અયોધ્યા / રામલલાની દાનપેટી કુબેરનો ખજાનો, દરરોજ લાખો લોકો દર્શન બાદ કરી રહ્યા છે કરોડોનું દાન

• અયોધ્યા રામ મંદિરમાં આવનાર ભક્તોની સંખ્યા રેકોર્ડ તોડી રહી છે. 
• 23 જાન્યુઆરીથી અત્યાર સુધી 25 લાખ જેટલા શ્રધ્ધાળુઓ દર્શન માટે આવ્યા. 
• છેલ્લા 11 દિવસમાં ભગવાન રામલલાની દાનપેટીમાં 11 કરોડ રૂપિયાનું દાન આવ્યું. 

અયોધ્યા રામ મંદિરમાં રામલલાના પ્રાણ પ્રતિષ્ઠાને હજુ 11 દિવસો થયા છે અને અહીં આવનાર ભક્તોની સંખ્યા રોજ રેકોર્ડ તોડી રહી છે. 22 જાન્યુઆરીના રોજ પ્રાણ પ્રતિષ્ઠા બાદ 23 જાન્યુઆરીથી મંદિર શ્રદ્ધાળુઓ માટે ખોલવામાં આવ્યું હતું. ત્યારથી કરીને અત્યાર સુધી 11 દિવસોમાં રામ મંદિરમાં 25 લાખ જેટલા શ્રધ્ધાળુઓ રામલલાના દર્શન માટે આવ્યા છે.  

1 ફેબ્રુઆરી સુધીના દર્શન અને દાનના આંકડા સામે આવ્યા છે. તે રામ મંદિર પ્રત્યે ભક્તોનું આકર્ષણ દર્શાવે છે. છેલ્લા 11 દિવસમાં ભગવાન રામલલાની દાનપેટીમાં 11 કરોડ રૂપિયાનું દાન આવ્યું છે. તે જ સમયે, આ 11 દિવસમાં 25 લાખ ભક્તોએ દર્શન કર્યા છે. એક રીતે જોવામાં આવે તો રામ મંદિરમાં દરરોજ સરેરાશ 1 કરોડ રૂપિયાનું દાન થઈ રહ્યું છે.  

રામ જમ તીર્થ ક્ષેત્રના જણાવ્યા અનુસાર છેલ્લા 10 દિવસોમાં દાનપેટીમાં 8 કરોડ રૂપિયા જમા થયા છે અને લગભગ 3.5 કરોડ રૂપિયા ઓનલાઈન દાનમાં મળ્યા છે. ટ્રસ્ટના કાર્યાલયના પ્રભારી પ્રકાશ ગુપ્તાએ જણાવ્યું કે ભગવાન રામલલા જ્યાં બિરાજમાન છે તે ગર્ભગૃહની સામે દર્શન માર્ગ પાસે ચાર દાન પેટીઓ રાખવામાં આવી છે. જેમાં ભક્તો દાન કરી રહ્યા છે. 

આ ઉપરાંત 10 કોમ્પ્યુટરાઈઝડ કાઉન્ટર પર પણ લોકો દાન આપી રહ્યા છે. આ ડોનેશન કાઉન્ટરો પર ટેમ્પલ ટ્રસ્ટના કર્મચારીઓની નિમણૂક કરવામાં આવી છે. આ કર્મચારીઓ સાંજે કાઉન્ટર બંધ થયા બાદ મળેલી દાનની રકમનો હિસાબ ટ્રસ્ટની કચેરીમાં જમા કરાવે છે.આ માટે 14 કર્મચારીઓની ટીમ ચાર દાન પેટીઓમાં દાનની ગણતરી કરે છે જેમાં 11 બેંક કર્મચારીઓ અને ત્રણ મંદિર ટ્રસ્ટના કર્મચારીઓનો સમાવેશ થાય છે. પ્રકાશ ગુપ્તાએ કહ્યું કે દાન એકત્ર કરવાથી માંડીને તેની ગણતરી સુધીનું બધું જ સીસીટીવી કેમેરાની દેખરેખ હેઠળ થાય છે.

જણાવી દઈએ કે કડકડતી ઠંડી છતાં રામલલાના દર્શન માટે અયોધ્યા આવનારા ભક્તોની સંખ્યામાં કોઈ ઘટાડો થયો નથી. દરરોજ સવારે 7 વાગ્યાથી મંદિર ભક્તો માટે ખોલવામાં આવે છે અને બપોરે અઢી કલાકના આરામ પછી 10 વાગ્યા સુધી ભક્તો મંદિરના દર્શન કરે છે.