- ચંદ્ર પર સોફ્ટ લેન્ડિંગ બાદ સૂર્ય મિશન પણ પૂર્ણ થઈ ગયું
- ISRO એ પૃથ્વીના પડોશી ગ્રહો પર પંહોચવાનું મન બનાવી લીધું
- ભારત આગામી 5 વર્ષમાં પોતાની પહોંચ વધારવાનો પ્રયાસ કરશે
આ દિવસોમાં ભારત વિજ્ઞાનની દુનિયામાં દરરોજ નવી સફળતાની શોધમાં છે. ચંદ્ર પર સોફ્ટ લેન્ડિંગ બાદ સૂર્ય મિશન પણ પૂર્ણ થઈ ગયું છે. ગગનયાન માટેની પરીક્ષણ ઉડાન પણ પૂર્ણ થઈ ગઈ છે. એવામાં બેંગલુરુમાં યુઆર રાવ સેટેલાઇટ સેન્ટરના ડાયરેક્ટર ડૉ. એમ. શંકરને રવિવારે જણાવ્યું હતું કે ભારતની અવકાશ સંશોધન એજન્સી ISRO એ પૃથ્વીના પડોશી ગ્રહો પર પંહોચવાનું મન બનાવી લીધું છે.
ISRO એ પૃથ્વીના પડોશી ગ્રહો પર પંહોચવાનું મન બનાવી લીધું
ઈસરોના વડાએ નવા મિશન વિશે માહિતી આપી હતી. ઈસરોના વૈજ્ઞાનિકો પૃથ્વીના પડોશી ગ્રહો સુધી પહોંચવા માટે બેતાબ છે. એક અહેવાલ મુજબ, ભારત આગામી 5 વર્ષમાં પોતાની પહોંચ વધારવાનો પ્રયાસ કરશે અને દેશની હાજરી મંગળ અને શુક્ર પર નોંધવામાં આવશે.
મંગળના વાતાવરણમાં પ્રવેશવું એક પડકાર છે.
ડો. શંકરન ઈસરોમાં 'પાવરહાઉસ' યુનિટના વડા છે જે ઓર્બિટમાં ઉપગ્રહને ચલાવવાનું કામ કરે છે. એમને કહ્યું કે 'અમારો પ્રયાસ આગામી 5 વર્ષમાં પૃથ્વીની સૌથી નજીકના ગ્રહો સુધી પહોંચવાનો છે. જો કે, આ મિશનમાં ઘણા પડકારો છે. મંગળના વાતાવરણમાં પ્રવેશવું એક પડકાર છે. અહીં ખૂબ જ ગરમી છે. આપણે આ મિશન માટે અલગથી તૈયારી કરવી પડશે. આપણે તમામ હકીકતોનો ઊંડાણપૂર્વક અભ્યાસ કરવો પડશે. ફ્યુઅલ, લોન્ચિંગ પેડ અને લોન્ચ પેડ ખાસ તૈયાર કરવાના રહેશે.'
ચંદ્રયાન-2નું નિષ્ફળ લેન્ડિંગ અમને રોકી રહ્યું હતું
ડૉ. શંકરને વધુમાં જણાવ્યું હતું કે 'છેલ્લા કેટલાક વર્ષોથી... અમે મંગળ પર ઉતરાણ કરવાના મિશનની ગોઠવણીનો અભ્યાસ કરી રહ્યા છીએ. ત્યાં બે વસ્તુઓ છે જે અમને રોકી રહી હતી. એક તો ચંદ્રયાન-2નું નિષ્ફળ લેન્ડિંગ હતું, જેણે લેન્ડિંગ માટે જરૂરી સેન્સર્સમાં અમારો વિશ્વાસ ઓછો કર્યો. એવું નહોતું કે સેન્સર્સ સારી કામગીરી બજાવતા ન હતા, પરંતુ અમે અમારું અંતિમ લક્ષ્ય હાંસલ કરી શક્યા ન હોવાથી, અમને ખાતરી ન હતી કે તે પર્યાપ્ત છે કે નહીં. હવે અમે જાણીએ છીએ કે શું કરી શકાય છે અને કેવી રીતે આગળ વધી શકીએ છીએ.'
