- તુર્કીયેમાં ભૂકંપ બાદ હવે પૂરે તબાહી મચાવી
- વરસાદને કારણે આવેલા પૂરને કારણે 14 લોકોના મોત
- બચાવ ટીમો ત્રણ જગ્યાએ ગુમ થયેલા પાંચ લોકોની શોધમાં
તુર્કીયેમાં ભૂકંપ બાદ હવે પૂરે તબાહી મચાવી છે. બુધવારે અધિકારીઓ દ્વારા આપવામાં આવેલી માહિતી અનુસાર બે પ્રાંતોમાં મુશળધાર વરસાદને કારણે આવેલા પૂરને કારણે ઓછામાં ઓછા 14 લોકોના મોત થયા છે અને હજારો લોકો બેઘર થઈ ગયા છે. ગૃહપ્રધાન સુલેમાન સોયલુએ જણાવ્યું હતું કે, બચાવ ટીમો ત્રણ જગ્યાએ ગુમ થયેલા પાંચ લોકોની શોધમાં છે. સોયલુએ જણાવ્યું હતું કે, દક્ષિણપૂર્વીય પ્રાંત સનલિઉર્ફામાં પૂરથી 12 લોકો માર્યા ગયા હતા, જ્યારે પડોશી આદ્યમાન પ્રાંતમાં બે લોકો માર્યા ગયા હતા.
મીડિયા અહેવાલો અનુસાર અદિયામાનમાં ભૂકંપમાં બચી ગયેલા પરિવારના કેમ્પમાં પાણી ભરાઈ જતાં પીડિતો ડૂબી ગયા હતા. પડોશી સાનલિઉર્ફા પ્રાંતના ગવર્નર સાલીહ અહાને સ્થાનિક ટેલિવિઝનને જણાવ્યું હતું કે, તેમના વિસ્તારમાં ચાર લોકોના મોત થયા છે. બચાવ કાર્યકરોને પાછળથી 5 સીરિયન નાગરિકોના મૃતદેહ સાનલિઉર્ફામાં એક એપાર્ટમેન્ટની અંદર અને અન્ય 2 મૃતદેહો એક વાહનની અંદરથી મળ્યા હતા.
સાનલિઉર્ફા ટેલિવિઝન દ્વારા જાહેર કરાયેલ એક વિડિયોમાં પૂરથી ભરેલી શેરીઓ અને કાર પાણીમાં વહી જતી જોવા મળી હતી. વીડિયોમાં એક વ્યક્તિને અંડરપાસમાંથી બચાવવામાં આવતો જોવા મળી રહ્યો છે. સ્થાનિક મીડિયાના અહેવાલો અનુસાર, ઘણા લોકોને પાણી ભરાયેલા કેમ્પમાંથી બહાર કાઢવામાં આવ્યા હતા. ભૂકંપમાં બચી ગયેલા લોકોએ આ શિબિરોમાં આશરો લીધો હતો. દર્દીઓને પણ હોસ્પિટલમાંથી બહાર કાઢવામાં આવ્યા હતા.
તુર્કીની ડિઝાસ્ટર મેનેજમેન્ટ એજન્સીએ જણાવ્યું હતું કે, બે પ્રાંતોમાંના દરેકમાં એક ડઝનથી વધુ ડાઇવર્સ બચાવ કામગીરીમાં સામેલ હતા. ગયા મહિને આ બે પ્રાંતોમાં આવેલા વિનાશક ભૂકંપમાં ઘણા લોકો માર્યા ગયા અને હજારો બેઘર થયા. આવી સ્થિતિમાં પૂરના કહેરથી લોકોનું જીવન મુશ્કેલ બની ગયું છે. આશંકા છે કે પૂરના કારણે મૃત્યુઆંક વધી શકે છે.
