ગ્રાઉન્ડ રિપોર્ટ / અમદાવાદ-રાજકોટ હાઇવે ધોવાયો: ઠેર-ઠેર ટ્રાફિક જામ, લાખો વાહન ચાલકો થયા પરેશાન, 2020થી ચાલી રહી છે સિક્સ લેનની કામગીરી

 

• અમદાવાદ-રાજકોટ હાઈવે પર ગ્રાઉન્ડ રિપોર્ટ 
• પહેલા વરસાદમાં જ ધોવાયો રોડ
• ખરાબ રસ્તાના કારણે ટ્રાફિકજામની સમસ્યા 
• હાઈવે બનાવવામાં ભ્રષ્ટાચાર થયો?

અમદાવાદ-રાજકોટ હાઈવે પર ટ્રાફિક જામના વારંવાર સમાચાર સામે આવતા VTV ન્યૂઝની ટીમ આજે રાજકોટ-અમદાવાદ હાઈવે પર પહોંચી હતી અને ગ્રાઉન્ડ રિપોર્ટિંગ કરવામાં આવ્યું હતું. આ દરમિયાન VTV ન્યૂઝને અમદાવાદ-રાજકોટ હાઈવે પર થતાં ટ્રાફિક જામનું સાચું કારણ જાણવા મળ્યું હતું. વાસ્તવમાં 2020થી બની રહેલા રાજકોટ-અમદાવાદ સિક્સલેન હાઈવેની કામગીરી હજુ પૂરી નથી થઈ ત્યાં વરસાદના કારણે અમદાવાદ-રાજકોટ હાઈવે ધોવાઈ ગયો છે. ખાડામાં રસ્તો કે રસ્તામાં ખાડો તે જાણવું મુશ્કેલ બની ગયું છે. એકબાજુ વરસાદના કારણે રોડનું ધોવાણ થતાં ટ્રાફિકજામની સમસ્યા સર્જાઈ રહી છે. તો બીજી બાજુ ભ્રષ્ટાચારના આક્ષેપો થઈ રહ્યા છે.  

અમદાવાદ-રાજકોટ હાઈવે ધોવાયો
વરસાદના કારણે અમદાવાદ-રાજકોટ હાઈવે ધોવાયો છે. બાવળા, ચાંગોદર, મોરૈયા, સનાથલ સહિતના ગામોનો હાઈવે ધોવાયો છે. ખરાબ રસ્તાના કારણે ટ્રાફિકજામની સમસ્યા સર્જાઈ રહી છે. આપને જણાવી દઈએ કે, આ હાઈવે પરથી દરરોજ લાખો વાહનો પસાર થાય છે. બિસ્માર રસ્તાના કારણે વાહનચાલકો મુશ્કેલીમાં મુકાયા છે. 

લોકોએ પોતાની વ્યથા ઠાલવી
બિસ્માર રસ્તા અંગે VTV ન્યૂઝ  સમક્ષ લોકો પોતાની હૈયા વરાળ ઠાલવી હતી. એક વાહનચાલકે કહ્યું હતું કે, આ રસ્તાના કારણે અમે ખૂબ મુશ્કેલીમાં મુકાયા છીએ. રસ્તાના કારણે પંચર પડી જતાં અમારે ગાડીનું ટાયર બદલવું પડ્યું. તો અન્ય એક વાહનચાલકે જણાવ્યું કે, રસ્તાના કારણે અમારા વાહનોને ઘણુ નુકસાન થઈ રહ્યું છે. ટોલ ટેક્સના રૂપિયા લેવામાં આવે છે, છતાં રસ્તાઓમાં કોઈ સુધારો થતો નથી.

'રસ્તા પર ખાડા પડી ગયા છે, જેમાં વરસાદી પાણી ભરાઈ જાય છે'
એક વાહનચાલકે જણાવ્યું હતું કે, આ રસ્તાની સ્થિતિ ખૂબ જ ખરાબ છે. રસ્તા પર ખાડા પડી ગયા છે, જેમાં વરસાદી પાણી ભરાઈ જાય છે. બાવળા પછી સ્થિતિ ખૂબ જ ખરાબ છે. કરોડો રૂપિયાના ખર્ચે રસ્તાઓ બને છે, પરંતુ સ્થિતિ તમે જ જોઈ શકો છો. 

 

હાઈવે ધોવાતા કોન્ટ્રાક્ટરની કામગીરી પર સવાલ
રાજકોટ-અમદાવાદ સિક્સલેન હાઈવેની કામગીરી 2020થી ચાલી રહી છે. જે હજુ પણ પૂર્ણ નથી. હાઈવે બન્યા પહેલા જ ધોવાતા કોન્ટ્રાક્ટરની કામગીરી પર સવાલ ઉઠી રહ્યા છે. ત્યારે જોવાનું એ રહ્યું કે તંત્ર દ્વારા કોન્ટ્રાક્ટરને દંડ ફટકારવા જેવી કામગીરી થાય છે કે નહીં.

સળગતા સવાલ 

• સિક્સલેન રોડના કામમાં ભ્રષ્ટાચાર થયો?
• રોડ બન્યા પહેલા જ કેવી રીતે ધોવાઈ શકે?
• કોન્ટ્રાક્ટરે રોડ બનાવવામાં નબળી ગુણવત્તાના મટિરિયલનો ઉપયોગ કર્યો?
• કોન્ટ્રાક્ટરને દંડ ફટકારવા જેવી કામગીરી કેમ નથી થતી?
• શું કોઈ મોટું માથું કોન્ટ્રાક્ટરનો બચાવ કરે છે?
• હાઈવે બનાવવામાં ભ્રષ્ટાચાર થયો?
• કોન્ટ્રાક્ટરને દંડ ફટકારવા જેવી કામગીરી થશે?