લોકસભા ચૂંટણી 2024 / અમદાવાદમાં મતદાન જાગૃતિ માટે અનોખો પ્રયાસ કરવામાં આવ્યો, રિવરફ્રન્ટ ખાતે યોજાયો ડ્રોન શો

અમદાવાદ: દેશભરમાં લોકસભાની ચૂંટણી ચાલી રહી છે. દેશભરમાં લોકસભાની ચૂંટણી માટે સાત તબક્કામાં મતદાન યોજાઈ રહ્યું છે, જેમાંથી બે તબક્કાનું મતદાન પૂર્ણ થઈ ચુક્યું છે અને હવે ત્રજા તબક્કાનું મતદાન 7 મેના રોજ થવા જઈ રહ્યું છે. ગુજરાતમાં પણ 7 મેના રોજ મતદાન થવાનું ત્યારે દેશના ચૂંટણી પંચ લોકોમાં મતદાન અંગે જાગૃતિ આવે અને લોકો મતદાન કરવા બહાર આવે એ માટે અભિયાન ચાલી રહી છે.

લોકસભા સામાન્ય ચૂંટણી - 2024 અંતગર્ત અમદાવાદ શહેર અને જિલ્લામાં 7 મી મેના રોજ મતદાન યોજાનાર છે. ત્યારે લોકશાહીના આ મહાપર્વમાં વધુને વધુ લોકો પોતાના મતાધિકારનો ઉપયોગ કરે તે માટે મતદાન જાગૃતિના વિવિધ કાર્યક્રમો કરવામાં આવી રહ્યા છે. ચૂંટણી તંત્ર અને ખાનગી સંસ્થા દ્વારા સાથે મળી અમદાવાદના રિવરફ્રન્ટ પર ઇવેન્ટ સેન્ટર ગ્રાઉન્ડ ખાતે મતદાન જાગૃતિ માટે ડ્રોન શો તેમજ મ્યુઝિકલ ઇવેન્ટનું આયોજન કરવામાં આવ્યું હતું.

શનિવારે રાતે રિવર ફ્રન્ટ ખાતે ડ્રોન શોનું આયોજન કરવામાં આવ્યું હતું, ત્યારે ડ્રોન શોમાં 100 જેટલા ડ્રોન થકી મતદાન જાગૃતિને લઈને વિવિધ મેસેજ આપવામાં આવ્યા હતા. આ સાથે જ મ્યુઝિકલ નાઈટ તેમજ કાવ્યપઠનનું પણ આયોજન કરવામાં આવ્યું હતું, જેમાં વિવિધ સિંગર દ્વારા મ્યુઝિકલ પરફોર્મન્સ સાથે મતદાન જાગૃતિનો મેસેજ આપવામાં આવ્યો હતો.

વધુ વાંચો: જામકંડોરણામાં શાહનો હુંકાર, વિપક્ષો લીધા આડેહાથ

કવિ અને કવિયત્રીઓએ પણ મતદાન જાગૃતિનો મેસેજ આપતી કવિતાઓ રજૂ કરી મતદાનનો સંદેશ આપ્યો હતો. આ ઉપરાંત અમદાવાદની ફૂટબોલ ટીમ અમદાવાદ એવેંજરસના ખેલાડીઓએ પણ લોકોને વધુમાં વધું મતદાન કરે એ માટે મતદાન જાગૃતિનો સંદેશ આપ્યો હતો. અગાઉ પણ ચૂંટણી પંચ અને અન્ય સંસ્થાઓ દ્વારા મતદાન જાગૃતિ માટે અનેક પ્રકારના અભિયાન કરવામાં આવ્યા છે. દેશના દિગ્ગજો પણ લોકોને વધુને વધુ મતદાન કરવા અપીલ કરી રહ્યા છે.