રાજકોટ / ભાજપના પૂર્વ કોર્પોરેટર સહિત બે પુત્રો વિરૂદ્ધ હુમલો કર્યાની ફરિયાદ, પીડિતે યોગ્ય કાર્યવાહી ન કર્યાના આક્ષેપ સાથે લીધો આ મોટો નિર્ણય

• અનિલ રાઠોડ અને બે પુત્રો સામે ફરિયાદ
• પિતરાઈ ભાઇ પર હુમલો કર્યો હોવાની ફરિયાદ
• ભાજપના પૂર્વ કોર્પોરેટર છે અનિલ રાઠોડ

રાજકોટના ઉપલાકાંઠા વિસ્તારના ભાજપના પૂર્વ કોર્પોરેટર અનિલ રાઠોડ અને તેમના બે પુત્રોએ કૌટુંબિક અદાવતમાં પિતરાઇ ભાઇ પર હુમલો કર્યો હોવાની ફરિયાદ બી.ડિવિઝન પોલીસ સ્ટેશનમાં નોંધવામાં આવી છે. 

કારથી સ્કૂટરને મારી ટક્કર
બી ડિવિઝન પોલીસ સ્ટેશનમાં નોંધાવેલ ફરિયાદ અનુસાર, શહેરના ભાવનગર રોડ પર આવેલી સિલ્વર નેસ્ટ સોસાયટીમાં રહેતા અને બાંધકામના વ્યવસાય સાથે સંકળાયેલા જીજ્ઞેશ રાઠોડ (ઉ.વ.34) સોમવારે સાંજે સ્કૂટર લઈને પેડક રોડ પરથી પસાર થઈ રહ્યા હતા. આ દરમિયાન પાછળ એક કારે તેમના સ્કૂટરને ટક્કર મારી હતી. જેથી જીજ્ઞેશ રાઠોડ નીચે પટકાયા હતા. 

પારિવારિક તકરારનો ખાર રાખી હુમલો
જે બાદ બે યુવકો ધોકા અને પાઈપ લઈને કારમાંથી નીચે ઉતરી તેમના પર તૂટી પડ્યા હતા. આ બંને યુવકો બીજા કોઈ નહીં પરંતુ તેમના ભાઈ અનિલ રાઠોડના પુત્રો કરણ અને પારસ હતા. પરિવારમાં વર્ષોથી ચાલતી તકરારનો ખાર રાખી બંનેએ જીજ્ઞેશભાઈ પર હુમલો કર્યો હતો.

તાત્કાલિક ખસેડાયા હોસ્પિટલમાં
ઈજાગ્રસ્ત જીજ્ઞેશ રાઠોડને તાત્કાલિક હોસ્પિટલ ખાતે ખસેડવામાં આવ્યા હતા. ધોળાદિવસે સરાજાહેર યુવક પર હુમલો થતાં પોલીસ પણ હોસ્પિટલ ખાતે દોડી આવી હતી. 

અવારનવાર ધમકી આપતો હોવાનો આક્ષેપ 
જીજ્ઞેશ રાઠોડ દ્વારા આક્ષેપ કરાયો છે કે અનિલ રાઠોડ અવારનવાર ધમકી આપતો હોવાની બી-ડિવિઝન પોલીસને અરજી કરવા છતાં કાર્યવાહી કરવામાં આવી નથી. હવે જીજ્ઞેશ રાઠોડ સમગ્ર મામલે ભાજપના પ્રદેશ અધ્યક્ષ સી.આર પાટીલને રજૂઆત કરશે.