- ગ્લેશિયર સરોવરો ફાટશે અને મોટી તબાહી સર્જાશે
- ભારતના ૩૦ લાખ લોકો પર ખતરો
- ભારત, પાકિસ્તાન અને ચીન સહિત દુનિયાભરના ૧.૫૦ કરોડ લોકોનો જીવ જોખમમાંઃ અભ્યાસ
બ્રિટનની ન્યૂ કેસલ યુનિવર્સિટીના વૈજ્ઞાનિકોની રાહબરી હેઠળ આંતરરાષ્ટ્રીય સ્તરે હાથ ધરવામાં આવેલા એક અભ્યાસમાં ચોંકાવનારો ઘટસ્ફોટ થયો છે કે ગ્લેશિયર લેક આઉટબર્સ્ટ ફ્લડ (GLOF)નો સૌથી મોટો ખતરો ભારત, પાકિસ્તાન અને ચીન પર તોળાઈ રહ્યો છે. સંશોધકોનું કહેવું છે કે જો ગ્લેશિયર સરોવરો ફાટશે તો મોટી તબાહી સર્જાશે. નેચર કોમ્યુનિકેશન મેગેઝિનમાં પ્રસિદ્ધ થયેલા આ અભ્યાસ અનુસાર ગ્લેશિયર સરોવરોને લઈ ભારતની ૩૦ લાખ અને દુનિયાભરની ૧.૫ કરોડ લોકોની વસ્તી પર મોટો ખતરો તોળાઈ રહ્યો છે.
સુનામી કે પ્રચંડ વિનાશક પૂર આવવાની શક્યતા પણ વધી જશે
દુનિયાભરની ગ્લેશિયર (હિમનદી) ઝડપથી પીગળી રહ્યા છે અને તેના દ્વારા જે સરોવરો સર્જાયાં છે તે ગમે તે ઘડીએ ફાટી શકે તેમ છે. અભ્યાસ અનુસાર જેમ જેમ ગ્લોબલ વોર્મિંગ વધતું જાય છે તેમ તેમ ગ્લેશિયરના મોટા મોટા ટુકડાઓ પીગળતા જાય છે અને તે સરોવરોમાં ફેરવાતા જાય છે. આ સરોવરો ગમે ત્યારે ફાટશે અને તેનાં ધસમસતાં પૂર અને કાટમાળ પહાડો પરથી નીચે આવશે અને તેનાથી સુનામી કે પ્રચંડ વિનાશક પૂર આવવાની શક્યતા પણ વધી જશે.
વર્ષ ૨૦૨૨માં ૧૬ ગ્લેશિયર ફાટવાની ઘટના બની હતી. સંશોધકોના જણાવ્યા અનુસાર ૧૯૪૧ બાદ પહાડો પર હિમસ્ખલનથી લઈ ગ્લેશિયર સરોવરો ફાટવાના કારણે ૩૦થી વધુ કુદરતી આફતો સર્જાઈ હતી, જેમાં હજારો લોકોએ જીવ ગુમાવ્યા છે. આ અભ્યાસમાં દુનિયાની ૨.૧૫ લાખ જમીન આધારિત ગ્લેશિયરનો અભ્યાસ કરવામાં આવ્યો હતો.
