જાહેરનામું / રખડતાં ઢોરેને લીધે પત્નીની નજર સામે જ પતિએ જીવ ગુમાવ્યો, ગુજરાતના આ જિલ્લામાં પશુઓનું રજિસ્ટ્રેશન કરાશે ફરજિયાત

• ગોંડલમાં રખડતા પશુએ યુવકનો લીધો જીવ
• ગાંધીનગરમાં રખડતા પશુને લઈને જાહેરનામુ
• 60 દિવસમાં પશુમાલિકોએ રજીસ્ટ્રેશન કરાવવુ પડશે

ગાંધીનગરમાં તમામ પશુઓના રજીસ્ટ્રેશન ફરજિયાત કરવામાં આવશે. ગાંધીનગરમાં રખડતા પશુઓને લઈને જાહેરનામું બહાર પાડવામાં આવ્યું છે. જેમાં 60 દિવસમાં પશુ માલિકોએ રજીસ્ટ્રેશન કરાવવું પડશે. ત્યારે શહેરમાં તમામ પશુઓને RFID ટેગ લગાવવામાં આવશે. તેમજ પશુના મૃત્યું અને વેચાણ કિસ્સામાં પશુ માલિકોએ મનપાને જાણ કરવી પડશે. 

યુવાનનું મોત નીપજતા પરિવાર શોક મગ્ન બન્યો

ગોંડલ તાલુકાના વાછરા ગામે રહેતા અને ખાખરાનો ગૃહ ઉદ્યોગ ચલાવી ઘર ગુજરાત ચલાવતા દંપતી ગુરૂવાર સાંજે ગોંડલ થી વાછરા ગામ જઈ રહ્યા હતા. ત્યારે ઘોઘાવદર ચોકમાં બાઈક આડે આખલો ઉતરતા સર્જાયેલ અકસ્માતમાં દંપતી ઘવાતા સારવાર માટે ખાનગી હોસ્પિટલમાં ખસેડાયા હતા. જ્યાં હેમરેજના કારણે યુવાનનું મોત નીપજતા પરિવાર શોક મગ્ન બન્યો હતો. 
બનાવના પગલે પરિવારજનો શોકમગ્ન
પ્રાપ્ત વિગતો મુજબ વાછરા ગામે રહેતા સંજયભાઈ જયંતીલાલ રાવલ ઉ.વ. 47 અને તેમના પત્ની નેહાબેન ગુરુવારે સાંજે પોતાના બાઈક પર ગોંડલ થી વાછરા ઘરે જઈ રહ્યા હતા ત્યારે ઘોઘાવદર ચોકમાં અચાનક જ આખલો આડે આવતા અકસ્માત સર્જાયો હતો જેમાં દંપત્તિ ગંભીર રીતે ઘવાતા અત્રેની ખાનગી હોસ્પિટલમાં ખસેડવામાં આવ્યા હતા જ્યાં સંજયભાઈનું બ્રેન હેમરેજના કારણે મોત નીપજતા તેમના મૃતદેહને પીએમ માટે સરકારી હોસ્પિટલમાં ખસેડવામાં આવ્યો હતો. બનાવના પગલે પરિવાર શોક મગ્ન બન્યો હતો. સંજયભાઈ બે ભાઈ અને એક બહેનના પરિવારમાં મોટા હતા અને અકસ્માતમાં તેમની અચાનક વિદાયથી દીકરા દીકરીએ પિતાની છત્ર છાયા ગુમાવી હતી.