ક્રાઇમ / અમદાવાદના અમરાઇવાડીમાં દીકરીના લગ્ન માટે ભેગાં કરેલા રૂપિયા અને દાગીના લઇને તસ્કરો રફુચક્કર, માતાના અરમાનો પર ફરી વળ્યું પાણી

• અમરાઇવાડીમાં ધોળા દિવસે સોનાના દાગીના અને રોકડની ચોરી
• તસ્કરોએ બારીમાંથી ઘૂસીને ચોરીની ઘટનાને આપ્યો અંજામ
• દીકરીના લગ્ન માટે ખરીદેલા દાગીના તસ્કરો ચોરી ગયા

અમદાવાદના શહેરના અમરાઇવાડી વિસ્તારમાં ધોળા દિવસે તસ્કરોએ મકાનમાં ઘૂસીને સોનાના દાગીના તેમજ રોકડની ચોરી કરતાં ચકચાર મચી ગઇ છે. વિધવા તેની દીકરીને સ્કૂલે મૂકવા ગઇ હતી ત્યારે તસ્કરોએ બારીમાંથી ઘૂસીને ચોરીની ઘટનાને અંજામ આપ્યો છે. દીકરીનાં લગ્ન માટે મહિલાના પતિએ દાગીના વસાવ્યા હતા, જેને એક જ ઝાટકે તસ્કરો ચોરીને લઇ ગયા છે અને એક માતાનાં અરમાન અધૂરાં રહી ગયાં છે.

તિજોરીમાંથી દાગીના અને રૂપિયાની ચોરી 
અમરાઇવાડી વિસ્તારમાં આવેલા નીલકંઠ રે‌સિડન્સીમાં રહેતાં પૂનમબેન પ‌િઢયારે અમરાઇવાડી પોલીસ સ્ટેશનમાં અજાણ્યા શખ્સો વિરુદ્ધ ચોરીની ફરિયાદ કરી છે. પૂનમબેન તેમની 12 વર્ષની દીકરી કેટરીના સાથે રહે છે અને તેમના પતિ દીપકભાઇને કોરોના થતાં મોત થયું હતું. પતિ દીપકભાઇ જીવતા હતા ત્યારે તેમણે પત્ની અને દીકરી માટે દાગીના વસાવ્યા હતા. પૂનમબેને દાગીના અને રૂપિયા તિજોરીમાં સાચવીને રાખ્યા હતા, જેને તસ્કરો ચોરીને લઇ ગયા છે.

ઘરનો સામાન હતો વેરવિખેર
ગઇકાલે બપોરે પૂનમબેન ઘરને લોક મારી દીકરીને સ્કૂલે મૂકવા માટે ગયાં હતાં. ત્યાર બાદ તે તેમની માતાને મળવા માટે ખોખરા સર્કલ ગયાં હતાં. બપોરના દોઢેક વાગ્યાની આસપાસ પૂનમબેન જ્યારે ઘરે આવ્યાં ત્યારે મુખ્ય દરવાજો ખૂલતો નહોતો, જેથી આસપાસના લોકોએ પણ દરવાજો ખોલવાનો પ્રયાસ કર્યો હતો. પૂનમબેને રસોડાની ખુલ્લી બારીમાંથી જોયું તો ઘરનો સામાન વેરવિખેર હતો. પૂનમબેન બારી મારફતે ઘરમાં ગયાં અને જોયું તો પતિએ અપાવેલી છેલ્લી નિશાની એવા સોનાના દાગીના તેમજ રોકડની ચોરી થઇ છે.

અમરાઇવાડી પોલીસ શરૂ કરી તપાસ
તસ્કરો રસોડાની બારી મારફતે ઘરમાં ઘૂસ્યા હતા અને તિજોરી ખોલીને સોનાના દાગીના તેમજ રોકડ સહિત કુલ 3.37 લાખની મતાની ચોરી કરીને પલાયન થઇ ગયા હતા. પૂનમબેનના ઘરમાં ચોરી થતાંની સાથે તેમણે કંટ્રોલરૂમમાં જાણ કરી દીધી હતી. ઘટનાની જાણ અમરાઇવાડી પોલીસને થતાં તેઓ તાત્કા‌લિક ઘટનાસ્થળે પહોંચી ગયા હતા અને ગુનો દાખલ કરીને તપાસનો ધમધમાટ શરૂ કર્યો છે. તસ્કરોને પકડી પાડવા માટે પોલીસે એફએસએલની મદદ પણ લીધી છે, જ્યારે આસપાસના સીસીટીવી કેમેરાના ફૂટેજ પણ ચેક કરવાની તજવીજ હાથ ધરી છે.