ઇલેક્શન 2022 / ચૂંટણી પહેલા ઉપલેટાનું ગરમાયું વાતાવરણ, સ્થાનિક ઉમેદવારની માંગ સાથે ઠેર-ઠેર લાગ્યા બેનરો

 

• ઉપલેટા વિધાનસભા વિસ્તારમાં ચૂંટણી પહેલા બેનર યુદ્ધ 
• શહેરના વિવિધ વિસ્તારોમાં લાગ્યા પોસ્ટરો 
• ચૂંટણી પહેલાં પોસ્ટર લાગતા અનેક ચર્ચાઓએ પકડ્યું જોર 

ગુજરાત વિધાનસભાની ચૂંટણીના નગારા વાગતાની સાથે જ રાજકીય પક્ષો મહેનત અને મંથનમાં લાગી ગયા છે. દરેક પક્ષો સક્ષમ ઉમેદવારોની આકરણી કરવામાં જોતરાયા છે.   મતદારોને રિઝવી બુલંદ જીત હાંસલ કરવા રાજકીય પક્ષો એકપછી એક દાવ રમી રહ્યા છે. ત્યારે વિધાનસભાની ચૂંટણી અગાઉ ધોરાજીના ઉપલેટામાં પોસ્ટર વોરથી માહોલ ગરમાયો છે. સ્થાનિકોએ શહેરના મુખ્ય માર્ગો પર બેનર લગાવ્યા છે. 

સ્થાનિક ઉમેદવારની માંગ સાથે લાગ્યા બેનરો
ચૂંટણી પહેલા ધોરાજીના ઉપલેટામાં બેનરો લાગતા સ્થાનિક રાજકારણમાં ગરમાવો આવ્યો છે. સ્થાનિકો દ્વારા શહેરમાં ઠેર-ઠેર બેનરો લગાવવામાં આવ્યા છે. જેમાં સ્થાનિકો દ્વારા સ્થાનિક ઉમેજદવારની માંગ કરવામાં આવી છે. સ્થાનિક ઉમેદવારને ટિકિટ આપવાની ભાજપ-કોંગ્રેસ સમક્ષ માગ કરવામાં આવી છે. બેનરોમાં લખવામાં આવ્યું છે કે, ભાજપ હોય કે કોંગ્રેસ અમારે ઉમેદવાર તો સ્થાનિક જ જોઈએ. ચૂંટણી પહેલાં શહેરભરમાં બેનરો લાગતા અનેક ચર્ચાએ જોર પકડ્યું છે. 

સ્થાનિક ઉમેદવારને ટિકિટ આપવાની માંગણી ઉઠી 
આ અંગે ધોરાજી ધારાસભ્ય લલિત વસોયાએ પ્રતિક્રિયા આપી છે. તેમણે જણાવ્યું કે, આજે સવારથી ધોરાજી, ઉપલેટા, ભાયાવદર અને આજુબાજુના ગામડાની અંદર સ્થાનિક ઉમેદવારને ટિકિટ આપવાની માંગણી ઉઠી છે. કોંગ્રેસ પાર્ટીમાં જેટલા પણ માંગણીદારો છે, તે તમામ સ્થાનિક માંગણીદારો છે. ભારતીય જનતા પાર્ટીમાં બહારના લોકો ટિકિટ માંગી રહ્યા છે, જેનો અસંતોષ ભારતીય જનતા પાર્ટીના કોઈ કાર્યકરોને હોઈ અને તેણે બેનર માર્યા હોય તેવો મને અંદાજ છે. 

લલિત વસોયાએ આપી પ્રતિક્રિયા
લલિત વસોયાએ જણાવ્યું કે, સ્થાનિક ઉમેદવાર લોકોની વચ્ચે રહેતો હોય, લોકોને ઓળખતો હોય, લોકો તેને ઓખળતા હોય. સ્થાનિક ઉમેદવાર હોઈ તો લોકોના પ્રશ્નોનું નિરાકરણ થઈ શકે. ભૂતકાળમાં બંને પાર્ટીમા બહારના ઉમેદવાર આવેલ હોઈ જેના કારણે ધોરાજીનો વિકાસ થઈ શક્યો ન હતો.