ધસારો / નવા વર્ષ પહેલા દ્વારકાધીશના આશીર્વાદ લેવા ભક્તોનું ઘોડાપૂર, પણ આ વાતનું ખાસ ધ્યાન રાખવા અપીલ

• બેટ-દ્વારકામાં પ્રવાસીનો ધસારો
• ક્રિસમસ મીનિ વેકેસનને પગલે મોટી સંખ્યામાં પ્રવાસી ઉમટ્યા
• બોટમાં લાઈફ જેકેટના નિયમના ઉલ્લંઘનથી ચિંતા

ક્રિસમસ મીનિ વેકેસનને લઈને ગુજરાતના ધાર્મિક અને પ્રવાસન સ્થળોએ માનવ મહેરામણ ઉમટી રહ્યો છે. આ દિવસોમાં દેશ, વિદેશમાં ખ્યાતનામ દ્વારકા ખાતે પણ શ્રધ્ધાળુઓનો સાગર છલકાઈ રહ્યો છે. દેશના વિવિધ ભાગમાંથી મોટી સંખ્યામાં પ્રવાસીઓ બેટ દ્વારકા દર્શન કરવા આવી રહ્યા છે. ઓખા જેટીથી બોટ મારફતે પ્રવાસીઓ બેટ દ્વારકા જતા હોવાથી આ વ્યવસાય સાથે સંકળાયેલ લોકોને પણ સારી એવી આવક થઈ રહી છે. જોકે મોરબીમાં પુલ તૂટવાની દુર્ઘટના બન્યા બાદ ઓખાથી બેટ દ્વારકા જતી બોટમાં કેપેસિટી અનુસાર પ્રવાસીઓને બેસાડવામાં આવે છે. નોંધનીય છે કે ઓખાથી બેટ દ્વારકા જતા પ્રવાસીઓએ લાઈફ જેકેટ પહેરવું ફરજિયાત હોય છે. આમ છતાં મોટા ભાગના પ્રવાસીઓને લાઈફ જેકેટ પહેરવાનું ટાળે છે.

બેટ-દ્વારકામાં હાલ યાત્રિકોની ભારે ભીડ ઉમટી

યાત્રાધામ દ્વારકાના ટાપુ એવા બેટ-દ્વારકામાં હાલ યાત્રિકોની ભારે ભીડ ઉમટી છે. બેટ-દ્વારકામાં યાત્રિકો ફેરી બોટ મારફતે દ્વારકાધીશના દર્શને જઈ રહ્યા છે. બેટ દ્વારકા જવા માટે ઓખા જેટીએ યાત્રિકો ફેરી બોટનો ઉપયોગ કરી રહ્યા છે.  પહેલા બોટોમાં કેપેસીટી કરતા વધારે પેસેન્જર બેસાડવા મામલે યાત્રિકોના જીવ જોખમાય તેવી સ્થિતી હતી. પરંતુ હાલ મોરબી પુલ દુર્ઘટના બાદ તંત્ર જાગ્યુ અને GMB દ્વારા ફેરી બોટો વિરુદ્ધ કડક પગલા લઇ કેપેસીટી મુજબ પેસેન્જર બેસાડવાની સ્પષ્ટ સૂચના અપાયા બાદ હાલ યાત્રિકોને મર્યાદિત સંખ્યામાં બેસાડવામાં આવી રહ્યા છે.

લાઈફ જેકેટ પ્રત્યે યાત્રિકોમાં ઉદાસીનતા

બેટ-દ્વારકા જાવા માટે ફેરી બોટ એક માત્ર રસ્તો હોય દરિયાઈ માર્ગે અહીં ફેરી બોટ મારફતે યાત્રિકો બેટ દ્વારકા જતા હોય છે ત્યારે અહીં ફેરી બોટોમાં ફરજીયાત લાઈફ જેકેટ પણ બોટ માલિકોને પહેરાવાની સૂચના અપાઈ છે છતા યાત્રિકો આ મુદ્દે ઉદાસીનતા દાખવતા નજરે પડ્યા હતા. હાલ યાત્રિકોની ભારે ભીડ ઉમટતી હોય પોલીસ તંત્ર દ્વારા પણ અહીં યાત્રિકોની સુરક્ષાને લઇ ખડે પગે ફરજ બજાવવામાં આવી રહી છે.બેટ દ્વારકામાં યાત્રિકો ફેરી બોટ મારફતે દરિયાઈ માર્ગે પ્રવાસનો આનંદ માણતા હોય છે. જેને લઈને આ વ્યવસાય સાથે સંકળાયેલા લોકોના પરિવારનું પણ ગુજરાન ચાલી રહ્યું છે. બોટ સાથે પક્ષીઓ પણ પ્રવાસીઓને મનોરંજન પૂરું પાડી રહ્યા છે. જેને લઈને યાત્રિકો બોટોમા નાચતા ઝૂમતા પ્રવાસને યાદગાર બનાવે છે.