મોટું નિવેદન / શું હવેથી વેક્સિનના બીજા અને ત્રીજા ડોઝ વચ્ચેનું અંતર ઘટી જશે? અદાર પૂનાવાલાએ કહી આ મોટી વાત

• બીજા અને ત્રીજા ડોઝ વચ્ચેના અંતરમાં કરો ઘટાડો : અદાર પુનાવાલા
• સરકાર સમક્ષ પ્રસ્તાવ રજૂ કરશે
• 18 વર્ષથી વધુ ઉંમરના તમામ લોકો માટે બૂસ્ટર ડોઝ શરૂ

SII ના CEO અદાર પૂનાવાલાએ કહ્યું કે, 'બીજા અને ત્રીજા ડોઝ વચ્ચેનો તફાવત 6 મહિના સુધીનો કરવો જોઈએ.' દેશમાં ધીરે-ધીરે કોરોનાથી રાહત મળી રહી છે કારણ કે, છેલ્લાં કેટલાંક અઠવાડિયાથી કોરોનાના કેસો દેશમાં સતત ઘટી રહ્યાં છે. દરમિયાન હવે કોરોના વેક્સિનનો ત્રીજો ડોઝ એટલે કે બૂસ્ટર ડોઝ પણ શરૂ થઇ ગયો છે. જે હવેથી 18 વર્ષથી વધુ ઉંમરના તમામ લોકોને પણ મળશે. પરંતુ હાલમાં બીજા અને ત્રીજા ડોઝ વચ્ચે 9 મહિનાનો તફાવત છે જેને ઘટાડવા ખુદ સીરમ ઈન્સ્ટિટ્યૂટ ઓફ ઈન્ડિયાના સીઈઓ અદાર પુનાવાલાએ આ મુદ્દો ઉઠાવ્યો છે.

સરકારને દરખાસ્ત કરવા જણાવ્યું

હકીકતમાં, સરકાર દ્વારા કહેવામાં આવ્યું છે કે તમે કોરોનાનો બીજો ડોઝ લીધાના 9 મહિના બાદ જ બૂસ્ટર ડોઝ લઈ શકો છો. એટલે કે જાન્યુઆરી 2022 માં બીજો ડોઝ મળ્યો હોય તેણે બૂસ્ટર ડોઝ માટે નવેમ્બર 2022 સુધી રાહ જોવી પડશે. આ અંગે SII ના CEO અદાર પૂનાવાલાએ કહ્યું કે, 'બીજા અને ત્રીજા ડોઝ વચ્ચેનો તફાવત 6 મહિના સુધીનો કરવો જોઈએ.' તેઓએ કહ્યું કે, "અત્યારે કોવિડ રસીકરણની ગતિ ધીમી પડી ગઈ છે. કારણ કે અમને એક નિયમ મળ્યો છે કે તમારે બીજા અને ત્રીજા ડોઝ વચ્ચે 9 મહિના રાહ જોવી પડશે. અમે સરકારને અપીલ કરી છે કે તેને બીજા 6 મહિના સુધી કેવી રીતે ઘટાડી શકાય. અમે 6 મહિનાના અંતરની દરખાસ્ત કરીશું."

સરકારે આપી હતી મંજૂરી

જણાવી દઈએ કે, પહેલા માત્ર 60 વર્ષથી વધુ ઉંમરના અને બીમારીઓથી પીડિત લોકોને જ કોરોનાનો ત્રીજો ડોઝ આપવામાં આવતો હતો. પરંતુ થોડાં દિવસ પહેલાં સરકારે જાહેરાત કરી હતી કે, હવે 10 એપ્રિલથી 18 વર્ષથી વધુ ઉંમરના તમામ લોકોને  કોરોનાનો બૂસ્ટર ડોઝ અપાશે. આ સાથે એમ પણ કહેવામાં આવ્યું હતું કે, ત્રીજો ડોઝ બીજો ડોઝ લગાવ્યાના 9 મહિના બાદ જ આપવો જોઈએ. સરકારે કહ્યું કે, લોકો ખાનગી હોસ્પિટલો અને રસીકરણ કેન્દ્રોમાંથી બૂસ્ટર ડોઝ લાગુ કરી શકે છે. હાલમાં, 18થી 59 વર્ષના લોકોએ ત્રીજા ડોઝ માટે પૈસા આપવાના રહેશે.

We are pleased to announce that after discussion with the Central Government, SII has decided to revise the price of COVISHIELD vaccine for private hospitals from Rs.600 to Rs 225 per dose. We once again commend this decision from the Centre to open precautionary dose to all 18+.

— Adar Poonawalla (@adarpoonawalla) April 9, 2022

જેવી સરકારે બૂસ્ટર ડોઝ લગાવવાની મંજૂરી આપી કે તુરંત સીરમ ઈન્સ્ટિટ્યૂટ ઓફ ઈન્ડિયાના સીઈઓ અદાર પૂનાવાલાએ ટ્વિટ દ્વારા રસીની નવી કિંમતોની જાહેરાત કરી હતી. તેમણે કહ્યું હતું કે, હવે કોવિશિલ્ડ ખાનગી હોસ્પિટલોમાં 600 રૂપિયાને બદલે 225 રૂપિયા પ્રતિ ડોઝ મળશે.