- સોશિયલ મીડિયામાં રીલ્સ બનાવનાર પોલીસ અધિકારી/કર્મચારી ચેતીજજો
- ડીજીપી વિકાસ સહાય દ્વારા પરિપત્ર બહાર પાડવામાં આવ્યો
- ફરજ દરમ્યાન યુનિફોર્મમાં રીલ્સ બનાવનાંર પોલીસ કર્મી સામે થશે કાર્યવાહી
આજકાલ સોશિયલ મીડિયા લોકો માટે મનોરંજનનું સાઘન બની ગયું છે. જેમાં કેટલાય લોકો પોતાની રીલ્સ બનાવીને સોશિયલ મીડિયામાં મુકે છે. તેમજ ઘણા પોલીસ કર્મચારીઓ દ્વારા પણ આ રીતે પોલીસ યુનિફોર્મમાં રીલ્સ બનાવીને મુકતા હોય છે. જેને લઈને ગાંધીનગર પોલીસ મહાનિર્દેશક અને મુખ્ય પોલીસ અધિકારી વિકાસ સહાય દ્વારા ગુજરાત પોલીસનાં સદસ્યો માટે સોશિયલ મીડિયાનાં ઉપયોગ બાબતનો એક પરિપત્ર બહાર પાડ્યો છે.
ફરજ દરમ્યાન પોલીસ યુનિફોર્મમાં રીલ્સ/ વીડિયો બનાવવો નહી
જેમાં પોલીસ વિભાગમાં ફરજ બજાવતા પોલીસ અધિકારી/ કર્મચારીઓ દ્વારા સોશિયલ મીડિયાનાં ઉપયોગ બાબતની આચારસંહિતાનો ચુસ્તપણે અમલ કરવાનું જણાવેલ છે. તેમ છતાં સોશિયલ મીડિયાનાં ઉપયોગની આચારસંહિતાનો ચુસ્તપણે અમલ થતો નથી. ખાસ કરીને પોલીસ અધિકારી/કર્મચારીઓ દ્વારા ફરજ પર તથા ફરજ સિવાયનાં સમયે પોલીસ યુનિફોર્મમાં સોશિયલ મીડિયાની રીલ્સ/ વીડિયો બનાવી તેને અલગ- અલગ સોશિયલ મીડિયાની એપ્લિકેશન ઉપર પોસ્ટ કરી પોલીસની છબીને કલંકિત કરતા હોવાનું ધ્યાને આવેલ છે. જેથી આ સૂચનાનો ચુસ્તપણે પાલન થાય તે અતિ આવશ્યક છે.
આચારસંહિતાનો ભંગ કરશે તો કાર્યવાહી કરવામાં આવશે
તેમજ જો હવે કોઈપણ પોલીસ અધિકારી/ કર્મચારીઓ દ્વારા સોશિયલ મીડિયાનાં ઉપયોગ બાબતની આચારસંહિતાનો ભંગ કરવામાં આવશે તો તેઓનાં વિરૂદ્ધમાં ત્વરિત કાર્યવાહી કરવામાં આવશે. તેવું પરિપત્રમાં જણાવવામાં આવ્યું છે.
