ભયંકર / ભારતમાં કાળ બન્યો કોરોના ! 24 કલાકમાં દર ત્રીજી મિનિટે બે દર્દીના મોત

• ભારતમાં કોરોના વાયરસના કુલ કેસ 26 લાખને પાર 
• ભારતમાં 50 હજારથી વધુ લોકો કોરોનાના કારણે કાળનો કોળિયો બન્યા 
• કોરોના ટેસ્ટની સંખ્યા વધીને 3 કરોડને પણ પાર 

કોરોના વાયરસનાં વધતાં જતા કેસ સામે આ વાયરસ હવે કાળ બની રહ્યો છે. ભારતમાં કોરોના વાયરસે 24 કલાકમાં દર ત્રીજી મિનિટે બે વ્યક્તિઓના જીવ લીધા છે. ભારતનાં સ્વાસ્થ્ય મંત્રાલયનાં આંકડાઓ અનુસાર આ અહેવાલ બહાર પાડવામાં આવ્યો છે. મંત્રાલય દ્વારા આપવામાં આવેલ આંકડાઓ અનુસાર 24 કલાક 941 લોકોએ કોરોના વાયરસના કારણે જીવ ગુમાવ્યા છે. જ્યારે નવા 57,981 કોરોના કેસના કારણે કુલ આંક 26 લાખને પણ પાર થઇ ગયો છે. ભારતમાં કોરોના વાયરસના કારણે 50 હજારથી પણ વધુ લોકો અત્યાર સુધી મૃત્યુ પામ્યા છે. 

વાયરસના કેસ જે ગતિથી વધી રહ્યા છે તેમ સામે વધુમાં વધુ લોકો વાયરસને મ્હાત આપી રહ્યા છે. ભારતમાં રિકવરી રેટ પણ વધીને 72.51 ટકા પર પહોંચ્યો છે. જ્યારે મૃત્યુ દર અત્યારે 1.92 ટકા પર છે. વાયરસને રોકવા માટે અત્યારે સૌથી મોટો હથિયાર છે વધુમાં વધુ ટેસ્ટિંગ. ભારતમાં કોરોના વાયરસના કુલ ટેસ્ટનો આંક ત્રણ કરોડને પાર થઇ ગયો છે.  જેમાં રવિવારે જ 7,31,697 કોરોના ટેસ્ટ કરવામાં આવ્યા છે.  

ભારતમાં કોરોના વાયરસના ટેસ્ટ કરવા માટેની લેબોરેટરીની સંખ્યામાં પણ વધારો થઇ રહ્યો છે. ભારતમાં પહેલી લેબોરેટરી પુણેમાં બનાવવામાં આવી હતી જ્યારે 23મી જૂન સુધી ભારતમાં એક હજાર લેબોરેટરી હતી ત્યારે આજની તારીખમાં કોરોના ટેસ્ટ માટેની લેબોરેટરીની સંખ્યા 1,470 પહોંચી ગઈ છે.