2024ની લોકસભાની ચૂંટણી માટે અનેક નેતાઓ અત્યારથી જ કવાયતમાં લાગી ગયા છે. વાત જાણે એમ છે કે, ગત વિધાનસભાની ચૂંટણીમાં પત્તું કપાયા બાદ ફરી એકવાર પૂર્વ ધારાસભ્ય મધુ શ્રીવાસ્તવનું મોટું નિવેદન સામે આવ્યું છે. વડોદરામાં પૂર્વ ધારાસભ્ય મધુ શ્રીવાસ્તવે વડોદરા સાંસદ પર વિધાનસભાની ટિકિટ કાપી હોવાનો આરોપ લગાવ્યો છે. આ સાથે 2024ની લોકસભા ચૂંટણીમાં વિરોધ કરશે તેવું પણ જણાવ્યું છે.
ગત વિધાનસભાની ચૂંટણીમાં ભાજપે અનેક દિગ્ગજ નેતાઓની ટિકિટ કાપી હતી. જેમાં ભાજપના પૂર્વ ધારાસભ્ય મધુ શ્રીવાસ્તવે ફરી એકવાર મોટો બફાટ કર્યો છે. વિગતો મુજબ વિધાનસભા ચુંટણી 2023માં વાઘોડિયા બેઠક પરથી મધુ શ્રીવાસ્તવની ટિકિટ કપાયા બાદ હવે ફરી એક વાર મધુ શ્રીવાસ્તવ ચર્ચામાં આવ્યા છે. મધુ શ્રીવાસ્તવે કહ્યું છે કે, વિધાનસભા ચૂંટણીમાં ઉપરથી મારી ટિકિટ નક્કી જ હતી પણ સંસદસભ્યએ મારી ટિકિટ કાપી હતી. જેથી 2024ની લોકસભાની ચૂંટણીમાં હું વિરોધ કરીશ તેમાં શંકાને કોઈ સ્થાન નથી.
શું છે સમગ્ર મામલો ?
વાઘોડીયાથી છેલ્લા 6 ટર્મથી ધારાસભ્ય તરીકે ચૂંટાઈ આવતા અને બાહુબલી નેતાની છાપ ધરાવતા મધુ શ્રીવાસ્તવની જગ્યાએ અશ્વિન પટેલને ટિકિટ આપવામાં આવી હતી તે સમયે પણ મધુ શ્રીવાસ્તવ લાલઘૂમ બન્યા હતા. આ દરમિયાન આજે હવે મધુ શ્રીવાસ્તવે વડોદરા સાંસદે તેમની ટિકિટ કાપી હોવાનો આરોપ લગાવ્યો છે.
શું કહ્યું મધુ શ્રીવાસ્તવે ?
વાઘોડિયાના પૂર્વ ધારાસભ્ય મધુ શ્રીવાસ્તવે જણાવ્યું હતું કે, હું વર્ષોથી ભારતીય જનતા પાર્ટીમાં છું, અને ભારતીય જનતા પાર્ટીના પ્રોગ્રામ હોય તો ચોક્કસપણે અભિનંદન પાઠવીએ છીએ. પણ હું નહિ જતો, કારણ કે, વડોદરાના સંસદસભ્ય અને જે આ લોકોએ મારી ટિકિટ કાપી, ટિકિટ આપવાનું નક્કી હતું ઉપરથી પણ ટિકિટ કાપી છે. પણ આવનારી 2024ની લોકસભા ચૂંટણીમાં જેને મારી ટિકિટ કાપી એના માટે હું ખુલ્લેઆમ વિરોધમાં જવાનો છું એમા કોઈ શંકાને સ્થાન નથી.
ચૂંટણી સમયે પણ વિવાદમાં આવ્યા હતા મધુ શ્રીવાસ્તવ
વિગતો મુજબ વિધાનસભાની ચૂંટણી દરમિયાન વાઘોડિયામાં મધુ શ્રીવાસ્તવે અપક્ષ ઉમેદવારી નોંધાવી હતી. આ દમરિયાં પણ દબંગ ધારાસભ્યની છાપ ધરાવતા મધુ શ્રીવાસ્તવએ વિવાદિત નિવેદન આપ્યું હતું. તેમણે કહ્યું હતું કે, મારા કાર્યકરની કોઈ કોલર પકડશે તો ઘરમાં જઈ ગોળી મારી દઈશ તેવું નિવેદન આપ્યું હતું. જેને લઇને વિરોધનો સૂર ઉઠ્યો હતો. જે બાદમાં મધુ શ્રીવાસ્તવના ધમકીભર્યા નિવેદનને લઇને ચૂંટણી પંચ એક્શનમાં આવ્યું હતું અને વાઘોડિયા ચૂંટણી અધિકારી પાસે અહેવાલ મંગાવ્યો હતો.
