- ચાંદની ધરતી પર ભારતે રચ્યો ઈતિહાસ
- ચંદ્રયાન-3નું ચાંદની ધરતી પર સફળ લેન્ડિંગ
- દેશની જનતામાં શાનદાર જોશ, ઉજવણીનો માહોલ
ચંદ્રયાન 3ની માહિતી: દરેક ભારતીયની ગર્વથી છાતી ફૂલી જાય તેવી સિદ્ઘિ ભારતે હાંસલ કરી છે. ચંદ્રયાન-3 એ ચંદ્રના દક્ષિણ ધ્રુવ પર સફળતાપૂર્વક સોફ્ટ-લેન્ડ કર્યું છે. આ અભૂતપૂર્વ અને અજોડ સિદ્ધિ સાથે ભારતે ઈતિહાસ રચ્યો છે. પૃથ્વીના ઉપગ્રહ ચંદ્રના આ ભાગ પર ઉતરનાર ભારત વિશ્વનો પ્રથમ દેશ બન્યો છે. કારણ કે અત્યાર સુધી ચંદ્ર પર ગયેલા તમામ મિશન ચંદ્ર વિષુવવૃત્તની ઉત્તર કે દક્ષિણમાં થોડાક ડિગ્રીના અક્ષાંશ પર ઉતર્યા છે. બ્રહ્માંડની આ જગ્યા પર ભારતનો રાષ્ટ્રધ્વજ ફરકાવવાને કારણે માત્ર વૈજ્ઞાનિકોમાં જ નહીં પરંતુ દેશના દરેક નાગરિકોમાં ઉત્સાહ જોવા મળી રહ્યો છે. સોફ્ટ-લેન્ડિંગથી વાકેફ દરેક ભારતીયનો ચહેરો ખુશીથી છલકી ઉઠ્યો છે.
વિજ્ઞાનિકોને દેશવાસીઓએ અભિનંદન પાઠવ્યા
ચંદ્રયાન-3ના સફળ સોફ્ટ લેન્ડિંગની સાથે જ ભારતની સ્પેસ પાવર ઉભરી આવ્યું છે, ત્યારે ISROનું કદ વિશ્વની અન્ય અવકાશ એજન્સીઓ કરતા પણ ઘણું ઉંચું થઈ ગયું છે. દેશવાસીઓ ઈસરોના વૈજ્ઞાનિકોને અભિનંદન આપી રહ્યા છે અને તેમના કાર્યની પ્રશંસા કરી રહ્યા છે. સોશિયલ મીડિયા પર અભિનંદન સંદેશાઓથી વિજ્ઞાનિકોને દેશવાસીઓ વધાવી રહ્યાં છે. અત્યારે દેશભરમાં ઉજવણીનો માહોલ ચાલી રહ્યો છે. ચાલો જાણીએ ચંદ્રયાન-3 મિશન અને તેના સોફ્ટ લેન્ડિંગ સાથે જોડાયેલી કેટલીક મહત્વપૂર્ણ બાબતો.
લેન્ડર વિક્રમ ચંદ્રની સપાટીને સ્પર્શ્યું અને સોફ્ટ લેન્ડિંગ કર્યું
ચંદ્રયાન-3ના લેન્ડિંગ અંગેની ચર્ચા 14 જુલાઈએ તેના લોન્ચ વખતેથી વેગ પકડી હતી. બુધવાર એટલે કે આજે સાંજના સાડા પાંચ વાગી જતાં દરેકની નજર સોફ્ટ લેન્ડિંગ પર ગઈ હતી. આ અત્યંત રોમાંચક સમય હતો. સામાન્ય માણસનું હૃદય ISROના વૈજ્ઞાનિકોની જેમ જ ઝડપથી ધબકતું થયું હતું. ત્યાર પછી એ ક્ષણ આવી કે જ્યારે લેન્ડર વિક્રમ ચંદ્રની સપાટીને સ્પર્શ્યું અને સોફ્ટ લેન્ડિંગ કર્યું હતું. ઈસરોએ આ માટે સાંજે 6.04 વાગ્યાનો સમય નક્કી કર્યો હતો.
વાતાવરણનું ઇન-સીટુ વિશ્લેષણ કરશે
ઈસરોના નિર્ધારિત આયોજન મુજબ જ થોડા સમય પછી લેન્ડર વિક્રમમાંથી રોવર પ્રજ્ઞાન રેમ્પ તરીકે પેનલનો ઉપયોગ કરીને ચંદ્રની સપાટી પર ઉતરશે. રોવરમાં વ્હીલ્સ અને નેવિગેશન કેમેરા છે. તે ચંદ્રના વાતાવરણનું ઇન-સીટુ વિશ્લેષણ કરશે અને લેન્ડર વિક્રમ સાથે માહિતી શેર કરશે. લેન્ડર વિક્રમ જમીન પરના વૈજ્ઞાનિકો સાથે સીધો માહિતીનો આદાન પ્રદાન કરશે. આ રીતે ચંદ્ર વિશેની અમૂલ્ય માહિતી પૃથ્વી પર આપણા સુધી પહોંચશે.
