ટેકનોલોજી / WhatsApp પર આવ્યું જબરદસ્ત ફિચર, ઇન્ટરનેટ વગર મોકલી શકાશે ફોટા, વીડિયો અને ડોક્યુમેન્ટ ફાઇલ

દુનિયાભરના કરોડો WhatsApp યુઝર્સને જલ્દી સારા સમાચાર મળી શકે છે. ટૂંક સમયમાં જ ફોટો, વીડિયો અને ડોક્યુમેન્ટ જેવી ફાઇલો ઇન્ટરનેટ કનેક્શન વિના WhatsAppમાં શેર કરી શકાશે. આ માહિતી WABetaInfoએ આપી છે, જે WhatsApp સંબંધિત જાણકારીની માહિતી આપે છે. જણાવી દઈએ કે ફાઈલ શેરિંગ માટે આ ફીચર બ્લુટૂથ દ્વારા કામ કરશે. રિપોર્ટ અનુસાર, વોટ્સએપ યુઝર્સે સેટિંગ્સમાં જઈને બ્લુટૂથ ઓન કરીને ફાઇલ્સ શેર કરવી પડશે. મેટાની માલિકીની ઇન્સ્ટન્ટ મેસેજિંગ એપ્લિકેશનમાં અન્ય ટેક્સ્ટની જેમ આ ફાઈલ્સ પણ એન્ડ-ટુ-એન્ડ એન્ક્રિપ્ટેડ હશે.

બંને ડિવાઈસમાં ઓફલાઇન ફાઇલ શેરિંગ ફીચર હોવું જરૂરી

WABetaInfo એ આપેલા અહેવાલ અનુસાર, આ ફીચરને કામ કરવા માટે એપને એન્ડ્રોઇડ પરમિશનની જરૂર પડશે. ફાઈલ્સને ઓફલાઇન શેર કરવા માટે જરૂરી છે કે તમે જે ડિવાઈસ સાથે ફાઇલ શેર કરી રહ્યાં છો તેમાં પણ ઓફલાઇન ફાઇલ-શેરિંગ ફીચર હોવું જોઈએ. આ ફીચર એપના આગામી અપડેટ્સમાં રોલઆઉટ થવાની અપેક્ષા છે.

આ ફીચર સાથે, યુઝર્સ એપ સ્ક્રીન પર જ પરમિશન આપી શકશે જેથી બંને ડિવાઈસ કનેક્ટેડ રહી શકે. જણાવી દઈએ કે આ એક ઑપ્ટ-ઇન પ્રોસેસ છે અને કોઈ પણ તમારી પરવાનગી વિના તમને ફાઈલ્સ મોકલી શકશે નહીં. રિપોર્ટમાં કહેવામાં આવ્યું છે કે આ પ્રોસેસમાં મોકલનાર અને પ્રાપ્ત કરનારના ફોન નંબર છુપાયેલા રહેશે. એટલે કે યુઝર્સને વધારાની પ્રાઈવસી મળશે.

રિપોર્ટ અનુસાર, આસપાસ હાજર ડિવાઈસને ઓળખવા, કનેક્ટ કરવા અને તેની પોઝિશનની જાણકારી માટે લોકેશન પરમિશન હોવી જરૂરી છે. યુઝર્સ જયારે ઇચ્છે ત્યારે આ પરમીશનને પોતાના ફોનના સેટિંગ્સમાં જઈને બંધ કરી શકશે.

વધુ વાંચો: શું છે WhatsAppની End-to-End Encryption પોલિસી? જેની માટે કંપની ભારત છોડવા પણ તૈયાર!

જણાવી દઈએ કે આ ફીચર પર હજુ કામ ચાલી રહ્યું છે, તેથી હજુ સુધી તેની રિલીઝ સાથે સંબંધિત કોઈ તારીખ કે સમયની માહિતી મળી નથી. આ ફીચર સિવાય વોટ્સએપ Contact Notes નામના ફીચર પર પણ કામ કરી રહ્યું છે. આ ફીચરની મદદથી વોટ્સએપ યુઝર્સ તેમના કોન્ટેક્ટ સાથે નોટ્સ શેર કરી શકશે.