હાલ ક્રિકેટનો તહેવાર એટલે કે આઈપીએલ 2024 ચાલી રહ્યો છે અને ગઇકાલે IPL 2024 ની 42મી મેચમાં, પંજાબ કિંગ્સ (PBKS) એ કોલકાતા નાઈટ રાઈડર્સ (KKR) ને 8 વિકેટે હરાવીને તેમની ત્રીજી જીત નોંધાવી હતી.
આઈપીએલ તો શું ટી20 ક્રિકેટની હિસ્ટ્રીમાં પણ નથી થયું આવું
ઈડન ગાર્ડન સ્ટેડિયમમાં રમાયેલી મેચમાં KKRએ પ્રથમ બેટિંગ કરીને 261 નો જંગી સ્કોર બનાવ્યો હતો. જવાબમાં પંજાબ કિંગ્સની ટીમે જોની બેયરસ્ટોની સદી (108*)ની મદદથી 18.4 ઓવરમાં લક્ષ્યાંક હાંસલ કરી લીધો હતો. આ સાથે જ ઈડન ગાર્ડન સ્ટેડિયમમાં એવો રેકોર્ડ નોંધાયો જે આજ સુધી આઈપીએલ તો શું ટી20 ક્રિકેટની હિસ્ટ્રીમાં નહતું થયું.
ટી20ના ઈતિહાસમાં સૌથી મોટો રન ચેઝ
કોલકાતા નાઈટ રાઈડર્સ અને પંજાબ કિંગ્સ વચ્ચેની આ મેચમાં આઈપીએલની સાથે ટી20ના ઈતિહાસમાં સૌથી મોટો રન ચેઝ થયો હતો. પંજાબ કિંગ્સે આ રન ચેઝ સાથે સાઉથ આફ્રિકાનો રેકોર્ડ પણ તોડી નાખ્યો હતો. જાણીતું છે કે આફ્રિકન ટીમે 2023માં સેન્ચુરિયનમાં વેસ્ટ ઈન્ડિઝ સામેની મેચમાં 259 રન બનાવીને જીત મેળવી હતી. 2023માં જ, મિડલસેક્સે ટી20 બ્લાસ્ટ ટૂર્નામેન્ટમાં 253 રન બનાવીને સરે સામેની મેચ જીતી હતી. 2018માં ઓકલેન્ડમાં ઓસ્ટ્રેલિયાએ ન્યૂઝીલેન્ડ સામે 244 રન બનાવીને મેચ જીતી હતી.
કુલ 523 રન T20માં બીજો મોટો મેચ સ્કોર
15 એપ્રિલે બેંગલુરુમાં RCB અને સનરાઈઝર્સ હૈદરાબાદ વચ્ચેની મેચમાં બનાવેલા 549 રન પછી શુક્રવારે ઈડન ગાર્ડન્સમાં KKR અને પંજાબ કિંગ્સ દ્વારા બનાવવામાં આવેલ કુલ 523 રન T20માં બીજો મોટો મેચ સ્કોર છે. જાણીતું છે કે 27 માર્ચના રોજ મુંબઈ અને SRH વચ્ચેની મેચમાં, કુલ 523 રન બન્યા હતા.
પંજાબ કિંગ્સે 24 સિક્સર ફટકારી
પંજાબ કિંગ્સે એમની ઇનિંગમાં 24 સિક્સર ફટકારી હતી, જે IPLમાં કોઈપણ ટીમ દ્વારા ફટકારવામાં આવેલી આ સૌથી વધુ સિક્સર છે. આ સાથે જ કોલકાતા અને પંજાબના બેટ્સમેનોએ મળીને મેચમાં 42 સિક્સર ફટકારી હતી. જે મેન્સ T20 ઈતિહાસમાં સૌથી વધુ છગ્ગા છે.
આ પહેલા આઈપીએલની આ જ સિઝનમાં સનરાઈઝર્સ અને મુંબઈ ઈન્ડિયન્સ વચ્ચે રમાયેલી મેચ દરમિયાન 38 સિક્સર ફટકારવામાં આવી હતી. આરસીબી અને સનરાઇઝર્સ વચ્ચેની મેચમાં 38 સિક્સર પણ ફટકારવામાં આવી હતી.
