સ્કેમ / ઘરે બેઠા કામ કરવાની ઑફર આવે તો ચેતજો! સુરતમાં સાયબર ક્રાઈમની તપાસમાં મોટો ખુલાસો, અનેક લોકોએ પૈસા ગુમાવ્યા

 

• ડેટા એન્ટ્રીના નામે છેતરપિંડી
• સાયબર ક્રાઈમે 2ની કરી ધરપકડ
• કરોડોની છેતરપિંડી કરી હોવાનું ખુલ્યું

આજકાલ અલગ-અલગ પ્રકારે લોકો સાથે છેતરપિંડીના કેસોમાં વધારો થઈ રહ્યો છે. ત્યારે ડેટા એન્ટ્રીના નામે ચાલતા કૌભાંડનો પર્દાફાશ થયો છે. સુરત સાયબર ક્રાઈમે 2 શખ્સોની ધરપકડ કરી છે. આ શખ્સો લોકોને ડેટા એન્ટ્રીના નામે મોટો પગાર આપવાની લાલચ આપી બાદમાં કામમાં વાંધા બતાવી નોટિસ ફટકારી નાણાં પડાવતા હોવાનું સામે આવ્યું છે.

ઘરે બેઠા ડેટા એન્ટ્રી કામની ઓફર અપાતી 
સુરતમાંથી સાયબર ક્રાઈમે 2 શખ્સોની ધરપકડ કરી છે. તેઓની પૂછપરછમાં ચોંકાવનારા ખુલાસા થયા છે. પૂછપરછમાં સામે આવ્યું છે કે આ ઠગો લોકોનો ઘરે બેઠા ડેટા એન્ટ્રી કામની ઓફર આપતા હતા. તેઓ સોશિયલ મીડિયાના માધ્યમથી કામની ઓફર અપાતા હતા. જે બાદ કામમાં વાંધા બતાવી નોટિસ ફટકારતા હતા અને લોકો પાસેથી નાણાં પડાવતા હતા. નોટિસ મોકલી કામ કરનારાઓ પાસેથી નાણાં પડાવતા હતા. 

અનેક લોકો સાથે કરોડોની છેતરપિંડી કરી
આ ઠગોએ અત્યાર સુધીમાં અનેક લોકો સાથે કરોડોની છેતરપિંડી કરી હોવાનું ખુલ્યું છે. હાલ સાયબર ક્રાઈમ આ બંનેની વધુ પૂછપરછ કરી રહી છે. પૂછપરછમાં આ કૌભાંડમાં સંડોવાયેલા અનેક લોકોના નામ સામે આવી શકે છે. 

ગાંધીનગર સાયબર ક્રાઈમ સેલમાં થઈ હતી અરજીઓ
મહત્વનું છે કે, આ કૌભાંડની અરજી ગાંધીનગર સુધી થઇ હતી. ગાંધીનગર સાયબર ક્રાઈમ સેલમાં આ મામલે ઘણી અરજીઓ આવી હતી. આમાંથી એક અરજીમાં જણાવામાં આવ્યું હતું કે, સુરતમાં સિક્યોર જોબ, ક્રીએટીવ જોબના નામે વર્ક ફ્રોમ હોમ દ્વારા ઓનલાઇન ડેટા એન્ટ્રીનું કામ આપીને મહિને હજારો રૂપિયાની આવકની ખાતરી આપીને છેતરપિંડી કરવામાં આવે છે. અરજી કરનાર વ્યક્તિ સાથે  સાત હજાર રૂપિયામાં મેમ્બરશીપ એગ્રીમેન્ટ કરવામાં આવતું હતું અને કામ આપવામાં આવતું હતું. 

લીગલ નોટીસ મોકલી પડાવવામાં આવતા હતા નાણાં
જે બાદ એક અઠવાડિયામા ચોક્સાઇ સાથે કામ કરવાની શરત રાખીને કામ પૂર્ણ થયા બાદ આ ટોળકી કામમાં વાંધા કાઢીને તેને કોન્ટ્રાક્ટ તોડવાના નામે લીગલ નોટીસ મોકલતી હતી અને નાણાં પડાવવામાં આવતા હતા. આ અરજીઓ બાદ સુરત સાયબર ક્રાઈમની ટીમ એક્ટિવ થઈ ગઈ હતી અને તપાસનો ધમધમાટ શરૂ કરી દીધો હતો.