અનરાધાર વરસાદ / જળયાત્રાના દિવસે અમદાવાદમાં વહેલી સવારથી તૂટી પડ્યો મેહુલિયો, વાવાઝોડા સાથે ધોધમાર વરસાદ, વૃક્ષો ધરાશાયી

• રાજ્યના વાતાવરણમાં અચાનક આવ્યો પલટો 
• અમદાવાદમાં વહેલી સવારથી જોરદાર વરસાદ
• વીજળીના કડાકા ભડાકા સાથે આકાશ ગર્જી ઉઠ્યું

હવામાનની આગાહી મુજબ અમદાવાદ સહિત રાજ્યના કેટલાક વિસ્તારોમાં વહેલી સવારથી પલટો આવ્યો છે. અમદાવાદમાં વહેલી પરોઢિયે સામાન્ય વરસાદ બાદ અચાનક 6:30 વાગ્યા આસપાસ વીજળીના કડાકા ભડાકા સાથે આકાશ ગર્જી ઉઠ્યું હતું. જે બાદમાં અમદાવાદના અનેક વિસ્તારોમાં ધોધમાર વરસાદ તૂટી પડ્યો હતો. મહત્વનું છે કે, છેલ્લા બે દિવસથી કાળઝાળ ગરમી વચ્ચે આવતા થોડી રાહત થઈ હતી. 

અમદાવાદ શહેરમાં વહેલી સવારથી વરસાદ પડી રહ્યો છે. વિગતો મુજબ આજે સવારથી સેટેલાઈટ, બોપલ, વસ્ત્રાપુર, મેમ્કો, શાહીબાગ, ઘાટલોડિયા, ચાંદલોડિયા, સરખેજ, ચાંદખેડા, વેજલપુર, શિવરંજની, મેમનગર, આંબાવાડી, નરોડા, મેઘાણીનગર, પાલડી,નારણપુરા, સાબરમતી, રાણીપ, નવા વાડજ, થલતેજ, સરદારનગર, અસારવા, કુબેરનગર અને નવરંગપુરામાં ભારે વરસાદ પડ્યો છે.

આજે ભગવાન જગન્નાથજીની જળયાત્રા
ભગવાન જગન્નાથજીની 146મી રથયાત્રાને લઈ પુરજોશમાં તૈયારીઓ ચાલી રહી છે. આજે જળયાત્રા માટેની જગન્નાથજી મંદિર અને સરસપુર મંદિરમાં પણ તૈયારીઓ પૂર્ણ કરી દેવામાં આવી છે. રથયાત્રા પહેલાં મહત્વપૂર્ણ ઉત્સવ વિધિ ''જળયાત્રા’ જેઠ સુદ પૂનમ રવિવારે સવારે 8 વાગ્યે જમાલપુર જગન્નાથજી મંદિરેથી નીકળી સાબરમતી નદીના સોમનાથ ભુદરના આરે ગંગા પૂજન માટે વરઘોડારૂપે પહોંચશે. સાબરમતી નદીના સોમનાથ ભુદરના આરે ગંગા પૂજન કર્યા બાદ ત્યાંથી 108 કળશમાં જળ ભરીને મંદિરમાં લાવવામાં આવશે. ત્યાર બાદ ષોડ્પશોચાર પૂજા વિધિ કરવામાં આવશે. આ જળથી ભગવાનનો જળાભિષેક કરવામાં આવશે અને ત્યાર બાદ ભગવાનનાં ગજવેશનાં દર્શન થશે. આરતી બાદ ભગવાન જગન્નાથજીને મોસાળ મોકલવામાં આવશે.  જળયાત્રા  વિધિમાં ગૃહરાજ્યપ્રધાન  હર્ષ સંઘવી,  શિવાનંદ આશ્રમના સ્વામી પરમાત્માનંદ સરસ્વતી મહારાજ, અમદાવાદના મેયર કિરીટ પરમાર, સહિત શહેરના ધારાસભ્યો, કોર્પોરેટર અને ભાજપ સંગઠનના નેતાઓ હાજર રહેશે.