રાજનીતિ / ગુજરાતમાં AAP નેતાઓની જાણ બહાર કરાયો સર્વે, રિપોર્ટ જોઈને કેજરીવાલે આપ્યો ઠપકો

• ગુજરાતમાં AAPનું ગ્રાઉન્ડ નબળુ હોવાનો મળ્યો રિપોર્ટ
• ગ્રાઉન્ડ મજબૂત કરવા કેજરીવાલે આપી કડક સૂચના
• રણનીતિકાર સંદીપ પાઠકની ટીમે આપ્યો રિપોર્ટ 

વહેલી ચૂંટણી થવાની શક્યતાઓ વચ્ચે રાજકીય માહોલ જામ્યો છે. તેમજ કેન્દ્રીય નેતાઓના ગુજરાત પ્રવાસ પણ વધ્યા છે. આમ આદમી પાર્ટીના નેતા અને દિલ્હીના મુખ્યમંત્રી અરવિંદ કેજરીવાલ અને પંજાબના મુખ્યમંત્રી ભગવંત માન આજથી બે દિવસ માટે ગુજરાતની મુલાકાતે છે.  ત્યારે હવે દિલ્હીના મુખ્યમંત્રી કેજરીવાલને ગુજરાતમાં AAPનું ગ્રાઉન્ડ નબળું હોવાનો રિપોર્ટ મળ્યો છે.

રણનીતિકાર સંદીપ પાઠકની ટીમે મુખ્યમંત્રી અરવિંદ કેજરીવાલને રિપોર્ટ સોંપ્યો છે. છેલ્લા 5 દિવસથી સંદીપ પાઠકની ટીમ સર્વે કરી રહી હતી. ગુજરાત આપના નેતાઓની જાણ બહાર સર્વે કરાયો છે. રિપોર્ટ નબળો આવતા કેજરીવાલે આપના પદાધિકારીઓને ઠપકો આપ્યો છે. ગુજરાતમાં ગ્રાઉન્ડ મજબૂત કરવા કેજરીવાલે કડક સૂચના આપી.ગોપાલ ઇટાલિયા અને ઇસુદાન ગઢવીનું ધ્યાન દોર્યું છે. ગુજરાતમાં પાર્ટીનો રિપોર્ટ નબળો આવ્યો છે પરંતુ નબળુ હોવાના કારણો ચોંકાવનારા ન કહી શકાય. કારણ કે 2021માં ગુજરાતમાં આપ થોડી મજબૂત થઇ છે, તો ગાંધીનગરમાં સારો વોટ શેર મળ્યો. પંજાબમાં સરકાર બની ત્યારબાદ ગુજરાતના કાર્યકર્તાઓને દોષ મળ્યો છે, હવે ગુજરાત આપ નેતાઓ મહેનત કરી રહ્યા છે. 

મહત્વનું છે કે, વિધાનસભા ચૂંટણી પહેલા કેજરીવાલ અને ભગવંત માન ગુજરાતની મુલાકાતે છે. આજે તેમણે ગાંધીઆશ્રમ ખાતે ગાંધીજીની પ્રતિમાને ફૂલહાર કર્યા હતા. ત્યારે હવે તેઓ નિકોલ ખાતે રોડ શો કરવા જઇ રહ્યા છે. આમ આદમી પાર્ટીના નેતાઓ, કાર્યકર્તાઓ સહિત અંદાજે 50 હજાર લોકો પહોંચી રહ્યા છે. અમદાવાદમાં પૂર્વ વિસ્તારમાં રોડ શો યોજાવા જઇ રહ્યો છે. અમદાવાદમાં AAPની તિરંગા યાત્રાનું આયોજન કરવામાં આવ્યું છે. તેમનો નિકોલથી બાપુનગર સુધી 1.5 કિલોમીટર સુધીનો AAPનો રોડ શો યોજાશે.