- રોહિત શર્માએ કેપ્ટન તરીકેનો 10 વર્ષનો કાર્યકાળ પૂર્ણ થયો
- મુંબઈ ઈન્ડિયન્સનો નવો કેપ્ટન હાર્દિક બન્યો
- 2015માં હાર્દિકે રોહિતની કપ્તાની હેઠળ આઈપીએલમાં ડેબ્યૂ કર્યું
cricket news: મુંબઈ ઈન્ડિયન્સે શુક્રવારે મોટો નિર્ણય લીધો અને ટીમની કમાન હાર્દિક પંડ્યાને સોંપી છે. રોહિત શર્માએ કેપ્ટન તરીકેનો 10 વર્ષનો કાર્યકાળ પૂર્ણ થયો છે. 2013માં હિટમેનને મુંબઈનો કેપ્ટન બનાવવામાં આવ્યો હતો. હવે હાર્દિક આગામી સિઝનમાં કેપ્ટન્સીપ કરતો જોવા મળશે. આ નિર્ણયને લઈને વિવિધ પ્રકારની વાતો સામે આવી રહી છે. એક રિપોર્ટ્સ અનુસાર ગુજરાત ટાઈટન્સના પૂર્વ કેપ્ટને મુંબઈ ઈન્ડિયન્સમાં સામેલ થવા માટે ફ્રેન્ચાઈઝીના માલિક સમક્ષ ઘણી શરતો મૂકી હતી. જેમાંની એક શરત કેપ્ટનશિપની હતી. એટલું જ નહીં ફ્રેન્ચાઇઝીએ કેપ્ટન રોહિતને પણ વર્લ્ડ કપ દરમિયાન આ વિશે જાણ કરી હતી.
હાર્દિકની કપ્તાનીમાં રોહિત રમશે
શુક્રવારે મુંબઈએ જાહેરાત કરી હતી કે, ટીમને પાંચ વખત ચેમ્પિયન બનાવનાર રોહિતની જગ્યાએ હાર્દિક આગામી સિઝનમાં કેપ્ટન બનશે. હિટમેન આગામી સિઝનમાં હાર્દિકની કપ્તાનીમાં રમતા જોવા મળશે જેની ભાગ્યે જ કોઈએ કલ્પના કરી હશે. 2015માં હાર્દિકે રોહિતની કપ્તાની હેઠળ આઈપીએલમાં ડેબ્યૂ કર્યું અને તેણે તેની કારકિર્દી બદલી નાખી છે. અહેવાલો અનુસાર કોન્ટ્રાક્ટ પર ચર્ચા કરતા પહેલા જ હાર્દિકે મુંબઈ ફ્રેન્ચાઈઝીના માલિકને જાણ કરી હતી કે જો તે પુનરાગમન કરે છે તો તેને ટીમની કેપ્ટનશીપ આપવામાં આવે.
પહેલા તેને કેપ્ટનશિપ પરથી હટાવી દેવામાં આવશે
રિપોર્ટ્સ મુજબ રોહિતને વર્લ્ડ કપ દરમિયાન જ જાણ કરવામાં આવી હતી કે આગામી સિઝન પહેલા તેને કેપ્ટનશિપ પરથી હટાવી દેવામાં આવશે. વર્લ્ડ કપ દરમિયાન હાર્દિક રોહિતની વાઈસની ભૂમિકામાં હતો. જો કે, ટીમ ઈન્ડિયાની બાંગ્લાદેશ સામેની ત્રીજી મેચમાં તે ઈજાગ્રસ્ત થયો હતો અને ત્યારબાદ તે ટૂર્નામેન્ટમાંથી બહાર થઈ ગયો હતો. IPL 2024એ કેપ્ટન તરીકે હાર્દિકનું ત્રીજું વર્ષ હશે. તેને 2022માં મેગા ઓક્શન પહેલા મુંબઈ ઈન્ડિયન્સ દ્વારા રિલીઝ કરવામાં આવ્યો હતો. આ પછી તત્કાલીન નવી ટીમ ગુજરાત ટાઇટન્સે તેને કેપ્ટન તરીકે પોતાની ટીમમાં સામેલ કર્યો હતો. 2022માં તેની કેપ્ટનશિપમાં તેણે ટીમને ચેમ્પિયન બનાવી હતી. ગુજરાતની ટીમ 2023 IPLમાં ફાઇનલમાં પહોંચી હતી, પરંતુ ટાઇટલ મેચમાં ચેન્નાઇ સુપર કિંગ્સ સામે હારી ગઇ હતી.
