- નિર્મલા સિતારમણે સંસદમાં વચગાળાનું બજેટ રજૂ કર્યું છે.
- કહ્યું, ખેડૂતો, ગરીબ, મહિલાઓ અને યુવાઓએ મોદી સરકારના ચાર સ્તંભ છે
- 38 લાખ ખેડૂતોને PM સંપદા યોજનાનો લાભ મળ્યો છે
મોદી સરકારની બીજી ટર્મનું અંતિમ બજેટ નાણામંત્રી નિર્મલા સિતારમણે લોકસભામાં રજૂ કર્યું. જેમાં નાણાંમંત્રીએ સંબોધન કરતા કહ્યું કે,ખેડૂતો, ગરીબ, મહિલાઓ અને યુવાઓએ મોદી સરકારના ચાર સ્તંભ છે. જેમાં જગતના તાતની વાત કરીએ તો નાણામંત્રીએ પોતાના સંબોધનમાં જણાવ્યું કે, 38 લાખ ખેડૂતોને PM સંપદા યોજનાનો લાભ મળ્યો અને 10 લાખ રોજગારીની તકો ઉભી થઈ છે.
નાણામંત્રી નિર્મલા સિતારમણે કહ્યું કે, 'લણણી પછીના નુકસાનને રોકવા માટે પણ યોજનાઓ પર કામ કરવામાં આવી રહ્યું છે. કાપણી પછીની પ્રવૃતિઓને પ્રોત્સાહન આપવા માટે ખાનગી અને જાહેર ક્ષેત્રની ભાગીદારીને મજબૂત બનાવવાની નાણામંત્રીએ માહિતી આપી હતી. સ્વનિર્ભર તેલ બીજ અભિયાનને વધુ મજબૂત બનાવવાની સાથે કૃષિ ટેક્નોલોજી અને કૃષિ વીમાને પ્રોત્સાહન આપવામાં આવશે. આ સાથે જ ડેરી સાથે સંકળાયેલા ખેડૂતોને પણ મદદ કરવામાં આવી છે. '
આ ઉપરાંત રાષ્ટ્રીય ગોકુલ મિશન જેવી યોજનાઓ ચલાવવામાં આવી રહી છે અને મત્સ્ય સંસાધનોને પણ મજબૂત કરવામાં આવી રહ્યા છે. મત્સ્ય સંપદા યોજના દ્વારા ઉત્પાદકતા પ્રતિ હેક્ટર ત્રણથી પાંચ ટન સુધી વધારવામાં આવશે. 55 લાખ નવી રોજગારીની તકો ઉભી થશે. કૃષિ માટે આધુનિક સ્ટોરેજ અને સપ્લાય ચેઈન પર ફોકસ કરવામાં આવશે. સરકાર ડેરી ખેડૂતોની મદદ માટે એક સ્કીમ લાવશે. નેનો ડીએપીનો ઉપયોગ તમામ ક્ષેત્રોમાં વધારવામાં આવશે. સીફૂડની નિકાસ બમણી કરવાનો લક્ષ્યાંક રાખવામાં આવ્યો છે. ઉપરાંત સરકાર 5 સંકલિત એક્વા પાર્ક ખોલશે.
નાણામંત્રી નિર્મલા સીતારમણે કહ્યું કે છેલ્લા 10 વર્ષમાં દેશમાં 25 કરોડ લોકો ગરીબીમાંથી બહાર આવ્યા છે અને સરકાર ગરીબોને સશક્ત બનાવી રહી છે. 4 કરોડ ખેડૂતોને પાક વીમાનો લાભ મળ્યો છે. મફત રાશનથી 80 કરોડ લોકોની અન્નની ચિંતાનો અંત આવ્યો. છેલ્લા 10 વર્ષોમાં 30 કરોડ મુદ્રા યોજના લોન મહિલા ઉદ્યોગ સાહસિકોને આપવામાં આવી છે. પ્રધાનમંત્રી આવાસ યોજના હેઠળ ગ્રામીણ વિસ્તારોમાં મહિલાઓને 70% મકાનો આપવામાં આવ્યા છે.
