આયોજન મોકૂફ / મોરબી હોનારતને પગલે PM મોદીના રોડ શો સહિત ગુજરાતમાં અન્ય ધાર્મિક અને સામાજિક કાર્યક્રમો રદ

• મોરબી હોનારતને પગલે ગુજરાતમાં અનેક કાર્યક્રમો રદ
• નરેન્દ્ર મોદીની વર્ચ્યુઅલ ઉપસ્થિતિમાં યોજાનાર પેજ સમિતિ સ્નેહમિલન કાર્યક્રમ મોકૂફ
• કોંગ્રેસની પરિવર્તન સંકલ્પ યાત્રા મોકૂફ  

મોરબી બ્રિજ દુર્ઘટનાને પગલે રાજ્યભરમાં ઉહાપોહ મચી ગયો છે. આ ઘટનાને લઇને વડાપ્રધાન નરેન્દ્ર મોદીની વર્ચ્યુઅલ ઉપસ્થિતિમાં યોજાનાર પેજ સમિતિ સ્નેહમિલન કાર્યક્રમ મોકૂફ રાખવામાં આવ્યો છે. 1 નવેમ્બર 2022 ના રોજ ભારતના વડાપ્રધાન નરેન્દ્ર મોદીની વર્ચ્યુઅલ ઉપસ્થિતિ ભારતીય જનતા પાર્ટી ગુજરાત પ્રદેશના પેજ સમિતિ સભ્યોનો "પેજસમિતિ સ્નેહમિલન કાર્યક્રમ" નું આયોજન કરવામાં આવ્યું હતું. આ કાર્યક્રમ હાલ મોકૂફ રાખવામાં આવેલ છે. ભારતીય જનતા પાર્ટી ગુજરાત પ્રદેશ મીડિયા વિભાગ દ્વારા જણાવાયું છે.  આ સિવાય અમદાવાદમાં મોદીનો રોડ સો સહીત અનેક કાર્યક્રર્મો રદ કરાયા છે.  

કોંગ્રેસની પરિવર્તન સંકલ્પ યાત્રા મોકૂફ 
વધુમાં મોરબીમાં પુલ તૂટવાની કરુણ ઘટનાને લઇને કોંગ્રેસ પક્ષ દ્વારા આજે તા. ૩૧.૧૦.૨૨ ના રોજની  ગુજરાતનાં પાંચ ઝોનમાં શરૂ થનાર 'પરિવર્તન સંકલ્પ યાત્રાને એક દિવસ મોકૂફ રાખવામાં આવી છે. રાજસ્થાનનાં મુખ્યમંત્રી અશોક ગેહલોતજી, પૂર્વ મુખ્યમંત્રી દિગ્વિજય સિંહજી, વરિષ્ઠ નેતા બી કે હરિપ્રસાદજી, રાષ્ટ્રીય પ્રવક્તા પવન ખેરાજી, રાજસ્થાનનાં પૂર્વ આરોગ્ય મંત્રી અને ગુજરાત સંગઠન પ્રભારી ડો.રઘુ શર્માજી, ગુજરાત પ્રદેશ કોંગ્રેસનાં પ્રમુખ જગદીશ ઠાકોર, પૂર્વ પ્રમુખ અર્જૂન મોઢવાડીયા, ભરતસિંહ સોલંકી, સિદ્ધાર્થ પટેલ,  રાજ્યસભા સાંસદ શક્તિસિંહ ગોહિલ,પૂર્વ વિપક્ષ નેતા પરેશ ધાનાણી, કાર્યકારી અધ્યક્ષ લલિત કગથરા, ઋત્વિક મકવાણા મોરબી જઈ હોસ્પિટલ ખાતે સારવાર લઈ રહેલા દર્દીઓનો મુલાકાત લઈ ખબર અંતર પૂછશે અને જેમને આ દુર્ઘટનામાં જીવ ગુમાવ્યા છે તેમાં પરિવારજનોને મળીને સાંત્વના પાઠવશે. 

જામનગર-પોરબંદરમાં જલારામ જયંતી ઉજવણી મોકૂફ
ઉપરાંત જલારામ જયંતીને પગલે જામનગર ,રાજકોટમાં લોહાણા સમાજનાં સમૂહ ભોજનના આયોજન હાથ ધરાયા હતા. ત્યારે મોરબીની હોનારતને લીધે જામનગર ,રાજકોટમાં લોહાણા સમાજનાં સમૂહ ભોજનનો કાર્યક્રમ રદ્દ કરવામાં આવ્યા છે. જામનગરમાં સવારે યોજાનાર મેરેથોન પણ રદ કરી દેવામાં આવી છે. એ જ રીતે પોરબંદર લોહાણા સમાજ દ્વારા પણ મહત્વનો નિર્ણય લેવાયો છે. જેમાં જલારામ જયંતિની ઉજવણીના કાર્યક્રમો રદ  કરાયા છે. શોભાયાત્રા સહિતના આયોજનો રદ કરી સાદગીપૂર્ણ રીતે જન્મજયંતીની ઉજવણી કરવા નિર્ણય લેવાયો છે.