વર્લ્ડકપમાં પાક. બોલરનું ભારત સામે કંગાળ પ્રદર્શન:
ICC વર્લ્ડકપમાં આવતી કાલે ભારત-પાકિસ્તાનની ટીમ સાતમી વાર ટકરાશે. વર્લ્ડકપની મેચોમાં પાકિસ્તાનની ટીમ ભારત સામે એક પણ વાર જીતી શકી નથી, કારણ કે પાકિસ્તાની બોલર્સ ભારત સામે એટલું સારું પ્રદર્શન નથી કરી શકતા જેટલું તેઓ અન્ય ટીમ સામે કરતા હોય છે. વર્લ્ડકપમાં ભારત સામે પાક. બોલર્સના સરેરાશ અને ઇકોનોમી રેટની હાલત ખરાબ થઈ જાય છે. એનાથી તદ્દન ઊલટું ભારતીય બોલર્સ પાકિસ્તાન સામે વધુ સારું પ્રદર્શન કરે છે.
બોલિંગઃ મોહંમદ આમિર ભારત સામે ટાઇ ટાઇ ફિશ...
પાકિસ્તાનના બધા મુખ્ય બોલર્સની સરેરાશ ભારત સામે તેમની કરિયરની સરેરાશથી પણ ખરાબ છે. મોહંમદ આમિરની કરિયર સરેરાશ 29.91 છે, પરંતુ ભારત સામે તેની સરેરાશ 42.7 છે એટલે કે આમિર ભારત સામે રમે છે ત્યારે 42 રન આપીને એક વિકેટ ઝડપી શકે છે. આમિરનો ઓવરઓલ ઇકોનોમી રેટ 4.78 છે તે ભારત સામેની મેચમાં 4.98 થઈ જાય છે.
બેટિંગઃ માત્ર હફીઝ-શોએબની એવરેજ જ સારી
પાકિસ્તાનના બેટ્સમેનોમાં મોહંમદ હફીઝ અને શોએબ મલિકા જ એવા છે, જેમની ભારત સામેની એવરેજ તેમની કરિયરની એવરેજ કરતાં વધુ છે. હફીઝ ભારત સામે 11 મેચ રમ્યો છે, જેમાં તેણે 48.6 ની સરેરાશથી 486 રન બનાવ્યા છે. તેની કરિયર એવરેજ 33.19 ની છે. શોએબ મલિકની કરિયર એવરેજ 34.91 છે, જ્યારે તેણે ટીમ ઇન્ડિયા સામે રમેલી 41 મેચમાં 48.16ની સરેરાશથી 1782 રન બનાવ્યા છે.
એશિયા કપ બાદ પ્રથમ ટક્કર:
2008 બાદથી ભારત-પાકિસ્તાન ફક્ત ICC અને એશિયા ક્રિકેટ કાઉન્સિલ (ACC)ની ટૂર્નામેન્ટમાં જ ટકરાય છે. આ બંને વચ્ચે છેલ્લો મુકાબલો ગત વર્ષે સપ્ટેમ્બર-ઓક્ટોબરના એશિયાકપમાં થયો હતો. એ સમયે ભારતે બંને મેચમાં પાકિસ્તાનને માત આપી હતી.
બેટ્સમેનોનો ઇંતેજાર કરી રહી છે ‘પાટા પીચ’ ઓલ્ડ ટ્રેફોર્ડ સ્ટેડિયમની સેન્ટર વિકેટમાં ઘાસનું એક તણખલું પણ નજરે પડતું નથી. આ જ પીચ પર આવતી કાલે ભારત-પાક.ની ટીમ ટકરાવાની છે. વર્તમાન વિશ્વકપમાં આ સ્ટેડિયમ પર પહેલી મેચ રમાશે. આ પીચ એકદમ નવી છે, જોકે વરસાદના કારણે કવરથી ઢંકાયેલી પીચમાં થોડો ભેજ હશે, જેના કારણે ફાસ્ટ બોલર્સને થોડી મદદ મળી શકે, પરંતુ જો કોઈ બેટ્સમેન પીચ પર ટકી ગયો તો તેને રન બનાવવામાં કોઈ મુશ્કેલી નહીં પડે.
10 સેકન્ડની જાહેરાતના બાકી સ્લોટનો ભાવ 35 લાખ રૂપિયા!
પ્રસારણકર્તા ચેનલે લગભગ 10 સેકન્ડની જાહેરાતના મોટા ભાગ સ્લોટ વેચી નાખ્યા છે, પરંતુ જે સ્લોટ બચ્યા છે તેની કિંમત 35 લાખ રૂપિયા બતાવવામાં આવી રહી છે. સામાન્ય રીતે ભારતની મેચમાં દસ સેકન્ડની જાહેરાતના સ્લોટની કિંમત દસથી બાર લાખ રૂપિયા હોય છે. જે સ્લોટ બચ્યા છે તેને પ્રસારણકર્તા ચેનલ પ્રીમિયમ રેટથી વેચી રહી છે. લગભગ 85 % સ્લોટ રૂટિન પ્રક્રિયા હેઠળ બુક થઈ ચૂક્યા છે. બાકીના 15 % સ્લોટ પ્રીમિયમ રેટથી, એમાં પણ હવે ત્રણથી 4 % જ સ્લોટ બચ્યા છે, જેના ભાવ રૂપિયા 35 લાખના આંકને આંબી ગયો હોવાનું સૂત્રો જણાવી રહ્યા છે. જે મેચમાં ભારત નથી રમતું, તેના સ્લોટ છથી સાડા છ લાખ રૂપિયામાં વેચાઈ રહ્યા છે.
