લોકસભા ચૂંટણી 2024 / શું રાહુલ-પ્રિયંકા અમેઠી-રાયબરેલીથી ચૂંટણી લડશે? ખડગેએ કરી સ્પષ્ટતા, કહ્યું 'એ અમારી રણનીતિ'

લોકસભા ચૂંટણી 2024નું મતદાન સાત તબક્કામાં થશે અને અત્યાર સુધી બે તબક્કામાં મતદાન થઈ ચૂક્યું છે. હવે ત્રીજા તબક્કાનું મતદાન સાત મેના રોજ થશે. એવામાં આજે કોંગ્રેસની કેન્દ્રીય ચૂંટણી સમિતિની બેઠક મળવા જઈ રહી છે, જેમાં અમેઠી અને રાયબરેલી સહિત ઘણી બેઠકો પર વિચાર મંથન થશે.

કોંગ્રેસ અમેઠી અને રાયબરેલીથી ઉમેદવારોની જાહેરાત કરી શકે

રિપોર્ટ અનુસાર આ બેઠક આજે રાત્રે 8 વાગ્યે થશે અને એ બાદ કોંગ્રેસ કેન્દ્રીય ચૂંટણી સમિતિ કોંગ્રેસ અમેઠી અને રાયબરેલીથી પોતાના ઉમેદવારોની જાહેરાત કરી શકે છે. જાણીતું છે કે લોકસભા ચૂંટણીના બે તબક્કાનું મતદાન પૂર્ણ થઈ ગયું છે અને કોંગ્રેસે હજુ સુધી આ બે બેઠકો પરથી પોતાના ઉમેદવારોના નામની જાહેરાત કરી નથી.

સોનિયા ગાંધીએ લોકસભા ચૂંટણી ન લડવાનો નિર્ણય કર્યો

સૂત્રો અનુસાર એવું પણ કહેવાય રહ્યું છે કે અમેઠીથી ફરી એક વખત રાહુલ ગાંધી અને રાયબરેલીથી ફરી એક વખત પ્રિયંકા ગાંધી ઉમેદવાર બની શકે તેના પર વિચાર ચાલી રહ્યો છે. જાણીતું છે કે સોનિયા ગાંધી 2004થી રાયબરેલીથી કોંગ્રેસ સાંસદ રહ્યા છે પણ આ વખતે એમને લોકસભા ચૂંટણી ન લડવાનો નિર્ણય કર્યો છે. આ બાદ પાર્ટીએ એમને રાજસ્થાનથી રાજ્યસભામાં મોકલ્યા છે.

આ અમારી રણનીતિનો એક ભાગ છે..- ખડગે

એવામાં એક વાતચીત દરમિયાન કોંગ્રેસ પાર્ટી પ્રમુખ મલ્લિકાર્જુન ખડગેએ રાહુલ અને પ્રિયંકાના અનુક્રમે અમેઠી-રાયબરેલીથી ચૂંટણી લડવાના મુદ્દે કહ્યું કે, 'અમે તમને નોમિનેશન સમયે જ તમને તેના વિશે જણાવીશું, આ અમારી રણનીતિનો એક ભાગ છે.'

વધુ વાંચો: મણિપુરમાં મોડી રાત્રે કુકી આતંકવાદીઓએ CRPF બટાલિયન પર કર્યો હુમલો, બે જવાન શહીદ

2019ની ચૂંટણીમાં રાહુલ ગાંધી ભાજપના સ્મૃતિ ઈરાની સામે હાર્યા હતા

નોંધનીય છે કે રાહુલ ગાંધી 2004 થી 2019 સુધી અમેઠીથી લોકસભાના સભ્ય હતા અને 2019ની લોકસભા ચૂંટણીમાં તેમને ભાજપના સ્મૃતિ ઈરાની સામે હારનો સામનો કરવો પડ્યો હતો. જો કે હાલ એવી અટકળો છે કે રાહુલ ગાંધી અને પ્રિયંકા ગાંધી વાડ્રા આ જ બેઠકો પરથી ચૂંટણી લડી શકે છે પણ પાર્ટી તરફથી હજુ સુધી કોઈ પુષ્ટિ કરવામાં આવી નથી.