CCTV ફૂટેજ / અમદાવાદમાં પોલીસકર્મીએ વૃદ્ધને રસ્તાની વચ્ચે લાફો ઝીંકી દીધો, વાહન ટોઇંગ કરવાનો કરી રહ્યા હતા વિરોધ, દાદાગીરીથી પરેશાન થયા શહેરીજનો

• ટોઇંગ કરવા આવેલા પોલીસ કર્મચારીની દાદાગીરી
• વાહન ટોઇંગ નહીં કરવા દેતા સિનિયર સિટીઝનને લાફો માર્યો
• ઘટનાને લઇને સિનિયર સિટીઝને ન્યાયની માંગ કરી

Ahmedabad News: અમદાવાદમાં પોલીસ કર્મચારીની દાદાગીરી સામે આવી છે. શહેરના રિલીફ રોડ પર વાહન ટોઈંગ નહીં કરવા દેતા પોલીસકર્મીએ સિનિયર સિટીઝનને લાફો માર્યો હતો. પોલીસકર્મીની દાદાગીરીની સમગ્ર ઘટના સીસીટીવી કેમેરામાં કેદ થઈ છે. આ ઘટનાને લઈને સ્થાનિકોમાં આક્રોશ જોવા મળી રહ્યો છે, તો બીજી બાજુ સિનિયર સિટીઝને વીડિયો જાહેર કરીને ન્યાયની માંગ કરી છે. 

ટ્રાફિકકર્મીએ સિનિયર સિટીઝનનું ઉઠાવ્યું વાહન
હકીકતમાં શહેરના ટ્રાફિકથી ધમધમતા વિસ્તાર રિલીફ રોડ પર ટ્રાફિક વિભાગના કર્મચારીઓ વાહન ટોઈંગની કામગીરી કરી રહ્યા હતા. આ દરમિયાન રિલીફ રોડ પર ટ્રાફિક વિભાગના કર્મચારીઓએ સિનિયર સિટીઝના વાહનને ઉઠાવ્યું હતું. જોકે, તરત જ સિનિયર સિટીઝન ત્યાં આવી પહોંચ્યા હતા અને તેઓએ પોતાના વાહનને ન લઈ જવાની અપીલ કરી હતી.

પોલીસકર્મીની દાદાગીરી સામે લોકોમાં રોષ
વાહન ટોઇંગ ન કરવા દેતા ટ્રાફિક વિભાગના કર્મચારીઓ સાથે રહેલા પોલીસકર્મી લાલઘુમ થઈ ગયા હતા અને તેમણે સિનિયર સિટીઝનને લાફો ઝીંકી દીધો હતો. ત્યારબાદ આસપાસના લોકો એકત્રિત થઈ જતા પોલીસકર્મીની દાદાગીરીને લઈને લોકોએ વિરોધ નોંધાવ્યો હતો. પોલીસકર્મીની દાદાગીરીની સમગ્ર ઘટના CCTVમાં કેદ થઈ હતી. આ ઘટનાને લઇને સિનિયર સિટીઝને ન્યાયની માંગ કરી છે. 

ટોઇંગ કરનાર ટીમની દાદાગીરી
મહત્વનું છે કે, રિલીફ રોડ પર વાહન ટોઇંગ કરનાર ટીમની દાદાગીરીથી સ્થાનિક લોકો અને દુકાનદારો પરેશાન છે. અવારવાર ટ્રાફિક કર્મચારી અને સ્થાનિકો વચ્ચે ગાડી ટોઈન કરવાના મુદ્દે માથાકૂટના સમાચાર સામે આવતા રહે છે. ત્યારે હવે જોવાનું રહ્યું કે પોલીસના ઉચ્ચ અધિકારીઓ સિનિયર સિટીઝન પર હાથ ઉપાડનાર પોલીસકર્મી સામે કોઈ એક્શન લેશે કે નહીં.