- ભારત-પાકિસ્તાન વચ્ચે આજે મહામુકાબલો
- દિવાળી પહેલા અમદાવાદમાં દિવાળી જેવો માહોલ
- નરેન્દ્ર મોદી સ્ટેડિયમ પોલીસ છાવણીમાં ફેરવાયું
INDvsPAK Match: અમદાવાદમાં આજે ભારત અને પાકિસ્તાન વચ્ચે વર્લ્ડ કપનો મહાજંગ શરૂ થઈ ગયો છે. ત્યારે અમદાવાદ આખું આજે ક્રિકેટના રંગે રંગાયું છે, નરેન્દ્ર મોદી સ્ટેડિયમ બહાર અને અંદર જબરદસ્ત માહોલ જામ્યો છે. સ્ટેડિયમ બહાર ક્રિકેટરસિકોના ટોળેટોળાં ઊમટી પડ્યાં છે. ‘ઈન્ડિયા... ઇન્ડિયા...’ના નારા લગાવી લોકો ભારતની ટીમને સપોર્ટ કરી રહ્યા છે. બીજી બાજુ નરેન્દ્ર મોદી સ્ટેડિયમ આખું પોલીસ છાવણીમાં ફેરવાયું છે. સ્ટેડિયમના તમામ એન્ટ્રીગેટ પર સઘન તપાસ કરવામાં આવી રહી છે. જેમાં સૌથી વધારે VVIP લોકોના એન્ટ્રીગેટ પર સઘન તપાસ કરવામાં આવી રહી છે. થ્રી લેયર ચેકિંગ બાદ બેગનું સ્ક્રેનિંગ કરીને પ્રવેશ આપવામાં આવી રહ્યો છે. ડ્રોન દ્વારા સતત સર્વેલન્સ કરવામાં આવી રહ્યું છે.
નરેન્દ્ર મોદી સ્ટેડિયમમાં આજે રચાશે વિશ્વવિક્રમ
ભારત-પાકિસ્તાનની મેચને લઈને પૂર્વ ક્રિકેટરો, અભિનેતાઓ, સંગીતકારો પણ સ્ટેડિયમ ખાતે પહોંચ્યા છે. સિંગર નેહા કક્કડ, દર્શન ઠાકર સ્ટેડિયમમાં પહોંચ્યા છે. જ્યારે અભિનેતા મનોજ જોષી પણ મેચ નિહાળવા માટે સ્ટેડિયમ ખાતે પહોંચી ગયા છે. આજે અમદાવાદના નરેન્દ્ર મોદી સ્ટેડિયમમાં વિશ્વવિક્રમ રચાશે. સ્ટેડિયમમાં 1.32 લાખ પ્રેક્ષકોને પ્લે કાર્ડ આપવામાં આવશે. ગુલાબી રંગના પ્લે કાર્ડ આપીને રેકોર્ડ બનાવાશે.
અફવાઓ પર દર્શકો ધ્યાન ન આપોઃ DCP કોમલ વ્યાસ
મેચને લઈને અમદાવાદ પોલીસ દ્વારા લોકોને કરાઇ અપીલ કરવામાં આવી છે. DCP કંટ્રોલ કોમલ વ્યાસે વીડિયો શેર કરીને અપીલ કરી છે. તેઓએ જણાવ્યું કે, દર્શકો આજે મેચનો આનંદ માણે, પોલીસ તમામ પ્રકારે સુરક્ષા માટે તૈનાત છે. કોઇ પણ પ્રકારની અફવાઓ પર દર્શકો ધ્યાન ન આપો. આજે મેચ છે ત્યારે શહેરીજનો મેચનો આનંદ માણે.
અમિતાભ બચ્ચનના હમશકલ પહોંચ્યા સ્ટેડિયમમાં
આજે ભારત-પાકિસ્તાન વચ્ચે મેચ જોવા માટે અમિતાભ બચ્ચનના હમશકલ ભાવનગરના પિનાકિન ગોહિલ પણ સ્ટેડિયમ ખાતે પહોંચ્યા છે. અમિતાભ બચ્ચનને મળ્યા બાદ સ્ટેડિયમ ખાતે પહોંચશે. આ ઉપરાંત વિરાટ કોહલીના હમશકલ પણ સ્ટેડિયમ ખાતે પહોંચ્યા છે.
