તપાસનો ધમધમાટ / ખેડા સીરપ કાંડ: મૃત્યુઆંક 6એ પહોંચ્યો, કરાઇ SITની રચના, મૃતકોના પોસ્ટમોર્ટમ ન કરનાર હોસ્પિટલોને નોટિસ

• ખેડા સીરપ કાંડમાં મૃત્યુઆંક 6એ પહોંચ્યો
• મૃતકોના પોસ્ટમોર્ટમ ન કરવા બદલ 2 હોસ્પિટલોને નોટિસ 
• 2 વ્યક્તિઓ અમદાવાદ સિવિલ હોસ્પિટલમાં સારવાર હેઠળ 
• 6 વ્યક્તિઓનાં મોત બાદ SITની રચના 
• વધુ એક વ્યક્તિને નશાકારક સિરપની અસર

Kheda Syrup Scandal News : ખેડા સીરપ કાંડમાં હવે તપાસ જેમ જેમ તેજ બની રહી છે તેમ તેમ નવી અપડેટ સામે આવી રહી છે. આ તરફ હવે મૃતકોના પોસ્ટમોર્ટમ ન કરવા બદલ 2 હોસ્પિટલોને નોટિસ આપવામાં આવી છે તો સિરપકાંડમાં સત્તાવાર મૃત્યુઆંક 6 ઉપર પહોંચ્યો છે. ખેડા જિલ્લા પોલીસ દ્વારા સત્તાવાર માહિતી આપતા મૃત્યુઆંકમાં વધારો થયો છે. આ તરફ નશીલા સિરપકાંડ મામલે 6 વ્યક્તિઓનાં મોત બાદ SITની રચના કરાઇ છે. આ બધાની વચ્ચે ખેડામાં વધુ એક વ્યક્તિને નશાકારક સિરપની અસર થઈ છે. જેને લઈ અસરગ્રસ્ત વ્યક્તિને અમદાવાદ સિવિલમાં ખસેડાયા છે. આ તરફ રાજ્યભરમાં આવી સિરપનું વેચાણ કરતાં સામે પણ કાર્યવાહી તેજ બની છે. 

પોસ્ટમોર્ટમ ન કરવા બદલ 2 હોસ્પિટલોને નોટિસ 
ખેડા જિલ્લાના નડિયાદના બિલોદરામાં પાંચ વ્યકિતના નશાકારક સીરપ પીવાથી મોત થવા મામલે હવે જિલ્લા આરોગ્ય અધિકારીનું નિવેદન સામે આવ્યુ છે. જિલ્લા આરોગ્ય અધિકારીએ કહ્યું કે, અત્યાર સુધીમાં બંને ગામમાં તપાસ કરવામાં આવી છે. જે મૃત્યુ પામ્યા છે તે પ્રકારના લક્ષણો વાળું કોઈ અન્ય વ્યક્તિ મળી આવ્યું નથી. આ સાથે ખાનગી હોસ્પીટલમાં સારવારમાં લઇ જવાયા હતા ત્યા પીએમ થયેલ નથી. જેને લઈ પોસ્ટમોર્ટમ ન કરવા બદલ બંને હોસ્પિટલોને નોટિસ આપવામાં આવી છે. 

2 વ્યક્તિઓ અમદાવાદ સિવિલ હોસ્પિટલમાં સારવાર હેઠળ 
નશાકારક સિરપથી 5 વ્યક્તિઓનાં મોત બાદ મૃતકોના પોસ્ટમોર્ટમ ન કરાતાં 2 હોસ્પિટલને નોટિસ અપાઈ છે. આ સાથે પોલીસે સિરપ લેનાર વ્યક્તિઓનું લિસ્ટ બનાવી તપાસ હાથ ધરી છે. આ તરફ હવેખેડા જિલ્લામાં પોલીસ અને આરોગ્ય વિભાગની તપાસનો ધમધમાટ પણ શરૂ થઈ ગયો છે. 2 વ્યક્તિઓ અમદાવાદ સિવિલ હોસ્પિટલમાં સારવાર હેઠળ છે. જેમાં બિલોદરા ગામના અમિત સોઢા અને સાંકળભાઇ સોઢાની હાલત ગંભીર હોવાનું સામે આવ્યું છે.

સીરપ કાંડમાં મોતનો આકડો વધ્યો 
ખેડા નશાકારક સીરપ કાંડમાં મોતનો આકડો વધ્યો હોવાનું સામે આવ્યું છે. અત્યાર સુધી 5 લોકોના મોત બાદ હવે વધુ એક વ્યક્તિનું મોત થયાની પોલીસે પુષ્ટિ કરી છે. સિરપકાંડમાં સત્તાવાર મૃત્યુઆંક 6 ઉપર પહોંચ્યો છે. ખેડા જિલ્લા પોલીસ દ્વારા સત્તાવાર માહિતી આપતા મૃત્યુઆંકમાં વધારો થયો છે. આ તરફ હવે ખેડા જિલ્લા પોલીસ દ્વારા સોશિયલ મીડિયામાં અપીલ કરવામાં આવી છે. આયુર્વેદિક સિરપના સેવનથી મૃત્યુઆંક વધવાની શક્યતા છે.

6 વ્યક્તિઓનાં મોત બાદ SITની રચના 
આ તરફ નશીલા સિરપકાંડ મામલે 6 વ્યક્તિઓનાં મોત બાદ SITની રચના  કરાઇ છે. ખેડા પોલીસે 4 અધિકારીઓની SITની રચના કરી છે. વિગતો  મુજબ નડિયાદ ડિવિઝનના DySP વી. આર. બાજપાઇને SITના અધ્યક્ષ બનાવાયા છે. SOG અને નડિયાદ ગ્રામ્ય પોલીસ સ્ટેશનના PI SITના સભ્ય છે. આ સાથે મહેમદાવાદના PSIને પણ સીટની તપાસમાં સામેલ કરાયા છે. મહત્વનું છે કે, કેસની તપાસ SOG PI અને નડિયાદ ગ્રામ્ય પોલીસ મથકના ઇન્ચાર્જ PI કરી રહ્યા છે.

વધુ એક વ્યક્તિને નશાકારક સિરપની અસર
ખેડામાં વધુ એક વ્યક્તિને નશાકારક સિરપની અસર થઈ છે. અસરગ્રસ્ત વ્યક્તિને અમદાવાદ સિવિલમાં ખસેડાયા છે. વિગતો મુજબ ઊલટી થયા બાદ આંખોથી દેખાવાનું બંધ થયું હતું. જેને લઈ પ્રથમનડિયાદની ખાનગી હોસ્પિટલમાં સારવાર માટે લવાયા હતા જે બાદમાં પોલીસને જાણ થતા વધુ સારવાર માટે અમદાવાદ ખસેડ્યા છે. હાલ 2 વ્યક્તિ અમદાવાદ સિવિલમાં સારવાર હેઠળ છે. જેમાં 35 વર્ષીય અમિત સોઢા, 72 વર્ષીય સાંકળ સોઢાની હાલત ગંભીર છે. ખેડા જિલ્લા પોલીસે અન્ય અસરગ્રસ્તોની તપાસ હાથ ધરી તો સિરપ લેનાર વ્યક્તિઓનું લિસ્ટ બનાવીને પણ તપાસ હાથ ધરાઇ છે.