ચકચાર / ખોટું કામ ન કરાય...' જિંદગીની સાચી સલાહ આપવી ભારે પડી વડીલને, યુવકે છરીના ઘા ઝીંકી કાસળ કાઢી નાંખ્યું

• અમદાવાદમાં હત્યાનો ચોંકાવનારો કિસ્સો
• સલાહ આપવા જતા યુવકે ઉશ્કેરાઈને વૃદ્ધને ઉતાર્યા મોતને ઘાટ
• પોલીસે હત્યાનો ગુનો નોંધી આરોપીની શોધખોળ શરૂ કરી

વડીલોની સલાહને સોના જેવી માનવામાં આવે છે. પરંતુ અમદાવાદમાં જિંદગી જીવવાની સાચી સલાહ આપવી વૃદ્ધને ભારે પડી ગઈ છે. સલાહ આપવા જતા એક યુવકે ઉશ્કેરાઈને વૃદ્ધને છરીના ઘા ઝીકી મોતને ઘાટ ઉતારી દેતા અરેરાટી મચી જવા પામી છે. આ મામલે પોલીસે હત્યાનો ગુનો નોંધી આરોપીની શોધખોળ શરૂ કરી હતી.

60 વર્ષના મુઝફફરખાન પઠાણએ મોઇનખાનને આપી હતી સલાહ 

વૃદ્ધ વડીલોએ હવે યુવાનોને જિંદગીની રાહ બતાવી પણ જોખમી બની રહી છે. કારણ કે રામોલ વિસ્તારમાં એક યુવાને વૃદ્ધની સલાહથી ઉશ્કેરાઈ તેની હત્યા કરી નાખી હતી. ઘટના એવી છે કે રામોલ વિસ્તારમાં કથિત માસના ટુકડા ફેંકવા બાબતે પોલીસે ટેમ્પા ચાલક વિરુદ્ધ કાર્યવાહી કરી હતી. આ ટેમ્પો ચાલક મોઇનખાન પઠાણ નામનો યુવક હતો. જેને ટેમ્પામાંથી માસના ટુકડા નીચે પડતા CCTV ફૂટેજ પણ સામે આવ્યા હતા. આ મામલે 60 વર્ષના મુઝફફરખાન પઠાણએ મોઇનખાનને સલાહ આપી કે જેલમાં જવું પડે તેવું ખોટુ કામ નહીં કરવાનું! બાદમાં વૃદ્ધની આ સલાહ ન ગમતા મોઇનખાને પિત્તો ગુમાવી દીધો હતો અને છરીના ઘા ઝીંકી મુઝફફરખાન પઠાણને પરલોક પહોંચાડી દીધા હતા. આ ઘટનાને લઈને સમગ્ર પંથકવાસીઓમાં ચકચાર મચી ગઈ હતી.

જિંદગીની સાચી શીખ આપવાથી નિર્દોષ વૃદ્ધને મોતની સજા મળી
મહત્વનું છે કે કથિત માસના ટુકડા કેસમાં આરોપી મોઇનખાન પઠાણની ધરપકડ કરવામાં આવી હતી. બાદમાં જામીન પર છુટકારો થયો હતો અને તે રામોલ વિસ્તારમાં ફરી રહ્યો હતો ત્યારે વૃદ્ધ મુઝફ્ફરખાને તેને બોલાવીને જેલમાં જવા જેવું કામ નહીં કરવાની સલાહ આપી હતી. આ દરમિયાન કથિત માસના ટુકડાના કેસના વિવાદો વચ્ચે આરોપી વૃદ્ધની હત્યા કરી ફરાર થઇ ગયો હતો.જે મામલે.જાણ થતાં રામોલ પોલીસે મોઇનખાન વિરુદ્ધ હત્યાનો ગુનો નોંધી વધુ તપાસ શરૂ કરી છે. આરોપી મોઇનખાનના પગેરું દબાવવા પોલીસે જુદી જુદી ટીમો બનાવીને શોધખોળ શરૂ કરી છે.