BIG BREAKING / કાલાવડ-જામનગર હાઇવે પર મોટો અકસ્માત: ત્રણ લોકોના ઘટનાસ્થળે જ મોત, 2 ગંભીર રીતે ઇજાગ્રસ્ત

• કાલાવડ-જામનગર હાઇવે પર અકસ્માત
• મોટી માટલી ગામ પાસે કાર અને ટ્રેકટર વચ્ચે અકસ્માત
• 3 લોકોના ઘટના સ્થળે મોત અને 2 ગંભીર રીતે ઘાયલ 

Jamnagar Accident News: રાજ્યમાં અવારનવાર અનેક અકસ્માતના બનાવો સામે આવતા હોય છે. ત્યારે આવો જ એક ગમખ્વાર અકસ્માતનો બનાવ જામનગર પાસે બનતા ચકચાર મચી જવા પામી છે. કાલાવડ-જામનગર હાઈવે પર ભયાનક અકસ્માત સર્જાતા 3 લોકોના કમકમાટીભર્યા મોત નિપજ્યા છે, જ્યારે 2 લોકો ગંભીર રીતે ઈજાગ્રસ્ત થયા છે. ઈજાગ્રસ્તોને સારવાર અર્થે હોસ્પિટલમાં ખસેડવામાં આવ્યા છે.

કાર અને ટ્રેક્ટર વચ્ચે ભયાનક અકસ્માત
મળતી માહિતી અનુસાર, કાલાવડ-જામનગર હાઇવે પર મોટી માટલી ગામ પાસે ઈકો કાર અને ટ્રેક્ટર વચ્ચે ભયાનક અકસ્માત સર્જાયો હતો. આ અકસ્માતને પગલે રાહદારીઓના ટોળે ટોળા ઘટના સ્થળે એકઠા થઈ ગયા હતા. તો અકસ્માતની જાણ થતાં જ મોટી માટલી ગામના સરપંચ સહિત ગ્રામજનો પણ ઘટના સ્થળે દોડી આવ્યા હતા અને તાત્કાલિક બચાવ કામગીરી હાથ ધરી હતી. 

3 લોકોના ઘટના સ્થળે જ મોત 
સ્થાનિકો દ્વારા આ અંગેની જાણ પોલીસને કરવામાં આવતા પોલીસની ટીમ પણ ઘટના સ્થળે દોડી આવી હતી. આ અકસ્માત એટલો ભયાનક હતો કે કારમાં સવાર ત્રણ લોકોના ઘટના સ્થળે જ કરૂણ મોત નિપજ્યાં હતા. જ્યારે ગંભીર રીતે ઈજાગ્રસ્ત થયેલા 2 લોકોને તાત્કાલિક 108 એમ્બ્યુલન્સ મારફતે જી.જી હોસ્પિટલ ખાતે ખસેડ્યા હતા. 

2 ઈજાગ્રસ્તોને જી.જી.હોસ્પિટલ ખાતે ખસેડાયા
કાલાવડ-જામનગર હાઇવે પર કાર અને ટ્રેક્ટર વચ્ચે સર્જાયેલી આ દુર્ઘટનામાં 2 મહિલા અને 1 પુરુષનું મૃત્યુ થયું છે. પોલીસની પ્રાથમિક તપાસમાં મૃતક મુસ્લિમ પરિવાર જામનગરનો રહેવાસી હોવાનું સામે આવ્યું છે. જ્યારે ઇજાગ્રસ્તોની સારવાર માટે જી.જી હોસ્પિટલ ખાતે ચાલી રહી છે.