નવી સરકાર ચાર્જ સંભાળ્યા બાદ સંપૂર્ણ બજેટ રજૂ કરશે.
મોદી સરકાર 2.0નું છેલ્લું બજેટ નવી સંસદમાં આજે એટલે કે સામાન્ય ચૂંટણી પહેલા રજૂ કરવામાં આવ્યું છે. નાણામંત્રી નિર્મલા સીતારમણ પોતાના કાર્યકાળનું છઠ્ઠું બજેટ રજૂ કર્યું છે અને આ બજેટ વચગાળાનું બજેટ છે. વડાપ્રધાન નરેન્દ્ર મોદીએ બુધવારે જ સ્પષ્ટ કર્યું હતું કે નવી સરકાર ચાર્જ સંભાળ્યા બાદ સંપૂર્ણ બજેટ રજૂ કરશે. એવી અપેક્ષા રાખવામાં આવે છે કે આ વચગાળાના બજેટમાં પણ મોદી સરકાર સામાન્ય લોકો અને કરદાતાઓ માટે રાહતનો ડબ્બો ખોલી શકે છે.
બજેટ સત્ર 31મી જાન્યુઆરીથી 9મી ફેબ્રુઆરી સુધી ચાલશે.
નાણામંત્રી નિર્મલા સીતારમણ બજેટને મંજૂરી આપવા માટે કેબિનેટની બેઠક પહેલા રાષ્ટ્રપતિ ભવન પહોંચ્યા હતા. જ્યાં બજેટને મંજૂરી આપ્યા પછી, રાષ્ટ્રપતિએ નિર્મલા સીતારમણને દહીં-ખાંડ ખવડાવ્યા હતા. એક દિવસ પહેલા એટલે કે 31 જાન્યુઆરી 2024ના રોજ રાષ્ટ્રપતિ દ્રૌપદી મુર્મુએ સંસદને સંબોધિત કરી હતી અને તેમણે મોદી સરકારની ઉપલબ્ધિઓ ગણાવી હતી. સંસદનું બજેટ સત્ર 31મી જાન્યુઆરીથી શરૂ થયું હતું અને 9મી ફેબ્રુઆરી સુધી ચાલશે.
2019 ના વચગાળા બજેટમાં શું જાહેરાત કરવામાં આવી હતી?
પરંપરા મુજબ, વોટ ઓન એકાઉન્ટમાં કોઈ મોટી નીતિની જાહેરાત કરવામાં આવતી નથી. 2019 ના વચગાળાના બજેટમાં મધ્યમ વર્ગને આકર્ષવા માટે, સરકારે 5 લાખ રૂપિયા સુધીની કરપાત્ર આવકને આવકવેરામાંથી મુક્તિ આપી હતી. પ્રધાનમંત્રી કિસાન સન્માન નિધિ હેઠળ 12 કરોડ ખેડૂતોને 6,000 રૂપિયા રોકડ આપવાની પણ જાહેરાત કરવામાં આવી હતી.
આ મહિનામાં આવી શકે છે પૂર્ણ બજેટ
વચગાળાનું બજેટ એપ્રિલથી શરૂ થતા નવા નાણાકીય વર્ષના પ્રથમ ચાર મહિના માટે કેન્દ્ર સરકારના જરૂરી ખર્ચને પહોંચી વળવા એડવાન્સ ગ્રાન્ટ માટે સંસદની મંજૂરી માંગે છે. એપ્રિલ/મેમાં સામાન્ય ચૂંટણીઓ પછી ચૂંટાયેલી નવી સરકાર કદાચ જુલાઈમાં સંપૂર્ણ બજેટ રજૂ કરશે. આદર્શ આચારસંહિતા લાગુ થયાના થોડા અઠવાડિયા પહેલા વચગાળાનું બજેટ રજૂ કરવામાં આવે છે.
