વ્યાજદર / આરબીઆઇ કમિટીની બેઠકમાં લેવાઇ શકે છે આ મહત્વનો નિર્ણય

આજથી નવા નાણાકીય વર્ષમાં આરબીઆઇ પોલિસી કમિટીની પ્રથમ બેઠક યોજાઇ રહી છે. રિઝર્વ બેન્ક ઓફ ઇન્ડિયા ૨થી ૪ એપ્રિલ દરમિયાન યોજાનારી મોનેટરી પોલિસી રિવ્યૂ કમિટીની બેઠકમાં મુખ્ય નીતિગત વ્યાજદરમાં ૦.૨૫ ટકાનો ઘટાડો કરી શકે છે. ગુરુવારે આરબીઆઇની પોલિસીની જાહેરાત કરવામાં આવશે. 

નિષ્ણાતોનું કહેવું છે કે આરબીઆઇની પોલિસી કમિટીની કોશિશ વૈશ્વિક મંદીના કારણે ડોમેસ્ટિક ગ્રોથ પર પ્રભાવ પડવાની આશંકા વચ્ચે આર્થિક પ્રવૃત્તિઓને પ્રોત્સાહિત કરવાની રહેશે. છ સભ્યોની મોનેટરી પોલિસી કમિટીની બેઠક આરબીઆઇના ગવર્નર શક્તિકાંત દાસના નેતૃત્વમાં યોજાશે.

અત્રે ઉલ્લેખનીય છે કે આરબીઆઇએ ૭ ફેબ્રુઆરી, ૨૦૧૯ના રોજ મુખ્ય નીતિગત વ્યાજદર રેપો રેટને ૦.૨૫ ટકા ઘટાડીને ૬.૨૫ ટકા કર્યો હતો. ૧૮ મહિનાના સમયગાળા બાદ રેપો રેટમાં ઘટાડો કરાયો હતો. હવે ફરીથી રેપો રેટમાં ઘટાડો કરવાથી ચૂંટણીના સમયે લોન લેનારાઓને રાહત મળશે. કમિટીની બેઠક મુંબઇમાં ત્રણ દિવસ ચાલશે અને ૪ એપ્રિલે વ્યાજદર અંગેના નિર્ણયની જાહેરાત કરાશે. આજથી શરૂ થતી આ બેઠક પૂર્વે આરબીઆઇના ગવર્નર શક્તિકાંત દાસ ઉદ્યોગ સંગઠનો, ડિપોઝિટર્સ એસોસિયેશન, બેન્કર્સ અને એમએસએમઇના પ્રતિનિધિઓ સાથે મિટિંગ કરી ચૂક્યા છે.