નિવેદન / દેવી-દેવતાઓને અંગે વિવાદિત નિવેદન આપનારા નિરંજન સ્વામીએ માગી માફી, કહ્યું આવેશમાં આવી બોલ્યો હતો ભવિષ્યમાં ભૂલ નહીં કરું

• સ્વામીનારાયણ સંપ્રદાયનાં નિરંજન સ્વામીએ માંગી માફી
• જસદણ ખાતે સભામાં દેવતાઓને લઇ આપ્યું હતું વિવાદિત નિવેદન
• ભવિષ્યમાં આવી ભૂલ નહીં થાય તેવી ખાતરી આપું છું: નિરંજન સ્વામી

થોડા સમય પહેલા સાળંગપુર હનુમાનજી મંદિર ખાતે ભીંત ચિત્રોને લઈ વિવાદ સર્જાયો હતો. ત્યારે સ્વામીનારાયણ સંપ્રદાય દ્વારા ભીંત ચિત્રો દૂર કર્યા બાદ વિવાદ માંડ શાંત પડ્યો હતો. જસદણમાં નિરંજન સ્વામીનાં વિવાદિત નિવેદનને લઈ ફરી વિવાદ સર્જાયો છે.  ત્યારે વિવાદ વધે તે પહેલા નિરંજન સ્વામીએ માફી પણ માંગી છે. 

દેવી દેવતાઓ માટે કંઇ બોલાઇ ગયું હોય તો માફી માગુ છું: નિરંજન સ્વામી
સ્વામિનારાયણ સંપ્રદાયનાં નિરંજન સ્વામીએ બે દિવસ પહેલા જસદણ ખાતે સભામાં દેવતાઓને લઈ નિવેદન આપ્યું હતું. નિરંજન સ્વામીનાં નિવેદનને લઈ સંતોમાં રોષ ફાટી નીકળતા વિવાદ વધે તે પહેલા જ નિરંજન સ્વામીએ આજે માફી માંગી હતી. માફી માંગતા નિરંજન સ્વામીએ કહ્યું હતું કે, આવેશમાં આવી કંઈ પણ બોલ્યો હોઉં તો માફી માંગુ છું. દેવી દેવતાઓ માટે કંઈ બોલાઈ ગયું હોય તો માફી માંગુ છું. ભવિષ્યમાં આવી ભૂલ નહી થાય તેવી ખાતરી આપું છું.

નિરંજન સ્વામીએ શું નિવેદન આપ્યું હતું
બે દિવસ પહેલા જસદણ ખાતે બે દિવસ પહેલા સોખડાનાં સ્વામીનું વિવાદાસ્પદ નિવેદન સામે આવ્યું હતું. જેમાં નિરંજન સ્વામીએ પોતાનાં ગુરૂને દેવતાઓથી મહાન ચીતરવા વિવાદિત નિવેદ આપ્યું હતું. ગુરૂ પ્રબોધજીવન રૂમની બહાર નીકળે ત્યારે દેવતાઓ એમનાં દર્શન માટે જુરતા હોય છે. એમનાં દર્શન કરીને આનંદ-પુલકીત થાય છે. એમનાં ઉપર ચંદન ફૂલોની વર્ષા કરે છે. એવું કહી દેવતાઓનું અપમાન કર્યું છે. 

આવાને સજા થવી જોઈએઃ જ્યોર્તિનાથ મહારાજ
જ્યોર્તિનાથ મહારાજે કહ્યું કે, સ્વામિનારાયણ સંપ્રદાયના સંત દ્વારા જે બફાટ કરવામાં આવ્યો છે તે યોગ્ય નથી, બોલનાર અને સંભાળનાર બંને પાપી છે. સનાતન ધર્મને હાનિ પહોંચાડીને તમે શું સાબિત કરવા માંગો છો? તમે સર્વોપરી હોય તો તમારા જ ઝઘડા પહેલા પુરા કરોને, સર્વોપરિતા હોય તો જગત કલ્યાણના બહુ કામ છે. આવાને સજા થવી જોઈએ. આ મામલે આજે તાત્કાલિક જૂનાગઢ ખાતે મિટિંગનું આયોજન કરવામાં આવ્યું છે. આગળની કાર્યવાહી મટિંગ બાદ નક્કી કરવામાં આવશે.