાવાઝોડાના ડિપ્રેશનમાં પરિવર્તિત થવાની સંભાવના છે. 10 મેના રોજ મોચા વાવાઝોડું દક્ષિણપૂર્વ બંગાળની ખાડી, બંગાળની પૂર્વ મધ્ય ખાડી અને આંદામાન સાગરની આસપાસના વિસ્તારોમાં એક ચક્રવાતી તોફાનનું સ્વરૂપ લેશે. જેના કારણે 12 મે સુધી મોટાભાગના વિસ્તારોમાં મધ્યમ વરસાદ જોવા મળશે. તો 9થી 11 મે દરમિયાન દરિયાકાંઠા અને સરહદી વિસ્તારોમાં ભારેથી અતિ ભારે વરસાદ પડી શકે છે. આ દરમિયાન 70-80 કિલોમીટર પ્રતિ કલાકની ઝડપે પવન ફૂંકાવાની શક્યતા છે. બંગાળ અને ઓડિશા બંનેમાં આ વાવાઝોડાને લઈને એલર્ટ જારી કરવામાં આવ્યું છે.
રાજધાનીમાં આજે ભારે પવન ફૂંકાવાની સંભાવના
હવામાન વિભાગના જણાવ્યા અનુસાર, આજે એટલે કે 9 મેના રોજ દેશની રાજધાની નવી દિલ્હીમાં લઘુત્તમ તાપમાન 20 ડિગ્રી અને મહત્તમ તાપમાન 37 ડિગ્રી નોંધાઈ શકે છે. આ દરમિયાન રાજધાનીમાં ભારે પવન ફૂંકાવાની સંભાવના છે. બીજી તરફ ઉત્તર પ્રદેશની રાજધાની લખનઉની વાત કરીએ તો આજે લઘુત્તમ તાપમાન 24 ડિગ્રી અને મહત્તમ તાપમાન 38 ડિગ્રી નોંધાઈ શકે છે. જો કે, અહીં આકાશમાં વાદળો જોવા મળે છે.
આ રાજ્યોમાં થશે વરસાદ
હવામાન આગાહી એજન્સી સ્કાયમેટ અનુસાર, આગામી 24 કલાક દરમિયાન જમ્મુ અને કાશ્મીર, લદ્દાખ, હિમાચલ પ્રદેશ અને ઉત્તરાખંડમાં એક કે બે જગ્યાએ હળવાથી મધ્યમ વરસાદ અને હિમવર્ષા થવાની સંભાવના છે. આંદામાન અને નિકોબાર ટાપુઓના દક્ષિણ ભાગોમાં મધ્યમથી ભારે વરસાદની શક્યતા છે. ધીમે ધીમે તે સમગ્ર આંદામાન અને નિકોબાર ટાપુઓને આવરી લેશે. દક્ષિણપૂર્વ બંગાળની ખાડી અને આંદામાન સમુદ્રમાં દરિયાની સ્થિતિ ખૂબ જ ખરાબ રહેશે અને દરિયામાં ઊંચા મોજા ઉછળી શકે છે. આંતરિક તમિલનાડુ, દક્ષિણ અને તટીય કર્ણાટક, કેરળ અને મધ્ય મહારાષ્ટ્રના ભાગોમાં હળવાથી મધ્યમ વરસાદની શક્યતા છે. આ સિવાય ઓડિશા, દક્ષિણ છત્તીસગઢ, મધ્ય ઉત્તર પ્રદેશ, લક્ષદ્વીપ, તેલંગાણા, વિદર્ભ, મરાઠવાડા અને આંધ્રપ્રદેશમાં હળવો વરસાદ થવાની સંભાવના છે.
