અયોધ્યા રામ મંદિર / રામલલા માટે એક નહીં, 3-3 મૂર્તિઓ કરાઇ હતી તૈયાર, ગર્ભગૃહમાં એક જ બિરાજશે, જાણો અન્ય 2નું શું કરાશે?

• અયોધ્યામાં રામ મંદિરના અભિષેકની વિધિ શરૂ, રામલલા આજે તેમના મંદિરમાં પ્રવેશ કરશે
• રામજન્મભૂમિમાં ત્રણ પ્રતિમાઓ સ્થાપિત કરવાની તૈયારી કરવામાં આવી હતી
• બાકીની મૂર્તિ બીજા અને છેલ્લા માળે સ્થાપિત કરવામાં આવશે

Ayodhya Ram Mandir : અયોધ્યામાં રામ મંદિરના અભિષેકની વિધિ શરૂ થઈ ગઈ છે. આ ક્રમમાં ભગવાન રામલલા આજે તેમના મંદિરમાં પ્રવેશ કરશે. રામ લલાની પ્રતિમાને પહેલા રામજન્મભૂમિ પરિસરમાં લઈ જવામાં આવશે. ત્યાર બાદ ગર્ભગૃહને શુદ્ધ કરવામાં આવશે અને ત્યારબાદ આવતીકાલે એટલે કે ગુરુવારે રામલલા ગર્ભગૃહમાં પ્રવેશ કરશે. મહત્વનું છે કે, મૈસુરના શિલ્પકાર અરુણ યોગીરાજ દ્વારા બનાવવામાં આવેલી રામ લલ્લાની મૂર્તિને રામ મંદિરમાં સ્થાપિત કરવા માટે પસંદ કરવામાં આવી છે. જોકે રામજન્મભૂમિમાં ત્રણ પ્રતિમાઓ સ્થાપિત કરવાની તૈયારી કરવામાં આવી હતી, પરંતુ બાકીની બે પ્રતિમાઓનું શું થશે તેવો પ્રશ્ન ઊભો થાય છે. 

શ્રી રામ જન્મભૂમિ તીર્થ ક્ષેત્ર ટ્રસ્ટના મહાસચિવ ચંપત રાયે જણાવ્યું કે, તે બે મૂર્તિઓ પણ મંદિરના પહેલા અને બીજા માળે રાખવામાં આવશે. તેમણે કહ્યું કે રામ મંદિરનો પહેલો માળ તૈયાર થતાં જ શ્રી રામ જન્મભૂમિ તીર્થ ક્ષેત્ર ટ્રસ્ટ અયોધ્યામાં રામ લલ્લાની બાકીની બે મૂર્તિઓમાંથી એકને વૈદિક વિધિ સાથે સ્થાપિત કરશે. આ પછી ડિસેમ્બર 2025 સુધીમાં સમગ્ર મંદિરનું નિર્માણ કાર્ય પૂર્ણ થયા પછી બીજી બાકીની મૂર્તિ બીજા અને છેલ્લા માળે સ્થાપિત કરવામાં આવશે. આ સાથે રાયે કહ્યું, તેમને સિંહાસન પર બેસાડતી વખતે તમામ વિધિઓ પણ કરવામાં આવશે.

ત્રણેય મૂર્તિઓ છે 51 ઈંચ ઉંચી 
નોંધનિય છે કે, અયોધ્યામાં રામ મંદિર માટે ત્રણ શિલ્પકારોએ રામલલાની ત્રણ અલગ-અલગ મૂર્તિઓ કોતરાવી હતી. મંદિર ટ્રસ્ટે 22 જાન્યુઆરીએ રામ મંદિરના ગર્ભગૃહમાં સ્થાપિત કરવા માટે કર્ણાટકના શિલ્પકાર અરુણ યોગીરાજની કાળા પથ્થરની પ્રતિમાની પસંદગી કરી છે. અન્ય બે પ્રતિમાઓમાંથી એક કર્ણાટકના ગણેશ ભટ્ટ દ્વારા કાળા પથ્થરમાંથી અને બીજી રાજસ્થાનના સત્ય નારાયણ પાંડે દ્વારા સફેદ મકરાણા માર્બલમાંથી કોતરવામાં આવી છે. ત્રણેય મૂર્તિઓ 51 ઇંચ ઊંચી છે, જે પાંચ વર્ષ જૂના ભગવાન રામને દર્શાવે છે.

વધુ વાંચો: રામલલાની આરતીમાં થવું છે સહભાગી? તો ઘરે બેઠાં આ રીતે મેળવો ઓનલાઇન પાસ, બસ ફૉલો કરો નીચેના સ્ટેપ્સ

ત્રણેય પ્રતિમાઓ મુંબઈના પ્રખ્યાત કલાકારના સ્કેચ પર આધારિત
મહત્વનું છે કે, રામલલાની ત્રણેય પ્રતિમાઓ મુંબઈના પ્રખ્યાત કલાકાર વાસુદેવ કામથના સ્કેચ પર આધારિત છે. તેમણે શ્રી રામ જન્મભૂમિ તીર્થ ક્ષેત્ર ટ્રસ્ટને રામ લલ્લાના પેન્સિલ સ્કેચ આપ્યા હતા. કર્ણાટકના કરકલા નામના શહેરમાં જન્મેલા કામથ મુંબઈમાં મોટા થયા હતા. કામથ પૌરાણિક અને ઐતિહાસિક વિષયો પર આધારિત તેમના ચિત્રો માટે જાણીતા છે. તેમની રામાયણ શ્રેણીના 28 ચિત્રો વિશ્વભરમાં પ્રખ્યાત છે. નોંધનિય છે કે, વડાપ્રધાન નરેન્દ્ર મોદી 22 જાન્યુઆરીએ રામલલાના અઠવાડિયા સુધી ચાલનારા અભિષેક સમારોહમાં અંતિમ વિધિ કરશે. તે એક અઠવાડિયા સુધી ચાલતા સમારોહના સમાપનને ચિહ્નિત કરીને મેચસ્ટિકના કદની સોનેરી લાકડી વડે દેવતાની આંખો ખોલશે.