મર્ડર / મોરબીમાં પતિ અન્ય મહિલા સાથે વાત કરતો હોવાની શંકાએ પત્નીએ કુહાડીના ઘા ઝીંકી દીધા, થયું મોત, એક ભૂલનો લોહિયાળ અંજામ

• પત્નીએ પતિને કુહાડીના ઘા ઝીંક્યા
• પતિનું સારવાર દરમિયાન મૃત્યુ
• આરોપી મહિલાની ધરપકડ

જર, જમીન અને જોરુ છે કજિયાના છોરું આ કહેવત મુજબ મોરબી જીલ્લાના વાંકાનેર તાલુકામાં પતિ બીજી મહિલા સાથે વાત કરતો હોવાની પત્નીને શંકા હતી જેથી કરીને રૂમમાં પતિ અને પત્ની વચ્ચે બોલાચાલી થયેલ હતી ત્યારે પત્નીએ ત્રેના પતિને કુહાડીના જીવલેણ હુમલો કર્યો હતો જેથી કરીને ઇજા પામેલા યુવાનનું રાજકોટ સારવાર દરમ્યાન મોત નિપજ્યું છે. જેથી પોલીસે હત્યાનો ગુનો નોંધીને આરોપી મહિલાની ધરપકડ કરેલ છે.

મહિલા તેમજ તેનાં પતિ વચ્ચે ઉગ્ર બોલાચાલી થઈ હતી
મોરબી જીલ્લામાં ઘણા પરિવારો રોજગારી મેળવવા માટે આવે છે. તેવી જ રીતે મૂળ એમપીના રહેવાસી અને હાલમાં સુમસિંહ પ્રેમાભાઈ ડામોર (40) એ તેના દીકરા અને પુત્રવધૂ સાથે મોરબી જીલ્લામાં રોજગારી માટે આવ્યા હતા. અને ત્યારે વાંકાનેર તાલુકાના ઢુવા પાસે માટેલ રોડ ઉપર શિવ ઇન્ડસ્ટ્રીઝ કારખાનામાં કામ કરતા અને લેબર કવાર્ટરમાં રહેતા હતા. ત્યારે સુમસિંહનો દીકરો અર્જુનભાઈ ડામોર અને તેની પુત્રવધુ કાળીબેન અર્જુનભાઈ ડામોર બંને શિવ ઇન્ડસ્ટ્રીઝ કારખાનાના લેબર ક્વાર્ટરમાં હતા. ત્યારે બંને વચ્ચે બોલાચાલી થયેલ હતી અને ત્યારે કાળીબેને તેના પતિ અર્જુનભાઈ ડામોરને કુહાડીના જીવલેણ ઘા માર્યા હતા. જેથી તેને સારવાર માટે રાજકોટ સુધી લઈને ગયા હતા જો કે, સારવાર દરમ્યાન અર્જુનભાઈ ડામોરનું મોત નિપજતા બનાવ હત્યામાં પલટાયો છે.

મહિલાએ તેનાં પતિને કુહાડીનાં ઘા ઝીંકી  મોતને ઘાટ ઉતાર્યો
હાલમાં પોલીસ પાસેથી મળતી માહિતી મુજબ શિવ ઇન્ડસ્ટ્રીઝના લેબર ક્વાર્ટરમાં ફરિયાદીનો દીકરો અર્જુનભાઈ ડામોર અને તેની પુત્રવધુ કાળીબેન ડામોર હતા. ત્યારે મૃતક યુવાન અર્જુન સુમસિંહ ડામોર અન્ય કોઈ મહિલા સાથે મોબાઈલ ઉપર વાત કરે છે. તેવી શંકાના આધારે કાળીબેન ડામોર દ્વારા બોલાચાલી કરવામાં આવી હતી. ત્યાર બાદ અર્જુન ડામોરને કુહાડીના મારી નાખવાના ઇરાદે માથા તથા આંખના ભાગે જીવલેણ ઘા ઝીકયા હતા. જેથી તેને પ્રાથમિક સારવાર વાંકાનેરમાં આપ્યા બાદ વધુ સારવાર માટે રાજકોટ સિવિલ હોસ્પિટલે લઈને ગયા હતા. અને ત્યાં તેને સારવાર દરમ્યાન તેનું મોત નીપજયું છે. જેથી હત્યાના ગુનામાં પોલીસે કાળીબેન ડામોરની ધરપકડ કરેલ છે.

પોલીસે મહિલાની ધરપકડ કરી આગળની કાર્યવાહી હાથ ધરી
મોબાઇલના વધુ પડતાં ઉપયોગના લીધે ઘણા પરિવારો અત્યાર સુધીમાં ભાંગ્યા હોય તેવું સામે આવ્યું છે. ત્યારે વધુ એક પરિવાર તૂટવા માટે મોબાઈલ ફોન જ કારણભૂત બનેલ છે. તેવું કહીએ તો તેમાં જરાપણ અતિશયોક્તિ નથી. હાલમાં મૃતક યુવાનના પિતાએ નોંધાવેલ ફરિયાદ આધારે વાંકાનેર તાલુકા પોલીસ સ્ટેશન ખાતે હત્યાની ફરિયાદ નોંધવામાં આવી છે. જેના આધારે પોલીસે આઇપીસી કલમ 324, 307 તથા જી.પી.એકટ 135 મુજબ ગુનો નોંધીને આરોપી મહિલાની ધરપકડ કરેલ છે અને આરોપી મહિલાને કોર્ટમાં રજૂ કરીને હાલમાં જેલ હવાલે કરવામાં આવેલ છે.