લોકસભાની ચૂંટણી પહેલા પક્ષપલટાની મોસમ ચાલી રહી છે. એક પક્ષના નેતા બીજા પક્ષમાં આવન જાવન કરી રહ્યા છે. જેમાં આજે પક્ષપલટો પંજાબથી થયો હોવાના સમાચાર મળ્યા છે. પંજાબમાં કોંગ્રેસને મોટો ઝટકો લાગ્યો છે. પંજાબના પૂર્વ સીએમ બિઅંત સિંહના પૌત્ર રવનીત બિટ્ટુએ કોંગ્રેસ સાથે નાતો તોડી નાખ્યો છે. હવે તેઓ ભાજપમાં જોડાયા છે.
રવનીત બિટ્ટુ પંજાબના દિગ્ગજ નેતા
લોકસભાની ચૂંટણી પહેલા દેશમાં પક્ષ પલટાની મોસમ શરૂ થઇ છે. રાજનિતિમાં એક પક્ષમાંથી બીજા પક્ષમાં જવું ચુંટણી સમયે બનતુ હોય છે. હવે પંજાબમાં કોંગ્રેસને મોટો ઝટકો લાગ્યો છે. જાણવા મળ્યા મુજબ પંજાબના પૂર્વ સીએમ બિઅંત સિંહના પૌત્ર રવનીત બિટ્ટુ ભાજપમાં જોડાઈ ગયા છે. રવનીત બિટ્ટુ હાલમાં લુધિયાણાના સાંસદ છે અને કોંગ્રેસના નેતા રાહુલ ગાંધીના નજીકના માનવામાં આવતા હતા. બીજેપીના વરિષ્ઠ નેતા વિનોદ તાવડેએ મંગળવારે સાંજે ભારતીય જનતા પાર્ટીના મુખ્યાલયમાં પાર્ટીના સભ્ય તરીકે રવનીત બિટ્ટુનું સ્વાગત કરી પુષ્પગુચ્છથી આવકાર્યા હતા.રવનીત બિટ્ટુની ગણતરી પંજાબના દિગ્ગજ નેતાઓમાં થતી હતી. તેઓ ત્રણ વખત સાંસદ રહી ચૂક્યા છે. તેઓ વર્ષ 2009માં આનંદપુર સાહિબ બેઠક પરથી સાંસદ તરીકે ચૂંટાયા હતા. આ પછી, 2014 અને 2019 ની લોકસભા ચૂંટણીમાં તેણે પ્રચંડ જીત મેળવી હતી.
ગુજરાતમાં પણ કોંગ્રેસના અનેક નેતાઓએ પક્ષ છોડ્યો
ગુજરાતમાં પણ લોકસભા ચૂંટણી પહેલા કોંગ્રેસના મોટા ગણાતા નેતાઓએ પક્ષ છોડ્યો છે. આ નેતાઓ બીજેપીમાં જોડાયા છે. કોંગ્રેસમાંથી જીતેલા ધારાસભ્યોએ પણ રાજીનામા આપી દીધા હતા. ત્યારે લોકસભા સાથે જાહેર થયેલી વિધાનસભાની પેટા ચૂંટણીમાં રાજીનામા આપી ભાજપમાં જોડાયેલા ધારાસભ્યોને ભાજપે ફરી મેદાનમાં ઉતાર્યા છે. બીજેપી ગુજરાતમાં 26 લોકસભા બેઠકો જીતવા માગે છે જે મોટી લીડથી જીતવા માટે બીજેપી કોગ્રેસના નેતાઓને ભાજપમાં ભેળવી રહી છે. પરંતુ હવે આ ભરતી મેળાને કારણે બીજેપીના કાર્યકરો અકળાવા લાગ્યા છે અને ધીરેદીરે અસંતોષ સામે પણ આવી રહ્યો છે.
