રાજકોટ / માતા-પિતા માટે રેડ એલર્ટ: ગોંડલમાં બગીચાના હિંચકામાંથી પટકાતા બાળકનું દર્દનાક મોત, જુઓ શું બન્યું

• ગોંડલમાં બગીચામાં હિંચકા ખાતા પટકાતા બાળકનું મોત
• હિંચકા ખાતી વખતે પડતા બાળકને માથાના ભાગે ઈજા 
• સારવાર દરમિયાન બાળકનું નીપજ્યું મોત

બાળકોને બગીચામાં લઇ જતા માતા-પિતા માટે ચેતવણીરૂપ કિસ્સો સામે આવ્યો છે. ગોંડલમાં બગીચામાં અકસ્માત બન્યો હતો. જેમાં પાંચ વર્ષનો બાળક હિંચકા ખાવા હિંચકામાં બેસવા ગયો હતો આ વેળાએ એકાએક હિંચકામાંથી પટકાઇ પડતા બાળકને ગંભીર ઇજા થવા પામી હતી. જેને લઈને દેકારો બોલી ગયો હતો. આ દરમિયાન બાળકને માથાના ભાગે ગંભીર ઇજા પહોંચતા બાળકની લોહીલુહાણ હાલત થઈ હતી.જેનું સારવાર દરમિયાન મોત થયું હતું.

રાજકોટમાં સારવાર દરમિયાન બાળકનું મોત
આ કેસની વિગત એવી છે કે  ગોંડલમાં આવેલ એસઆરપી કેમ્પ નજીક રહેતા વિપુલભાઈ પરમારનો પાંચ વર્ષનો દીકરો જયવીર ઘર નજીકના બગીચામાં રમતો હતો. જ્યાં હિંચકા ખાવા માટે હિંચકામાં બેસવા જતા પડી ગયો હતો. જેને માથામાં ગંભીર ઇજા પહોંચી હતી. બાદમાં લોકોને જાણ થતા પરિવાજનોને બોલાવ્યા હતા. જ્યાં પરિવારજનો દ્વારા ક્ષણભરનો પર વિલંબ કર્યા વગર બાળકને ગોંડલની સરકારી હોસ્પિટલમાં ખસેડાયો હતો. પરંતુ ત્યાં વધુ સારવારની જરૂર જણાતા બાળકને રાજકોટની હોસ્પિટલમાં ખસેડાયો હતો.

હિંચકતી વખતે બાળક પડી ગયો હતો
જોકે સારવાર દરમિયાન બાળકે હોસ્પિટલ બિછાને આખરી શ્વાસ ખેંચતા પરિજનોમાં કરુંણ કલ્પાંત ફેલાયો હતો. નોંધનીય છે કે બાળકના પિતા કારખાનામાં કામ કરી પરિવારનું ગુજરાન ચલાવે છે. તથા મૃતક જયવીર એક ભાઈ અને એક બહેનનો નાનો ભાઇ હોવાનું જાણવા મળી રહ્યું છે