સાસરીયે લીલા લહેર / હેલિકોપ્ટર લઇને આવો તો જ લગ્ન કરું ! ડીસાની ફિયાન્સીની જીદ પુરી કરવા વરરાજાએ જુઓ શું કર્યું

• સૈયા દિલ મે નહિ, હેલીકોપ્ટર મે આના રે...
• ડીસામાં આબુરોડથી જાન હેલીકોપ્ટરમાં આવી 
• 'ના લાલ મોટર,ના ગુલાબી ગજરો,છતાં સાસરીયે લહેર 

દેશના મોટા મોટા ઉદ્ઘ્યોપતિઓનાં શાનદાર અને જાનદાર લગ્નોમાં લક્ઝુરીયસ ગાડીની કતારો તમે જોઈ હશે. ભવ્યાતી ભાવ લગ્નોમાં રાજવાડી ઠાઠ તમે અનુભવ્યો નહિ હોય તો જોયો હશે. પણ પ્રિયતમાની જીદ આગળ ઝુકી જઈને કોઈ વરરાજો,પ્રેમમાં જીદ પૂરી કરી દે તેવા કિસ્સા જવલ્લે જ જોવા મળે છે. આવો જ એક કિસ્સો ડીસાના રણકાંઠા વિસ્તારમાં બન્યો છે. પ્રિયતમા કન્યકા એ જીદ કરી કે, જાન તો હેલીકોપ્ટરમાં જ આવવી જોઈએ. પછી લગ્ન એ જ આખરી મંઝીલ સમજી ગયેલો યુવક રાજસ્થાનથી હેલીકોપ્તર લઈને ઉડ્યો. ખોબા જેવા વિસ્તારમાં હેલીકોપ્ટર ઉતરતા માંડવીયા તો ઠીક જાનૈયા પણ ઉત્સાહમાં હતા અને ગામ ચઢ્યું હિલ્લોળે. 

સ્ત્રી હઠ સામે,ઘૂટણીયે ભરથાર,આવ્યો કોપ્ટર લઈને  

રાજહઠ,બાળહઠ અને સ્ત્રી હઠનું પરિણામ સુપેરે જાણતો રાજસ્થાનના આબુરોડ પરનો માળી સમાજનો યુવક પ્રેમિકાની માંગણી સામે જેમ પ્રપોઝ કરતા ઘૂટણીયે પડી જાય તેમ લગ્નની જાન હેલીકોપ્ટરમાં લાવવાની જીદ સામે એવી રીતે જ ઝૂકી ગયો. ડીસાના પઢિયાર પરિવારની લાડકીએ ભાવી ભરથારને એવો તો મોહપાશમાં બાંધ્યો હતો કે, ભરથાર રાજસ્થાનના માળી પરિવારનો સુરેન્દ્ર રાઠોડ પણ, એક હરફ ના ઉચારી શક્યો અને જીદ કહેતા માંગણીને તાબે થઈ ઉડી આવ્યો હેલીકોપ્ટર લઈને. ડીસાની યુવતી હની પઢિયારની જીદ હતી કે ભાવી ભરથાર  લગ્ન કરવા માટે હેલિકોપ્ટરમાં જાન લઈ આવે. તો ભરથાર સુરેન્દ્ર રાઠોડ ફિયાન્સી હનીની જીદ પૂરી કરવા માટે 20 લાખનો ખર્ચ  કરી હેલિકોપ્ટર ભાડે કરી જાન લઇ ડીસા પહોચ્યો હતો. વરરાજાના આ શાહી હેલીકોપ્તરનું  લેન્ડિંગ ડીસાની અંતરા હોટલના ગ્રાઉન્ડમાં કરાતા, હેલીકોપ્ટરમાં જાન આવીની વાત વાયુવેગે ડીસામાં પ્રસરી જતા લોકટોળા આ નજારો જોવા એકત્રિત થયા હતા.