જાહેરાત / જીગ્નેશ બારોટનો રાજકારણમાં 'લે કચૂકો લે', ખેરાલુથી અપક્ષમાં ઝંપલાવશે, કુળદેવીના દર્શન કરી જુઓ શું કહ્યું

• જીજ્ઞેશ બારોટ લડશે ચૂંટણી
• ખેરાલુથી અપક્ષ ઉમેદવારી કરશે 
• મારા ગામના લોકોની લાગણી હતી : જીજ્ઞેશ બારોટ

ગુજરાતમાં ચૂંટણી જાહેરાત થયાં પછી ભાજપ, કોંગ્રેસ અને આમ આદમી પાર્ટી ચૂંટણી જીતવા માટે દાવેપેચ શરૂ કરી દીધા છે. પ્રચારથી લઈ બેઠકોનો ધમધમાટ શરૂ કર્યો છે. આમ આદમી પાર્ટીએ ઉમેદવારોની 12 યાદી પણ જાહેર કરી દીધી છે તો કોંગ્રેસે પણ 43 ઉમેદવારોના નામ જાહેર કરી દીધા છે. આ બધાની વચ્ચે સૌ કોઈની નજર ભાજપ પર છે. એવામાં તેવામાં લોક ગાયક જીગ્નેશ બારોટ  પણ ચુંટણી લડવાની જાહેરાત કરી છે. જીગ્નેશ બારોટ  ખેરાલુમાં અપક્ષમાંથી ચૂંટણી લડવાની જાહેરાત કરી છે.
 

ખેરાલુમાં અનેક મુદ્દા : જીજ્ઞેશ બારોટ
લોક ગાયક તરીકે ખ્યાતિ પામેલા જીગ્નેશ બારોટ  મહેસાણા જિલ્લાની ખેરાલુ બેઠક પરથી ચૂંટણી લડશે તેવી વાત વહેતી થઇ હતી. જેમાં તેમણે સમર્થન આપ્યું છે. લોક ગાયક જીગ્નેશ બારોટ નું મૂળ વતન ખેરાલુ છે અને તેઓ હાલમાં કોઈ પક્ષ સાથે જોડાયેલા નથી.  

ખેરાલુમાં ઉદ્યોગ-ધંધા નથીઃજીજ્ઞેશ
જીગ્નેશ બારોટનું મૂળ વતન ખેરાલુ છે જેથી તેમણે ખેરાલુના રોજગાર, ઉદ્યોગ જેવા મુદ્દાઓને લઈ ચૂંટણી લડવાની જાહેરાત કરી છે. જીગ્નેશ બારોટ ના ચૂંટણી લડવાના સમાચાર સામે આવતા ખેરાલુ બેઠક પર ભારે રસાકસી થાય તેવા એંધાણ વર્તાઈ રહ્યા છે. જીગ્નેશ બારોટ એ પોતાના કુળદેવી હિંગળાજ માતાજીના મંદિરે દર્શન કર્યા હતા. આ દરમિયાન તેમણે ચૂંટણી લડવા વીષે વાત કરતા જણાવ્યુ હતુ કે, ખેરાલુમાં રોડથી લઈ પાણીની અનેક સમસ્યાઓ છે. તેમજ મારા ગામના લોકોની લાગણી હતી. વધુમાં તેમણે જણાવ્યુ હતુ કે, ચૂંટણી લડવાને લઈ પરિવાર અને સાથી કલાકારો સાથે ચર્ચા કર્યા બાદ અપક્ષથી ચૂંટણી લડવાનો નિર્ણય લીધો છે. મને ખેરાલુ અને સતલાસણાના લોકોએ ખૂબ પ્રેમ આપ્યો છે.  તેમ પણ  અંતમાં જણાવ્યું હતું.  

કોણ છે જીગ્નેશ બારોટ  

• જીગ્નેશ બારોટનો જન્મ 3 સપ્ટેમ્બર 1988ના રોજ મહેસાણા જિલ્લાના ખેરાલુ ગામમાં થયો હતો.
• તેમના દાદા, પિતા, કાકા અને મોટાભાઈ પણ સંગીતક્ષેત્રે જોડાયેલા હતા.
• તેમને પણ નાનપણથી જ સંગીતમાં ખૂબ જ રસ હતો.
• જીગ્નેશ બારોટે ધોરણ 8 સુધી જ અભ્યાસ કરેલો છે. તેઓએ પોતાની કળા થકી ખૂબ જ નામ મેળવ્યું છે. 
• આજે જીગ્નેશ બારોટ નું નામ સંગીત ક્ષેત્રે સમગ્ર ગુજરાતમાં છવાયેલું છે.