વિવાદ / એક્સિડેન્ટમાં ડૉક્ટરનું મોત અને આનંદ મહિન્દ્રા પર FIR! હવે કંપનીએ બતાવ્યું કેમ નહોતા ખૂલ્યા Scorpio ના એરબેગ

• 2022માં પીડિતનાં પુત્રનું રોડ એક્સિડેન્ટમાં થયું હતું મોત
• પીડિત રાજેશે આનંદ મહિન્દ્રા સહિત 13 લોકો પર કર્યો કેસ
• કહ્યું ગાડીમાં એરબેગ અકસ્માત સમયે ખુલતી નથી
• મહિન્દ્રા એન્ડ મહિન્દ્રાએ આપ્યો આ મુદે જવાબ

ઉત્તરપ્રદેશનાં કાનપુરમાં થોડા દિવસો પહેલાં એક વ્યક્તિએ મહિન્દ્રા એન્ડ મહિન્દ્રા ગ્રુપનાં ચેરમેન આનંદ મહિન્દ્રા સહિત 13 લોકોની સામે FIR કરી હતી. એ વ્યક્તિએ કહ્યું કે તેણે પોતાના દીકરાને MAHINDRA SCORPIO ગિફ્ટ કરી હતી અને જાન્યુઆરી 2022માં રોડ એક્સિડેન્ટમાં તેના દીકરાનું મોત થઈ ગયું. આ મામલામાં તેણે આનંદ મહિન્દ્રાની કંપનીનાં 12 અન્ય કર્મચારીઓની સામે આરોપ મૂક્યો હતો જેને લઈને મહિન્દ્રા તરફથી સત્તાવાર નિવેદન સામે આવ્યું છે.

કંપનીએ શું કહ્યું?
આ મામલા અંગે મહિન્દ્રા એન્ડ મહિન્દ્રાનાં એક સત્તાવાર નિવેદનમાં કહેવામાં આવ્યું છે કે આ મામલો 18 મહિનાથી પણ જૂનો છે અને આ રિપોર્ટ કરેલી ઘટના 2022 જાન્યુઆરીમાં થઈ હતી. વાહનમાં એરબેગ ન હોવાનાં આરોપ પર ટિપ્પણી કરતાં કંપનીએ કહ્યું કે અમે સ્પષ્ટરૂપે જણાવવા ઈચ્છીએ છીએ કે 2020માં નિર્મિત સ્કોર્પિયો S9 વેરિન્ટમાં એરબેગ હતાં.  કંપનીએ કહ્યું કે આ મામલાની તપાસ તેમણે કરી છે અને એરબેગમાં કોઈ ખરાબી મળી આવી નથી.

રોલઓવર કેસ
કંપનીએ કહ્યું કે આ એક રોલઓવર કેસ હતો જેના લીધે ફ્રંટ એરબેગ ડિપ્લોય ખુલતો નથી. કંપનીએ એવું પણ કહ્યું કે આ ઘટનામાં મહિન્દ્રા એન્ડ મહિન્દ્રાએ ઑક્ટોબર 2022માં વિસ્તૃત ટેકનિકલ તપાસ કરી હતી. તેમણે કહ્યું કે આ મામલો વર્તમાનમાં વિચારાધીન છે અને તેઓ કોઈપણ આગળની તપાસ માટે અધિકારીઓની સાથે સાથ-સહયોગ આપવા માટે પ્રતિબદ્ધ છે.

રોલઓવર એટલે શું ?
રોલઓવર એક્સિડેન્ટમાં કાર અકસ્માત સમયે કોઈપણ ઓબજેક્ટ કે વાહન સાથે અથડાઈને રોડ પર ઊથલા મારતી આગળ જાય છે. 

શું છે સમગ્ર મામલો?
પોલીસ અનુસાર પીડિત રાજેશે પોતાની ફરિયાદમાં જણાવ્યું કે તેમણે પોતાના એકમાત્ર પુત્ર અપૂર્વ મિશ્રાને સ્કોર્પિયો ગાડી ગિફ્ટ કરી હતી.  અપૂર્વ આ ગાડીથી 14 જાન્યુઆરી 2022નાં પોતાના મિત્રો સાથે લખનઉથી કાનપુર પાછો આવી રહ્યો હતો. એ વખતે ધુમ્મસનાં કારણે તેની ગાડી ડિવાઈડરથી અથડાઈ ગઈ જેમાં અપૂર્વનું મોત થયું. પીડિતે આરોપ લગાડ્યો કે સીટ બેલ્ટ પહેર્યો હોવા છતાં એરબેગ ન ખુલી. રાજેશે કહ્યું કે જો ગાડી યોગ્ય રીતે તપાસવામાં આવી હોત તો તેના પુત્રનું મોત ન થયું હોત.