હાલો માનવીયું મેળે... / પોરબંદરમાં પહેલા દિવસે મેળાનો ફિયાસ્કો, લોકોમાં નારાજગી: રાજકોટમાં જામી ભીડ, જોકે પાથરણાવાળા અને સિક્યુરિટી વચ્ચે બબાલ થતાં માહોલ બગડ્યો

• પોરબંદરમાં નગરપાલિકા આયોજિત લોકમેળાનો ફિયાસ્કો
• પ્રથમ દિવસે એકપણ ચકડોળ શરુ કરાઇ નહી પર્યટકોમાં નારાજગી
• રાજકોટ મેળામાં મારામારીના દ્રશ્યો

પોરબંદરમાં નગરપાલિકા આયોજિત લોકમેળાનો ફિયાસ્કો થયો હોય તેવા દ્રશ્યો સર્જાયા હતા. પોરબંદરમાં ઉદ્ઘાટનના દિવસે મેળો ખાલીખમ જોવા મળ્યો હતો. પ્રથમ દિવસે એકપણ ચકડોળ શરુ ન કરાતા પર્યટકોમાં નારાજગીનો માહોલ છવાયો હતો. જોકે ચકડોળના લાઇસન્સના અભાવે ચકડોળો બંધ જોવા મળી હતી. બીજી તરફ અધિકારી દ્વારા સંતોષકારક જવાબ આપવામાં ન આવતા લોકોમાં ભારોભાર રોષ જોવા મળ્યો હતો.

લોકો અવનવી રાઇડ્સની માણી રહ્યાં છે મજા

આ ઉપરાંત રાજકોટમા પણ મેળાનો જોરદાર માહોલ જામી રહ્યો છે. મેળાને લઈને અવનવી રાઈડ્સ લાગી છે. ત્યારે લોકોએ મનગમતી રાઈડ્સમાં બેસીને ભરપૂર આનંદ ઉઠાવ્યો હતો. બીજી બાજુ મોતના કૂવામાં જીવના જોખમે સ્ટંટ કરતી યુવતી આકર્ષણનું કેન્દ્ર બની હતી. એવો દાવો કરાઈ રહ્યો છે કે આ એક માત્ર ગુજરાતી યુવતી છે. જે મેળામાં મેતના કૂવામાં સ્ટંટ કરે છે. રસરંગ લોકમેળાના બીજા દિવસે સાંજના સમયે ટ્રાફિક વધવા લાગ્યો હતો.

રસરંગ લોકમેળાનો જામતો માહોલ

વધતી ટ્રાંફિક વચ્ચે રાજકોટના રસરંગ મેળામાં પાથરણાવાળાઓએ હોબાળો મચાવ્યો હતો. મેળાના સિક્યુરિટી વ્યવસ્થાપકોએ પાથરણાવાળાઓને માર માર્યા હોવાની પણ રાવ ઉઠી રહી છે. વધુમાં તેમના માલસામાન ફેંકીને વેપાર કરવાની ના પાડી હોવાની પણ ચકચારી રાવ ઉઠી છે. વ્યવસ્થામાં સહયોગ ન કરતા પાથરણાવાળાને ખસેડવાનો આદેશ કરાયો હતો. તથા જે પાથરણાવાળા કટકી નથી આપતા તેમની સામગ્રી ફેંકી દીધી હોવાના પાથરણાવાળાએ આક્ષેપો કરતા ચકચાર જાગી હતી. પાથરણાવાળાઓ તંત્રને ન્યાય માટે રાહતનો ખોળો પાથર્યો હતો. નોંધનિય છે કે ગઈ કાલ સાંજથી રસરંગ લોકમેળો શરુ થયો છે. લોક મેળાને માણવા સૌરાષ્ટ્રભરથી લોકો આવી રહ્યા છે.