આગાહી / ગુજરાતમાં વરસાદની હાલ કોઈ જ સિસ્ટમ એક્ટિવ નહીં, ક્યાંક ધીમીધારે તો ક્યાંય છૂટોછવાયો વરસે તેવી શક્યતા

• વરસાદને લઇ હવામાન વિભાગે આગાહી કરી
• ઉત્તર ગુજરાતમાં વાતાવરણ સૂકું રહેશે
• અલનીનોની અસરના કારણે વરસાદ નહિંવત્ રહેશે

રાજ્યમાં વરસાદને લઇ હવામાન વિભાગે આગાહી કરી છે. 2 દિવસ સૌરાષ્ટ્રમાં હળવા વરસાદની આગાહી છે, તો 2 દિવસ બાદ સૂકું વાતાવરણ રહેશે. અલનીનોની અસરના કારણે વરસાદ નહિંવત્ રહેશે. ઉત્તર ગુજરાતમાં વાતાવરણ સૂકું રહેશે. હાલ વરસાદને લઈને કોઈ એક્ટિવ સિસ્ટમ નથી. વાતાવરણમાં ભેજના કારણે વરસાદી માહોલ જોવા મળી રહ્યો છે.

અમદાવાદ અને ગાંધીનગરમાં હળવો છુટોછવાયો વરસાદ રહેશે. આજે બનાસકાંઠા, પાટણ, મહેસાણામાં હળવા વરસાદની આગાહી કરવામાં આવી છે. સાબરકાંઠા, ગાંધીનગર, અમદાવાદમાં વરસાદની શક્યતા છે. સુરત, ડાંગ, નવસારી, વલસાડ, તાપીમાં વરસાદની શક્યતા છે. દાદરાનગર હવેલી, દમણમાં વરસાદની આગાહી કરવામાં આવી છે, તો જુનાગઢ, અમરેલી, ગીરસોમનાથ, કચ્છમાં પણ વરસાદ રહેશે. 

અંબાલાલ પટેલની આગાહી
બીજી બાજુ અંબાલાલ પટેલની આગાહી અનુસાર ગુજરાતમાં 26 ઓગસ્ટ સુધી મહદઅંશે વરસાદી ઝાંપટા પડશે. 27થી 31 ઓગસ્ટ દક્ષિણ ગુજરાત, સૌરાષ્ટ્રમાં વરસાદી ઝાપટા પડશે. 30-31 ઓગસ્ટ ચીનમાં ચક્રવાતના કારણે વરસાદની ગતિવિધિ અટકશે. જ્યારે 28 ઓગસ્ટથી રાજ્યમાં ગરમીમાં વધારો થશે. 23 સપ્ટેમ્બરથી ઉનાળાનો અહેસાસ થાય તેવી ગરમી વધી શકે છે.